[愛情走糖故]兩個人心底中不為人知嘅秘密,成為兩個人間嘅牽引: 53.錢包不見了

凌御生似乎明白夏巧莘話中之意，笑而不語
眼見凌御生笑而不語，夏巧莘有啲不知所措，好似自己突然講咗啲奇怪嘅說話一樣
夏巧莘假裝自然咁坐番好，微微耷低頭望住自己嘅手
「蠢到死…點可以冇表示㗎…」夏巧莘喺心中放聲抱怨道，「我講到咁、主動到咁都唔明！」
夏巧莘偷偷扁嘴，但又怕凌御生見到，於是望向窗外
「我唔想要喺冇人嗰陣先可以攬你拖你啦…」夏巧莘喺心中講道
人總係會得一想二，得到咗想要嘅嘢就自然又會有其他想要嘅嘢出現…攬過一次就想攬第二次；錫過一次就想錫第二次；拖手一次就想再拖第二次
喺一直偷偷摸摸嘅情況下突然有一次光明正大嘅機會之後，自然地…就會想再光明正大多啲…
「唔通要我講到出口話我中意你先得…？唔可以唔可以！我唔可以太主動！」夏巧莘喺心中同自己講，但好快又深深咁呼咗一口氣，「但係…唔通佢就一啲感覺都冇咩對我…」
夏巧莘望住出面，凌御生瞄咗夏巧莘一眼，但冇出聲，喺心中明白夏巧莘嘅意思，但佢冇宜家回答嘅打算


「落車啦。」凌御生講完之後，夏巧莘將耳機除咗落嚟
凌御生企起身先行，夏巧莘喺入面行出嚟，行喺凌御生後面，坐喺走廊另一邊嘅嗰個女仔行喺夏巧莘後面
當落咗車之後，嗰個女仔同佢嘅朋友並肩而行
「啱啱呢…我咪坐喺佢隔離嘅…」個女仔同朋友細聲講道，心中夾雜咗羨慕同妒忌，「校花同佢一齊坐…」
「我睇到呀～佢兩個share咗個耳機嚟戴嘛～」朋友講道，然後伸手拍一拍個女仔嘅博頭，「你輸晒啦～人地一望落去就襯到絕，你冇機㗎啦～」
「嗯…難怪佢會拒絕我，原來對手係校花…」個女仔無奈一笑
夏巧莘同凌御生已經差唔多行到學校門口，但係兩個人都冇出聲
「點算呢…佢唔中意我嘅話點算呢…」夏巧莘喺腦海中反覆問道
「諗咩呀？」凌御生望向夏巧莘微笑着問道
「冇呀。」夏巧莘反射式回答道，「咩都冇諗。」


「真係？」凌御生微微彎腰望夏巧莘
「嗯！」夏巧莘點頭
「仲以為係因為啱啱我隔離嗰個女仔添～」凌御生自然咁就講咗出嚟，呢句話之中暗藏玄機，夏巧莘只要一個唔小心答錯嘢，佢嘅想法亦會隨之透露出嚟
「我會因為佢做啲咩呀？」夏巧莘有啲小心虛，移開咗視線，因為的確係因為呢個女仔挑起咗自己嘅佔有欲
「點知你，可能係呷醋掛～」凌御生開玩笑講道
「咁你當我會呷醋啦～」夏巧莘帶住講笑嘅語氣認真咁講道，然後扮嬲鼓起兩泡腮，「見到你同女仔行得埋，我可會呷醋㗎！」
「唉唷～小仙女呷醋啦？」凌御生伸手摸摸夏巧莘嘅頭，看似安慰佢一樣
「哼！我呷醋啦！」夏巧莘嘟起小嘴，凌御生無奈咁笑一笑
明明只係曖昧…但係兩人心中卻覺得無比幸福，或者係因為對方喺自己身邊…
呢個時候突然有人一下子撞落凌御生博頭上，嗰個人冇停低，反而繼續急步直行


「你有冇事呀？」夏巧莘輕輕皺眉，手輕輕搭喺凌御生嘅手臂上，「乜佢咁衰㗎…特登撞埋嚟都有嘅！」
「劉子勤不嬲都係咁㗎啦…」凌御生一臉無奈咁講
兩個人照常番到學校，點知當兩個人行到上去3樓嘅時候，竟然見到一大群人窒晒喺走廊，連訓導主任都喺度
大家一見到凌御生嘅身影就全部望晒過去，凌御生同夏巧莘完全唔知發生緊咩事
「佢番嚟啦！你快啲比番個銀包我呀！」劉子勤一見到凌御生就衝上前指住佢，然後回頭望向訓導主任，「Miss Chan，一定係凌御生偷咗我個銀包！」
「我啱啱先番嚟點樣偷你銀包呀？你一大清早就喺度屈我？」凌御生一臉無奈
「一定係啱啱喺出面我唔小心撞到你嗰陣你偷㗎啦！一定喺你度！」劉子勤大聲咗講度，好似要話比所有人知自己比人偷咗銀包一樣
「你冷靜啲先。」Miss Chan行到劉子勤同凌御生之間，然後望向凌御生，「因為有同學話你偷咗佢嘢，咁你有冇做呀？」
「冇。」凌御生回答道，無言咁笑道，「我啱啱先番嚟點樣偷佢銀包呀？」
「Miss Chan，搜佢書包啦！」劉子勤激動咁講，「一定喺佢書包入面。」

IG Link: https://www.instagram.com/nd_cotttoncandy/?hl=zh-tw
回應link: https://docs.google.com/forms/d/e/1FAIpQLScB_-FcIiKv9bnDe_pWTFd9B7sEtdiGEnKZoJeq5rjmK9JUZA/viewform?usp=sf_link