[愛情走糖故]兩個人心底中不為人知嘅秘密,成為兩個人間嘅牽引: 70.真男人

夏巧莘專心咁聽Miss Li講解同埋舉例，希望用最快嘅時間吸引到最多嘅嘢
「上堂專心，番屋企再溫下書，就可以用最短嘅時間記晒所有重點。」呢句說話，一直都係夏巧莘嘅學習之道
夏巧莘托住頭，低頭望住筆記，視線移向拎住螢光筆嘅手，腦海中突然諗起凌御生
凌御生嘅手總係好溫暖，佢一拖住自己，心中就會有滿滿嘅安全感，咁樣一諗令夏巧莘諗起琴晚失眠嘅原因
琴晚…
夏巧莘喺床上輾轉反側，完全冇辦法安穩咁入睡
一個翻身緊抱住攬枕，以為咁樣會有安全感多啲，就可以快啲瞓着
夏巧莘一時翻身去左邊；一時翻身去右邊；一睡平躺喺床上；一時又趴喺床上瞓，但無論點都好都瞓得唔舒服，總覺得怪怪的
記得喺前一個晚上同凌御生一齊瞓嘅時候，一合埋眼好快就瞓着咗，當然可能因為飲咗酒
「唔通因為凌御生喺度…？」夏巧莘心中默默講道，「唔會掛…」


夏巧莘側身瞓，將攬枕緊緊抱住
明明只係一個攬枕，但夏巧莘卻可以聞到凌御生身上令佢安心嘅氣味
先一齊瞓咗一晚就有「後遺症」啦？
於是夏巧莘成晚就一直轉嚟轉去瞓唔到，最後去到4點幾嘅時候，大概因為對眼同個腦都攰啦所以先瞓著咗，如果唔係，應該去到今朝都冇瞓過
…
夏巧莘回過神來，拎起原子筆，打開筆記簿抄筆記
「上堂嗰陣唔可以諗佢。」夏巧莘喺心裏提醒自己，「一諗佢個人就會outfo…」
另一邊廂
隔離班正上緊數學堂，數學老師係Miss Yu
「凌御生鍾家豪！你兩個唔好喺度顧住傾計唔聽書呀！」Miss Yu望住佢兩個


「有聽書呀！你啱啱講緊第6題嘛！」鍾家豪大嗌出去
「聽到呀我地！」凌御生講道
「凌御生，你同校花拍拖唔代表可以唔洗聽書㗎！」Miss Yu笑一笑講道
「Wu～」班上嘅人即刻就起哄，凌御生似笑非笑咁耷低頭撥一撥頭髮
「但我地唔係拍拖喎～」凌御生抬頭講道
「咁你更加要聽書追上人地啦！」Miss Yu呢個回覆令凌御生無言以對
「Okay你贏。」凌御生無奈咁比咗個Okay手勢
凌御生嘅「投降」，好似暗示咗比大家知佢係中意夏巧莘一樣，雖然事實上，呢個係真嘅
但凌御生只想盡快結束咗呢個話題，避免講多錯多，所以先會直接答「Okay你贏。」
「你好似承認咗你係中意夏巧莘咁。」鍾家豪細聲咁講道


「咁係事實。」凌御生冇用任何解釋，直接承認自己係中意夏巧莘
「哦～呢啲咪真男人囉～」鍾家豪都佩服凌御生讚道，「小弟佩服佩服！」
「係事實嘅嘢冇否認嘅必要…」凌御生講完，記起自己同夏巧莘講佢冇話過佢都中意佢，好似打咗自己嘅臉，唯有無奈一笑
「但係你對當事人否認咗。」鍾家豪一臉無言
「為佢好。」凌御生只係答咗三個字去解釋佢否認嘅原因
鍾家豪有啲唔明白點解要否認，其實可以承認，同時坦白講唔可以一齊嘅原因，佢相信夏巧莘會理解
但既然呢個係凌御生嘅選擇，咁佢相信凌御生嘅選擇係啱，因為凌御生考慮到嘅嘢會更多
凌御生冇專心聽書，只係耷低頭望住放喺櫃桶嘅手機，一直喺度睇IG，突然輕輕一笑
搵到夏巧莘嘅IG名，直接就將嗰個Po文send咗比夏巧莘

IG Link: https://www.instagram.com/nd_cotttoncandy/?hl=zh-tw
回應link: https://docs.google.com/forms/d/e/1FAIpQLScB_-FcIiKv9bnDe_pWTFd9B7sEtdiGEnKZoJeq5rjmK9JUZA/viewform?usp=sf_link