[愛情走糖故]兩個人心底中不為人知嘅秘密,成為兩個人間嘅牽引: 57.她的秘密

呢隻啤酒，凌御生再熟悉不過，畢竟係屋企嘅酒吧購入嘅酒
呢隻啤酒比起其他牌子嘅酒精濃度高啲，簡單嚟講就係會容易啲醉
「但你飲親呢個都會醉到一個點…」凌御生飲咗一啖之後將啤酒放到木茶几上
「有你送我番屋企。」夏巧莘微笑道
當兩個人都飲到開始有啲熱，枱上嘅空罐由0增加到8嘅時候，凌御生伸手拎咗個冷氣制
「有啲熱…」凌御生提住衫領晃咗兩下，然後將個冷氣嘅溫度調低至23度，「你塊面紅撲撲。」
「我冇你咁飲得嘛～」夏巧莘靠住凌御生，伸手戳佢嘅臉頰，「睇下你，你塊面一啲都唔紅…」
「我酒量好過你嘛！」凌御生講道，夏巧莘背對住凌御生坐，稍稍挺起上身，捉住凌御生嘅手臂拉到自己面前，凌御生嘅手放喺夏巧莘嘅鎖骨上，攬住夏巧莘嘅肩位
「凌御生，我講個秘密比你知…」夏巧莘坐好起嚟，將啤酒放喺茶几上，轉身面向住凌御生，一臉認真咁望住佢，「我係個好霸道嘅人嚟…屬於我嘅，以後都係屬於我，冇人可以搶走…」
「你想講啲咩…？」凌御生挑一挑起眉，佢將手上已經比佢飲到一滴不漏嘅啤酒罐放到茶几上，然後側着身坐，手放喺梳化嘅椅背上托住頭，心中自言自語道：「開始醉啦？」


「就係想話…你一旦撩起我嘅霸道心，就唔會收得番…」夏巧莘側着頭，面帶甜美嘅笑容望住凌御生，「你撩完我之後，又去撩其他女仔，咁樣係唔應該㗎～」
「真係唔應該比你飲咗4罐咁多…」凌御生自我反省道，臉上掛上無奈嘅笑容，「我幾時有撩其他女仔呀？」
「你～有！」夏巧莘扁嘴，一副委屈嘅樣子，「如果唔係點會有女仔同你表白呀！」
「我真係咩都唔知㗎…」凌御生搖搖頭，然後一手攬過夏巧莘嘅腰，將佢拉到同自己更近嘅距離，「而且…咪為咗你而拒絕咗囉～」
「哦～你認咗你中意我！」夏巧莘笑道，然後指住凌御生，「你壞壞啦～」
「反正你飲醉咗，去到第二日你都唔會記得我講過啲咩，我宜家認又有咩所謂？」凌御生一臉自信咁講，因為太清楚夏巧莘飲醉咗之後會點，所以佢冇擔心過講比夏巧莘知呢個問題，「我係中意你呀，你敢講你唔中意我？」
「嘻…」夏巧莘笑咗一笑，但好快又扁着嘴捉住凌御生嘅衫領，「最衰就係你，撩起我嘅霸道心…」
「衰嘅淨係我咩？你都撩到我嘅霸道心起啦！」凌御生捏住夏巧莘嘅兩邊臉頰
「我就知道凌御生中意我啦！」夏巧莘一露出甜甜嘅笑容，凌御生嘅心瞬間溶化，「明明中意做咩唔講呀…？」
「你都冇講過你中意我。」凌御生鬆開手，耷低頭望夏巧莘


「你feel唔到㗎咩？」夏巧莘將頭髮翹到耳背，「你等我開口呀？」
「你冇開口，我咪唔開口。」凌御生笑一笑，「我冇自信心令校花中意我嘛～」
「但我中意你…」夏巧莘慢慢坐起身，跪坐喺凌御生面前，右手支撐住成個人，左手慢慢搭喺凌御生喺博頭上
今次凌御生比夏巧莘更快一步，就將夏巧莘緊緊咁攬實，然後低頭就吻
夏巧莘喺凌御生嘅懷中特別乖巧，好似溫馴嘅小貓咪一樣，乖乖咁比凌御生攬住
因為凌御生突如其來嘅主動，令平日飲醉咗會化身小壞壞誘惑人嘅夏巧莘都變得乖巧起嚟
正當兩個人吻得激烈嘅時候，凌御生嘅手機忽然響起，自然咁就避開咗夏巧莘然後拎起放喺茶几上嘅手機
夏巧莘望到係鍾家豪打嚟，凌御生準備接聽嘅時候，夏巧莘伸手捉住凌御生嘅手腕
「唔準聽…」夏巧莘又開始渾身散發出誘人嘅氣息，用有點迷離嘅雙眼直勾勾咁望住凌御生
「聽你嘅…」凌御生揚起嘴角淡淡一笑，然後鎖上手機嘅螢幕，手機冇再響落去，再次攬過夏巧莘繼續未完嘅事



IG Link: https://www.instagram.com/nd_cotttoncandy/?hl=zh-tw
回應link: https://docs.google.com/forms/d/e/1FAIpQLScB_-FcIiKv9bnDe_pWTFd9B7sEtdiGEnKZoJeq5rjmK9JUZA/viewform?usp=sf_link