[愛情走糖故]兩個人心底中不為人知嘅秘密,成為兩個人間嘅牽引: 141.我是閒人嗎！？

翌日朝早，凌御生喺番學之前食咗一支煙先出門口，搞到渾身都係煙味
「琴晚一食咗支，煙癮又起…」凌御生喺心中抱怨道
凌御生番到學校嘅時候見到夏巧莘，但夏巧莘看似有意避開佢，一見到佢就頓時微微耷低頭，然後喺佢身邊直接行過
凌御生番到課室一坐低，鍾家豪即刻就痴過去搭住佢博頭
「琴日語氣重咗Sor，但我都係想你諗清楚咋～」鍾家豪講道
「得啦，一世人兩兄弟，道咩歉。」凌御生揚起嘴角，然後伸出拳頭同鍾家豪碰拳
「下個星期就Music Week，你加油啦～」鍾家豪拍一拍凌御生博頭
「當然。」凌御生笑一笑，但心中始終有啲擔心
去到
「唔洗擔心喎，一定okay！」鍾家豪鬆開手，將張櫈移番過去自己個位前，「佢一定接受。」


「我怕佢仲嬲緊我咋…」凌御生講道
「唔會嘅～」鍾家豪安慰道，「一時間㗎啫～」
「希望啦…」凌御生無奈咁點點頭
上堂嘅時候，凌御生出咗去去洗手間，咁啱夏巧莘喺女洗手間行出嚟
夏巧莘見到凌御生迎面而嚟，心中仍然伸有啲唔開心，所以刻意迴避視線唔同佢對上眼
「佢仲嬲緊我？」凌御生心諗
凌御生見夏巧莘又想急急腳行開，一下子就伸手拉住佢
「喂…！」夏巧莘低聲嗌咗出嚟
「你仲嬲呀？」凌御生即刻變咗小奶狗一樣溫和起嚟
「冇。」夏巧莘回答


「咁你做咩唔覆我whatsapp，電話又唔聽？」凌御生皺起眉頭問道，「你避我？」
凌御生都知自己係明知故問，但比起佢心知，佢更想從夏巧莘口中得到答案
凌御生琴晚之前都有whatsapp過夏巧莘同佢道歉，希望夏巧莘原諒佢，但係去到今朝早番學之前，夏巧莘都冇回覆
「唔係…」夏巧莘微微低頭，唔敢抬頭望凌御生
「你仲話唔係避我？」凌御生將夏巧莘用力一拉，拉到自己面前
「喂！其他人仲上緊堂㗎…你放開我呀…！」夏巧莘想要掙脫，但凌御生緊緊咁捉住夏巧莘嘅手腕，夏巧莘點都甩唔開佢隻手
「夏巧莘，我話你知，你避唔到好耐㗎咋！」凌御生決定先嚇一嚇夏巧莘，希望佢快啲屈服唔好鬥氣
「係你唔要我㗎！」但睇嚟夏巧莘完全冇屈服嘅意思，「你當我咩呀？要嚟就嚟要走就走！我係閒人呀宜家？」
凌御生第一次見夏巧莘咁樣反駁佢，睇嚟夏巧莘今次係真心嬲，唔會咁輕易就原諒凌御生
「放手！」夏巧莘用力甩開凌御生隻手，然後頓時轉身往課室行番去


凌御生企喺原地，苦惱咁撥着頭髮
「我唔氹番你，我就跟你姓！」凌御生望住夏巧莘匆忙番課室嘅背影喺心中吶喊道
夏巧莘番到課室喺自己個位坐低，心中不高興，臉上無表情咁低頭繼續寫筆記
「死人凌御生，死人凌御生！等你仲覺得我好好恰呀嗱！」夏巧莘喺心中罵道，隻手郁得好快咁抄筆記，「等你仲推開我呀嗱！話埋比你知我唔介意仲推、開、我！」
夏巧莘喺心中一直抱怨，但唔開心都好，嬲都好，都係在乎一個人嘅證明
佢嬲凌御生，證明佢真係真心中意凌御生，並非講下就算
去到午膳嘅時候，夏巧莘為咗避開凌御生，故意唔去天台食飯
「難得你今日喺呢度食飯啵～」嘉怡去完小食部番嚟，見到夏巧莘仲坐喺課室，頓時就行過嚟倜侃一番
「咩呀…」夏巧莘沒好氣咁抬眼望咗嘉怡一眼就繼續低頭食飯
「啱啱我見佢同鍾家豪落咗小食部。」嘉怡瞄咗夏巧莘一眼偷笑道
夏巧莘聽到「佢」嘅時候，成個人都愣咗一下，但假裝冇事咁繼續食飯

IG Link: https://www.instagram.com/nd_cotttoncandy/?hl=zh-tw
回應link: https://docs.google.com/forms/d/e/1FAIpQLScB_-FcIiKv9bnDe_pWTFd9B7sEtdiGEnKZoJeq5rjmK9JUZA/viewform?usp=sf_link