又坐多陣之後,太陽都落埋山,周圍開始黑。

「返去啦。」我提議。

「嗯。」

我哋拖住手行返去。

「去咗邊呀你兩個,差啲要出尋人啟事搵你哋呀。」Cheryl話。





「睇死佢又走咗落去海邊毒啦。」阿Ken話。

我一笑置之。

「笑到咁你唔係喺沙灘亂嚟呀嘛?」阿Ken續説。

「你都癡撚線嘅。」我反咗佢白眼。

「講吓啫,唔洗咁大反應嘅。」阿Ken又講。





「喂,我想食綿花糖呀。」堯細細聲喺我耳邊講。

「好啦,我去燒啦,你同佢哋傾住計先啦。」

咁我燒綿花糖嗰陣,佢哋喺度問堯問題。

「堯姐做咗啲咩去收服咗條友?」阿威問。

「咁八卦嘅你?」阿淇用個不屑嘅眼神望住阿威。





「我都想知喎,明明阿僖中學嗰陣係嗰啲我行我素,完全唔聽人講㗎喎。但係佢依家聽哂你話咁,堯姐你係做過咩嚟?」阿婷問。

班女仔伸個頭去堯度,將班友仔拒於門外,唔比班友仔聽到。

「⋯⋯」阿堯同班女仔講,細聲到我都聽唔到。

「真㗎?」阿婷好驚訝。

「你唔似係咁嘅人嚟喎。」阿淇喺度諗。

「⋯⋯」堯又細細聲講,我又聽唔到。

另一邊箱,綿花糖燒好咗,外邊微微金黃色,簡直係一流,我拎咗幾粒燒好嘅綿花糖,行去班女仔度。

「講緊咩呀?嗱,綿花糖呀。」我扮下傻先。





「唔該你呀B。」堯面紅甜笑住講,講完就微微張開嘴巴。

我將綿花糖放入堯口中,而堯亦餵我食綿花糖,好甜,真係好甜。

「堯姐你真係好勁。」阿淇講。

「唔好咁講啦。」堯怕羞咁講。

「但係真係同你預計嘅一模一樣喎。」Cheryl話

「其實你哋講緊咩?」我扮下傻先。

「無嘢呀,無嘢呀」堯好緊張咁講。





「吓?講啦。」我追問。

「唔好問啦,再問我嬲㗎。」堯説。

「好啦好啦,我唔問啦,唔好嬲呀。」

「好啦嘻嘻。」

「多謝堯姐即場示範呀。」阿婷喺度笑。

「啱呀。」阿淇都一齊笑。

「你哋兩個呀,噗,哈哈⋯」堯扮嬲,但忍唔住笑。

「好喇,唔玩你啦,班傻仔就嚟發霉啦。」阿淇説。
已有 0 人追稿