[愛情走糖故]兩個人心底中不為人知嘅秘密,成為兩個人間嘅牽引: 18.自然

「出門口啦～」夏巧莘對住屋內嗌，夏學謙今日比夏巧莘早出門口，一大清早就出咗去
夏巧莘照常行到去巴士站等車，照常的到上層後排嘅位置坐低喺窗邊
當巴士去到下兩個站嘅時候，夏巧莘望出窗外，望住樓下嘅巴士站，見到凌御生嘅身影
凌御生嘟咗八達通卡之後，行上樓梯去到上層，一到達咗上層，眼睛自然咁掃視，望下邊度有位坐
望到後排嘅坐位時，同夏巧莘嘅視線對上咗，凌御生笑咗一笑，然後就行到夏巧莘旁邊坐低
凌御生先啱啱坐低，夏巧莘就不禁瞪大眼，一臉愕然
「你塊面做咩呀？瘀咗嘅又？」夏巧莘指住凌御生嘅臉頰
「哦…嗯…」凌御生答完之後露出尷尬嘅笑容
「打架啦？」夏巧莘細聲問道
「琴晚番到去比老豆打咗一拳…」凌御生尷尬咁笑，「都慣㗎啦～」


「你有冇搽藥膏呀？」夏巧莘輕輕皺起眉頭，一臉擔心
「唔洗啦～」凌御生撥撥手，「都慣㗎啦～」
「你又會突然比你爸打嘅…」夏巧莘無奈一笑
「我同佢嘅關係不嬲都唔好㗎啦～都唔係第一日嘅事嚟…」凌御生將個書包平放喺大腿上，頭靠着後面合埋眼補眠
夏巧莘定睛望住凌御生，臉頰上都瘀起咗一塊紫藍色，但口裏仍然講話習慣咗
合起雙眼想再小睡片刻嘅凌御生感覺到夏巧莘仍然望住佢，於是微微揚起嘴角
「落車嗌我。」凌御生細聲講道
「嗯…」夏巧莘耷低頭睇手機
夏巧莘一郁，唔小心撞到凌御生，佢頓時望向凌御生，怕一唔小心就嘈醒佢，因為今日嘅佢望落好攰
「sorry...！」夏巧莘細細聲講道，成個人凝固咗喺度，留意緊凌御生有冇醒


但凌御生仍然喺小睡嘅世界中未番嚟，夏巧莘不禁鬆咗一口氣
望住佢嘅睡顏，夏巧莘嘅視線停留喺凌御生嘅臉上，呢次係佢第一次認真咁望住凌御生嘅臉
夏巧莘偷偷喺心中給凌御生評分，凌御生嘅顏值唔差，五官分開嚟睇好睇，合埋嚟睇都好睇
呢個時候凌御生突然郁咗一下，夏巧莘即刻就耷低頭睇手機凌御生微微單起一隻眼，偷偷瞄咗夏巧莘一眼
凌御生心知夏巧莘啱啱望住佢，因為佢感覺到嚟自夏巧莘嘅視線，但佢冇出聲，只係輕微咁揚一揚起嘴角，又再次合起雙眼小睡
當巴士差唔多駁到學校外面嘅巴士站時，夏巧莘輕拍凌御生嘅博頭
「就到啦…」夏巧莘柔聲道
凌御生睜開眼，四周望一望，要喺呢個站落車嘅人，基本上都係同一間學校嘅學生，大家眼見都差唔多到，都企起身，落定樓梯或者企喺樓下等落車
凌御生企起身嘅同時孭起書包，先行離座位，夏巧莘跟喺佢身後，兩個人企喺樓梯嘅中間，前前後後都係同一間學校嘅人
凌御生側住身背靠扶手咁企，左腳踩落咗一格，伸手捉住身後嘅扶手，夏巧莘企喺上一級捉緊扶手


成條樓梯都企滿咗人，全部人都係一式一樣，同一間學校嘅校服
「呵～欠…」凌御生打咗一個呵欠，睇去嚟好似仍然未瞓醒一樣
「你仲好眼瞓咁睇落。」夏巧莘微微一笑
「嗯…」凌御生抬頭望住夏巧莘點頭，「琴晚好夜瞓…仲要飲咗酒，頭有少少痛。」
巴士駛近巴士站，突然一下急剎車，車上企喺度嘅人全部都東歪西倒似的，即刻捉緊個扶手
夏巧莘咁啱喺剎車嗰一刻手離開咗扶手，又冇企穩，成個人向前傾，踩落咗一級，然後整個人面向住凌御生，右手自然咁就伸出去搭住企喺自己前面嘅凌御生嘅博頭上，左手仍然捉住扶手
凌御生喺剎車當下，見到夏巧莘企唔穩要跌，下意識就伸手扶住佢
當夏巧莘往下跌咗一級嘅時候，凌御生反應迅速咁將夏巧莘連人帶書包攬住咗
兩個人嘅狀態就係凌御生背住扶手企，右手仍然捉住扶手，但夏巧莘有啲似壁咚一樣，整個上身貼住凌御生企
企喺兩人後面企嘅同校同學將一切都睇喺眼裏，瞬間就「嘩」咗出聲
「你好重呀夏巧莘…」凌御生笑道

IG Link: https://www.instagram.com/nd_cotttoncandy/?hl=zh-tw
回應link: https://docs.google.com/forms/d/e/1FAIpQLScB_-FcIiKv9bnDe_pWTFd9B7sEtdiGEnKZoJeq5rjmK9JUZA/viewform?usp=sf_link