「你呀…最近做咩好似好痴我咁嘅?」凌御生問道,總覺得夏巧莘最近有啲唔同
「吓?冇呀。」夏巧莘抬起頭望凌御生,「我一直都係咁㗎。」
「係咩?但我覺得你最近好似特別痴我咁…」凌御生低頭拎起刀切菜
夏巧莘冇出聲,但佢覺得自己真係冇特別痴凌御生,一直都係咁樣,冇太大嘅差別
夏巧莘行出廚房,行到梳化前坐低睇電視
「你爸爸好似唔係成日喺屋企咁嘅?」夏巧莘為咗打開話題同脫離啱啱嘅話題而問道
「佢要傾生意,所以飛咗去外國。」凌御生回答道,「每個月都會飛一至兩次。」
「你屋企有做生意㗎?」夏巧莘有少許驚訝
「係呀…唔係呢?」凌御生有啲無奈咁問道,「我屋企係有黑幫背景,但都有正職做生意。」
凌御生只係話做生意,但卻冇講比夏巧莘知屋企係做酒吧嘅打算


「係呀…」夏巧莘攬住咗個抱枕,然後偷偷望向廚房,望住正在下廚嘅凌御生
心臟突然加快咗跳動嘅速度,夏巧莘望住凌御生嘅眼神再次產生變化,雙眼好似發緊光咁
「識煮飯嘅男人特別charm。」夏巧莘望住凌御生嘅身影甜甜一笑
去到差唔多8點嘅時候,終於煮好飯,夏巧莘行到廚房諗住幫手
「你出去坐低啦~」凌御生雙手搭住夏巧莘嘅博頭,將夏巧莘推到餐枱前,然後拉開木櫈要佢乖乖坐低等食,「呢啲嘢我做得啦~你等食就好。」
凌御生行番去廚房將飯菜拎出嚟,然後坐到夏巧莘對面拎起筷子
「食飯~」夏巧莘望住凌御生甜甜地笑,凌御生嘅心頓時溶化
「試下好唔好食。」凌御生笑了笑,夏巧莘點點頭之後就伸手去夾放中間嘅蕃茄炒蛋,等到夏巧莘將蛋放入口之後,凌御生頓時緊張咁問道,「好唔好食呀?」
「好食!」夏巧莘用力點頭,「你煮得好好食,你都快啲食啦!」
今晚嘅晚餐有蕃茄炒蛋、菠菜同埋煎蝦餅


「我中意食呢個呀!」夏巧莘夾起煎至金黃色嘅蝦餅,「好好食呀!好彩我話今晚要食你煮嘅飯啫~我今晚有口福啦~」
「知啦知啦!為咗你特登一放學就去買嘢煮!」凌御生揚起嘴角,但聽到夏巧莘嘅讚美,心中特別開心,「你啱食就得啦~」
「你煮咩都啱食!」夏巧莘甜笑道
兩個人就好似情侶一樣,女朋友食住男朋友煮嘅飯,一臉幸福
「啱食就食多啲啦~」凌御生望到夏巧莘嘅笑容,心中都覺得好滿足
「將來做你老婆一定好幸福~」夏巧莘特登唔望住凌御生講,選擇咗一邊講一邊夾餸食,「有個識煮飯嘅老公。」
「咁可以煮嘢比自己中意嘅人食都係件好事嚟嘅~」凌御生嘅話似乎有弦外之音
夏巧莘故意冇追問落去,只係甜甜一笑
食完飯之後,凌御生收好碗碟同餐具入廚房,放喺洗手盆之中
「你出去睇電視啦~」凌御生同夏巧莘講道,「我洗嘢得啦~」


夏巧莘笑一笑然後行咗出廳坐低喺梳化繼續睇電視,凌御生瞄一瞄夏巧莘,笑咗一笑之後又再繼續洗碗
凌御生洗完碗之後喺雪櫃拎咗兩罐啤酒,啤酒已經雪到凍冰冰,凌御生拎住佢地行到去夏巧莘背後
「睇咩睇到咁專心呀?」凌御生將兩罐雪到凍冰冷嘅啤酒貼到夏巧莘嘅臉頰上
「好凍呀!」夏巧莘頓時縮咗一下,然後擰轉頭,伸手打凌御生嘅前臂,「凍死啦!」
「邊個叫你咁專心啫!」凌御生行到夏巧莘旁邊坐低,然後開咗一罐遞比夏巧莘
正當夏巧莘伸手想拎嘅時候,凌御生又移開咗罐啤酒,夏巧莘頓時嘟小嘴,鼓起兩泡腮
「你會唔會又飲醉㗎?」凌御生有啲猶疑比唔比佢飲
「你驚呀?」夏巧莘側側頭問嘅同時伸手拎咗罐啤酒
「邊個驚邊個?」凌御生挑起眉反問道,然後開咗另一罐飲咗一啖之後,一臉疑惑咁稍稍提起個罐望,「呢個唔係我地平時飲嗰隻嚟嘅?」
「係呀~係酒吧嗰隻嚟~」夏巧莘點點頭,「冇番工但都係覺得呢隻好飲啲。」
凌御生望到酒精濃度嘅時候無奈咁望咗夏巧莘一眼

IG Link: https://www.instagram.com/nd_cotttoncandy/?hl=zh-tw
回應link: https://docs.google.com/forms/d/e/1FAIpQLScB_-FcIiKv9bnDe_pWTFd9B7sEtdiGEnKZoJeq5rjmK9JUZA/viewform?usp=sf_link