[愛情走糖故]兩個人心底中不為人知嘅秘密,成為兩個人間嘅牽引: 98.她送的第一份禮物

凌御生望到個盒嘅時候呆咗一呆，抬頭望夏巧莘
「上次見你擋刀嘅時候，你戴開嗰隻DW爛咗，所以買咗隻新嘅比你…畢竟係因為我…」夏巧莘臉頰突然泛紅起嚟，「你打開睇下中唔中意…」
凌御生回過神來，將盒子拎到自己面前打開盒蓋，喺皮質嘅底托上放咗一隻錶，係36mm白底，金邊深啡帶嘅Classic Bristol，錶上仍然綁住個牌
DW嘅手錶從來都唔平，呢隻錶嘅價錢差唔多$1700，所以凌御生見到個盒嘅時候就已經一臉愕然
呢隻錶同本來凌御生戴嘅DW唔係一樣，凌御生本來戴嗰隻係40mm黑底，金邊黑帶嘅Classic Sheffield
「隻錶好貴，你屋企唔係急要錢㗎咩？」凌御生望住夏巧莘
「宜家媽媽嘅情況好咗好多，而且之前番工有錢剩咗…」夏巧莘心中正擔心緊凌御生係咪唔中意隻錶，「你係咪唔中意呀…？」
「唔係。」凌御生笑一笑搖搖頭，「你送咩我都中意。」
「咁就好啦～」夏巧莘頓時鬆一口氣，「快啲戴嚟睇下～」
凌御生拎起手錶拆咗個掛牌，準備將手錶戴上手腕嘅時候停下動作


「做咩呀？」夏巧莘疑惑咁望住佢
「你送比我，唔係應該你幫我戴埋咩？」凌御生將手錶遞比夏巧莘
夏巧莘沒好氣咁笑咗一笑，然後接過手錶，凌御生伸出左手，夏巧莘將手錶扣上，戴喺凌御生嘅手腕上
「你中意㗎可？」夏巧莘再三確定，好怕佢唔中意隻錶
「中意呀！」凌御生笑起嚟，呢刻嘅佢特別開心，因為佢中意嘅人買咗份禮物比佢，而且佢中意嘅人連佢手上戴咩手錶都留意到，「我會戴住佢㗎啦～多謝！」
夏巧莘低頭笑着，笑而不語，再次拎起原子筆
「做功課啦！」夏巧莘笑一笑，然後低頭繼續做功課
凌御生將錶盒放入書包入面，然後拎起原子筆，望住戴喺手腕上嘅手錶心中特別甜，因為係夏巧莘送比佢嘅第一份禮物
以後戴住呢隻錶都會覺得特別甜，心中都會喜滋滋的
「咔嚓…！」大門突然打開，夏學謙番嚟啦


夏巧莘，凌御生同時望向門口，剛進門嘅夏學謙手上拎住一袋二袋咁行入嚟，望到屋企突然多咗個人嘅時候呆咗一呆，但咩都冇講就除咗鞋行去廚房放低啲餸
凌御生有啲愕然，夏巧莘冇講啲咩，只係微微一笑
「你今晚喺唔喺度食飯呀？」夏巧莘細聲問凌御生
「你細佬唔介意咩？」凌御生細聲問道
「咁你喺唔喺度食啫？」夏巧莘再次問道，心中其實想凌御生留低食飯
「可以呀～」凌御生微微一笑道
「夏學謙！」夏巧莘大嗌，夏學謙著住居家服喺睡房行出嚟
「咩呀？」夏學謙依舊淡然
「今晚佢會喺度食。」夏巧莘講道，完全係家姐命令細佬嘅語氣再講道，「我想食煎雞翼。」
「嗯。」夏學謙嗯咗一聲，然後坐喺梳化，拎起電視遙控開電視睇，但較細咗音量


夏學謙看似對凌御生冇咁反感，雖然心中仍然唔太中意佢，但係諗到係家姐中意嘅人，就自然咁唔出聲
…
另一邊廂，一個男人坐喺一間房入面，房間中只亮了枱燈，男人嘅手中拎住一把手槍
「嚟緊下一步，大哥你諗住…」手下企喺枱前面恭敬咁問道
「我諗緊…有冇咩更有趣嘅事可以令佢地更難受…」男人咧嘴笑起嚟，把玩着手中嘅手槍

IG Link: https://www.instagram.com/nd_cotttoncandy/?hl=zh-tw
回應link: https://docs.google.com/forms/d/e/1FAIpQLScB_-FcIiKv9bnDe_pWTFd9B7sEtdiGEnKZoJeq5rjmK9JUZA/viewform?usp=sf_link