「先唔係呀…」夏巧莘嘅臉頰泛起淡淡紅霞,然後鬆開手企番好
車門打開,喺呢個站落車嘅人逼晒喺車門前湧落車,凌御生同夏巧莘分別先後落車
夏巧莘行喺凌御生隔離,輕輕咬唇,睇嚟啱啱喺車上咁樣,又要變成同學間嘅大新聞啦,比夏學謙知道之後,又要聽佢囉嗦
當呢兩個人一齊行嘅時候,兩個人之間產生咗一種微妙嘅感覺
「我相信呢件事,好快就會傳到去你細佬嘅耳中。」凌御生講道
「我都覺得會…」夏巧莘心中既無奈又擔心,「我諗以學校啲人講是非傳緋聞嘅速度,佢應該轉個頭就知…」
夏巧莘嘅擔心並唔係多餘,因為呢間學校入面,傳咩都唔快,唯有是非同緋聞傳得最快
一個男仔喺4樓走廊飛快咁跑,跑到入去門牌上寫住「4E」嘅課室
「大新聞呀!」佢企喺門口大嗌道
呢個男仔,係啱啱喺巴士上,企喺上層嘅其中一人,佢從上而下望落去,睇到晒成件事嘅經過


而咁啱得咁橋,佢應該就係夏巧莘最擔心嘅事,因為呢個男仔,同夏學謙係同班同學
「嚇死人咩!一大清早嗌咩呀!」一個女同學皺起眉頭望向門口,「有咩大新聞呀?」
「啱啱落車嗰陣,我見到校花同凌御生攬咗!」嗰個男仔大聲咁講道
呢句說話傳到入坐喺後排嘅夏學謙耳中,佢瞬間臉色一沉
「攬咗?點會呀?」坐喺前排嘅另一個女同學講道,「李家樂你唔好亂講啦!」
「真係㗎!我親眼見到㗎!」叫李家樂嘅男仔行入課室,一邊行番自己位一邊講,「佢兩個企喺樓梯,架巴士突然剎車,校花企唔穩向前跌,跌咗一級,然後佢一下就伸手攬住凌御生囉!凌御生好似知佢會跌咁,一見佢向前跌嗰陣就已經一手將校花連人帶書包攬住啦!」
夏學謙同旁邊有幾個男仔圍住坐,個個都專心聽緊李家好講嘅嘢
「之前啲人都話佢兩個有嘢㗎啦~」坐喺夏學謙隔離嗰個男仔講,佢用手背拍落夏學謙嘅手臂上,「你做咩唔同我地講校花已經名花有主呀~」
「唔會係連你都唔知佢地有嘢呀嘛?」坐夏學謙對面嘅男仔一臉訝異
夏學謙冇出聲,因為就算佢宜家講咩都冇用


喺佢心入面覺得,係凌御生纏繞住夏巧莘唔放;但係喺眼中,佢親眼見到兩個人嘅互動,但係兩個人嘅關係係點樣,佢真係唔知
「喂。」坐喺夏學謙左邊嘅男仔伸手拍佢,呢個男仔係咁多個friend入面同夏學謙最要好嘅葉偉健,「夏學謙。」
「冇嘢。」夏學謙回過神答道
另一邊廂,啱啱踏上樓梯嘅夏巧莘同凌御生並唔知道呢件事已經傳到夏學謙耳中
「你最近又會日日番學嘅?」夏巧莘再次打開話題
「嗯~哼~」凌御生笑了笑,「識咗你就日日想番學。」
「係咪呀?」夏巧莘比凌御生講嘅嘢逗笑了
「今晚洗唔洗番工呀?」凌御生細細聲問道
「今晚呀…」夏巧莘諗咗一諗,但佢冇答,只係笑一笑反問道,「想嚟搵我呀?」
「係呀係呀…」凌御生一臉無奈,「想睇下你又會醉成點嘅樣…」


夏巧莘聽到凌御生嘅回答,不禁有啲想知道,凌御生係講笑定係講真
「唔飲得就做出面啦…」凌御生細聲講道
「你擔心我呀?」夏巧莘微微俯身向前望住凌御生,露出平日對人嘅甜美校花笑容
「係呀係呀…」凌御生仍然係一臉無奈,「擔心你呀…」
「呿…」夏巧莘微微鼓起兩泡腮,「唔洗你擔心呀…」
兩個人之間嗰種微妙嘅感覺,或者係由瞹眛衍生出嚟,又或者係同瞹眛同時出現
「你唔飲得就唔好飲咁多啦總之。」凌御生都係再提咗佢一句
「知啦知啦!」夏巧莘冇發現自己笑得有幾甜,只知道自己發現凌御生唔多唔少都係有啲擔心自己

IG Link: https://www.instagram.com/nd_cotttoncandy/?hl=zh-tw
回應link: https://docs.google.com/forms/d/e/1FAIpQLScB_-FcIiKv9bnDe_pWTFd9B7sEtdiGEnKZoJeq5rjmK9JUZA/viewform?usp=sf_link