注意:以下為僖的視角。

又過咗幾日。

「起身啦。」

「比我訓多五分鐘呀?」

「唔得呀。」



「三分鐘。」

「唔好咁懶啦。」

「好啦好啦。」

我望下電話,八點幾喳喎,今日星期日又唔洗上堂,咁早攪咩?

我行去刷牙洗面,堯已經換好曬衫。



「着到咁靚嘅?」

「約咗Jenny嘛,你都快啲換衫啦。」

「我?我換衫做咩?」

「你覺得你唔洗去咩?」

「哦,咁我換衫啦,阿爸阿媽呢?」



「Uncle去陪Auntie行街呀。」

「哦,係呀。」

我求其着件T shirt短褲,而堯就着條碎花長裙,好靚。

我同佢一齊落街攞車。

「去邊呀今日?」

「Megabox。」

「去咁遠嘅?」

「係呀,快啲啦。」



去九龍灣,行龍翔道?行舊機隧?是但啦。

好好彩咁今日無乜癲佬推我,唔係都幾煩下。

去到Megabox,出面圍住長長嘅車龍。

我就梗係唔會等啦,泊喺對面企業廣場就算,啲人為咗行少啲,等Megabox停車場,我泊對面,過條馬路就到,橫掂一樣有泊車優惠。

「去邊呀?Megabox嗰邊喎。」

「泊對面啦,唔洗等。」

喺過馬路嗰陣,見到架EF仲排緊入去。



我拷一拷車窗。

「僖哥。」Chris嗌。

「喂早晨。」

「你哋無揸車咩?」Jenny問。

「泊好車啦。」堯話。

「咁我落車先啦,你慢慢等啦。」Jenny同Chris講。

「攪錯呀,家姐你又扔低我。」

「Bye,你泊好車打比我啦。」



我哋行入去Megabox。

「扔低阿Chris好似唔係幾好喎。」堯話。

「唔洗理個On9仔啦,難得可以靜下。」

之後我哋直上Food court間太興食早餐。

「係喎,一陣行邊先?」堯問。

「睇吓衫先啦,之後我想去IKEA睇睇。」

「好呀。」



仆街睇嚟今日要行到腳斷⋯⋯
已有 0 人追稿