夏巧莘企喺凌御生旁邊,一臉疑惑,啱啱凌御生一直同自己一齊,佢點樣偷劉子勤個銀包
「我冇做過,你咪搜。」凌御生將個書包除落嚟,一下子掉比劉子勤
劉子勤突然間揚起嘴角,好似好有信心咁
夏巧莘企喺旁邊,心中覺得總有邊度不妥,啱啱劉子勤行過,用力撞咗凌御生一下…唔通佢係為咗要屈凌御生偷佢嘢?
劉子勤喺凌御生嘅書包入面搵,然後揚起嘴角,喺凌御生嘅袋入面拎咗個啡色嘅皮質銀包出嚟
「Miss Chan,我都話係佢偷㗎啦!」劉子勤彷彿係炫耀比凌御生睇一樣,凌御生一臉愕然
「凌御生,宜家人贓並獲,你仲有咩好解釋?」訓導主任嚴肅咁問道
「我真係--」「等陣!」
正當凌御生打算解釋嘅時候,夏巧莘企前咗一步,打斷咗凌御生嘅說話
所有人都將目光移到夏巧莘身上,包括凌御生同劉子勤


「宜家證據確鑿,你仲想講啲咩呀?」劉子勤一臉囂張
「啱啱你係從後面撞落凌御生度,然後就急步直走,咁嘅話凌御生點樣打開你個袋然後拎到你個銀包?」夏巧莘提出疑問之後,大家都沉默落嚟思考,「你撞完佢之後,你就直接急步行,凌御生隻手郁都冇郁過,佢有咩可能喺咁短嘅時間內可以拉開你嘅書包拉鏈,然後仲要伸手入去搵你個銀包?」
大家聽完之後都覺得事有蹺蹊,紛紛覺得夏巧莘講嘅嘢有道理
「又啱喎,行得咁快嘅話,邊有可能喺0.01秒之間做到咁多嘢?」其中一個喺旁邊圍觀嘅男同學講道
「咁可能佢一早留意到我個銀包放邊呢!」劉子勤反駁道
「平時望多你一眼我都唔會,點會留意你個銀包會放邊?」凌御生冷冷咁講道
「你啱啱根本就係刻意撞落凌御生度。」夏巧莘盯着劉子勤,「正常撞到人都會擰轉頭望一望,但你冇,你直接就急步行開。所以你明顯係特登。」
「但係仲未解釋到個銀包點解會喺咁短時間內出現喺凌御生個袋入面…」另一個女仔講道,「邊有可能…?」
「有可能。」凌御生冰冷嘅視線移到劉子勤身上
「比人插贓嫁禍咪有可能。」夏巧莘接住講落去同時直勾勾望住劉子勤


劉子勤心虛般完全唔敢出聲,大家都意識到係劉子勤故意咁做
「劉子勤!你簡直就係浪費大家嘅時間!」Miss Chan責備道,「宜家搵番個銀包就得啦!」
Miss Chan轉身離開,大家都一邊細聲議論,一邊行番入課室
「都話佢兩個有啲嘢㗎啦!一嚟就幫佢出頭…」
「估唔到校花原來中意凌御生呢類!」
「劉子勤擺明係因為上次比人打所以特登報復啦~」
「好彩有你咋…」凌御生望向夏巧莘,微微揚起嘴角
「我都係講事實啫~佢明明就係特登屈你…」夏巧莘為凌御生感到忿忿不平,「其他人就淨係喺度睇好戲,又唔出聲幫口…」
「唔緊要啦~」凌御生微笑道,佢嘅笑容係因為夏巧莘嘅行為,「宜家都冇事~」
「佢根本就係特登!」夏巧莘皺起眉頭


「好啦好啦,唔好嬲啦~宜家冇事咪得囉~」凌御生伸手摸摸夏巧莘嘅頭,「請你食飯報答你好唔好?」
「哼!」夏巧莘哼咗一聲,但係又唔爭氣咁問道,「幾時食飯呀?」
「今晚好唔好?」凌御生問道
「好!」夏巧莘點點頭,「今晚食咩好呀咁?」
「唔…你想食咩呀?」凌御生反問道,笑咗一笑,「我請你食飯,唔係應該係你揀你想食嘅嘢咩?」
「你揀啦~你請嘛!我好多嘢都食。」夏巧莘笑一笑,「我番去先啦~」
「嗯。」凌御生微微點頭
「咁我地今晚見啦~」夏巧莘細細聲咁講,然後轉身行去課室
夏巧莘伸手捉住門柄,然後突然回頭望向凌御生
「我地今晚7點半見啦~」夏巧莘對住凌御生單一單眼,露出甜美嘅笑容,然後就轉身番入課室
「咁樣算唔算係電我…?」凌御生見到夏巧莘單一單眼,忍唔住就嘴角上揚,喺心中問道

IG Link: https://www.instagram.com/nd_cotttoncandy/?hl=zh-tw
回應link: https://docs.google.com/forms/d/e/1FAIpQLScB_-FcIiKv9bnDe_pWTFd9B7sEtdiGEnKZoJeq5rjmK9JUZA/viewform?usp=sf_link
已有 0 人追稿