[愛情走糖故]兩個人心底中不為人知嘅秘密,成為兩個人間嘅牽引: 55.最不知所措的事

因為夏巧莘單一單眼，凌御生嘅心臟瞬間就噗通噗噗咁快速跳動
坐喺夏巧莘前面嘅女仔望到夏巧莘番嚟，當夏巧莘一番到埋位嗰陣，佢將張櫈貼到去夏巧莘張枱邊
「巧莘巧莘！」佢細聲嗌道
「嘉怡嘉怡，做咩呀？」夏巧莘用番疊字嚟回覆佢
「你同凌御生呢…」嘉怡特登冇講到後面，只係講咗想問嘅嘢中最重要嘅人物
「想問咩呀？」夏巧莘拉開木櫈坐低，托住腮
「你同凌御生係咪…吓吓吓？」嘉怡講「吓吓吓」嗰陣，雙手比出手指心
「唔係呀！」夏巧莘搖搖頭，無奈咁講道
「吓，但你兩個好close喎！」嘉怡難以置信咁望住夏巧莘
嘉怡同夏巧莘係算係比較熟絡嘅朋友，或者因為佢地上到高中之後一直都係坐前後，所以比起其他人，夏巧莘同佢最熟


「個個都係咁講，但我同佢真係…冇嘢…」夏巧莘講「冇嘢」嘅時候停頓咗一下
夏巧莘所講嘅「冇嘢」只係對其他人嘅標準答案嚟，但喺心中當然默默知道，其實同凌御生兩人之間嘅關係，根本…唔會係冇嘢…
「你地睇起嚟好曖昧，但係你地好極端。」嘉怡笑住咁望
「極端？」夏巧莘側側頭
「你係乖學生呀，佢係壞學生呀～」嘉怡簡單咁解釋道
「都係嘅…」夏巧莘微微一笑
喺外人眼中，夏巧莘同凌御生嘅關係撲朔迷離，望落係情侶但係卻唔係情侶
呢個時候夏巧莘放空雙眼，心中突然冒出一種想表白嘅感覺
「雖然我唔討厭同佢曖昧，但…如果我同佢表白嘅話，會唔會破壞咗我地嘅關係呢…」夏巧莘喺腦海中問道，「但我唔表白嘅話…」
夏巧莘諗起上次親眼見到有女仔同凌御生表白，又開始擔心起嚟


「如果之後又有女仔同凌御生表白嘅話…咁點算…？我冇身份去阻止…」夏巧莘正苦惱着，突然苦笑起嚟，「中意一個人真係麻煩呢～人地掂一下我都覺得係搶呢～」
自從上次親眼見到有人同凌御生表白，感受過嗰種驚慌同不安之後，夏巧莘就好擔心又會再有一樣嘅事發生，因為自己同凌御生之間根本就冇實名，就算想要阻止都係冇身份有資格出手
嗰種感覺就好似要眼白白睇住佢比人搶走一樣，但咩都唔做得
「但表咗白嘅話…」夏巧莘自己都好迷惘，「會唔會連曖昧嘅機會都冇埋…有得曖昧一下其實都好，但係如果表咗白…真係咩都冇…」
同凌御生之間曖昧不清嘅關係，大概就係令佢最迷惘最不知所措嘅事…
曖昧得愈多，想獨佔嘅心就愈強，但係偏偏冇一個身份去獨佔呢個人，所以心中更加焦躁
夏巧莘喺裙袋拎出手機，然後send咗個訊息比凌御生，話咗比佢知今晚想食咩
喺隔離嘅凌御生嘅手機震咗一下，凌御生拎出手機，望到夏巧莘send過嚟嘅whatsapp，然後無奈一笑
「好，食呢個囉」凌御生回覆道，然後再send多咗個訊息，「咁今晚見啦～」
夏巧莘低頭喺櫃桶睇手機，見到凌御生嘅回覆嗰陣甜甜一笑，然後回覆道：「咁今晚見啦～」


…
「叮…噹～」
「好準時喎～」凌御生企喺木門前面望住夏巧莘
「當然啦～」夏巧莘笑一笑，然後將手上拎住嘅白色膠袋遞比凌御生，「我買咗上嚟啦～」
「入嚟先啦！」凌御生講道，夏巧莘入咗嚟之後，企喺門邊除鞋，然後將鞋放喺置物櫃下
夏巧莘拎住個膠袋行到去廚房嘅雪櫃前，打開雪櫃門蹲低，將放喺膠袋入面嘅啤酒放入雪櫃
「我話請你食飯，你話要食我煮嘅都得㗎咩…」凌御生企喺洗手盆前洗緊嘢
「上次食完個炒飯之後，就想再食嘛～」夏巧莘企起身，閂上雪櫃門行到凌御生旁邊，「今晚食咩呀？」
「你估下～」凌御生微微低頭，笑住咁望夏巧莘，「陣間你咪知囉～」
「好啦～」夏巧莘甜甜咁笑，微微側着頭靠喺凌御生嘅博頭上
夏巧莘嘅舉動，令凌御生有啲疑惑

IG Link: https://www.instagram.com/nd_cotttoncandy/?hl=zh-tw
回應link: https://docs.google.com/forms/d/e/1FAIpQLScB_-FcIiKv9bnDe_pWTFd9B7sEtdiGEnKZoJeq5rjmK9JUZA/viewform?usp=sf_link