[愛情走糖故]兩個人心底中不為人知嘅秘密,成為兩個人間嘅牽引: 142.你真的很煩人，很討厭

「哦…」夏巧莘敷衍咁哦咗一聲就算
「你咁嘅反應嘅？嗌交啦？」嘉怡見到夏巧莘嘅反應不禁有啲疑惑
「冇呀…」夏巧莘淨係耷低頭望住個飯盒
「好期待下個星期嘅Music week呀～」嘉怡突然滿臉期待咁講
夏巧莘冇咩大反應，淨係專心食飯，連頭都唔想抬起
「關我咩事啫…Music week每年都有㗎啦…」夏巧莘喺心中默默講道
宜家無論有咩事發生都好，就算係世界末日都好，都未必可以引起夏巧莘嘅興趣
「唔知今年會點呢～今個聖誕節係我地中六最後一個喺學校嘅聖誕節啦…」嘉怡有啲悶悶不樂
夏巧莘這才抬起頭，唔講都差啲唔記得咗今個聖誕係畢業聖誕，中六嘅生涯都要完結啦…聖誕之後就係畢業考試
「唉…邊有心情溫書呀…」夏巧莘企起身行出去將飯盒掉喺黑板前嘅飯箱中，「唉…一到咗Study leave嘅話，就唔可以好似宜家咁成日都見到凌御生啦…」


夏巧莘一諗起凌御生，呢頭先覺得因為冇得成日見住佢唔開心，轉個頭心中又開始無名火起
「唔係囉！佢嘅事關我咩事呀！係佢唔要我呀宜家！係佢走寶呀！關我咩事呀！佢先係嗰個要覺得傷心嘅人！」夏巧莘喺心中不忿咁大聲道
喺小食部，鍾家豪同凌御生啱啱買完嘢飲打算番上課室
「你做咩咁燥底啫？你氹唔掂佢咩？」鍾家豪感覺到來自凌御生嘅低氣壓
「一講佢就燥，的確係我唔啱嘅，但佢宜家擺明避開我啫！」凌御生皺起眉頭，「佢明顯係避緊—」
「呢個咪凌御生同佢嘅跟班？」
有人打斷咗凌御生講嘅嘢，由不遠嘅地方行過嚟，呢個人，就係嗰個每次一開口就會比凌御生打嘅人－－劉子勤
「你係咪上兩次未比人打夠啫？硬係要喺度撩交打㗎喎。」鍾家豪睇唔過眼開口道
「做咩啫宜家？我就係中意撩你呀～你咪打我囉，大家一齊記過囉～」劉子勤一張討厭嘅嘴臉，令本來已經燥底嘅凌御生更燥
「唔好理佢，番上去先啦。」鍾家豪怕凌御生又出手打劉子勤，即刻就開口講，希望快啲離開現場，如果唔係又要比人記過


凌御生都唔想理劉子勤，就同鍾家豪一齊行，無視劉子勤直接喺佢身邊行過
「最近做咩唔同校花一齊嘅？挽厭咗啦？」劉子勤死心不惜，故意挑釁凌御生，因為佢知道凌御生嘅底線就係夏巧莘
果然，不出劉子勤所料，凌御生頓時停低咗
「大獲啦…」鍾家豪心中知道今次睇嚟又要出事
「我同夏巧莘嘅事，到底關你咩事？」凌御生緩緩轉身，一臉不爽地面向劉子勤，「同你有關係咩？」
「咁你同校花嘅關係咁密切，個個都想知㗎啦～」劉子勤嬉皮笑臉咁大聲道，令小食部嘅人都朝住聲音望向佢地
「定係你妒忌呀？你溝唔到但我溝到。」凌御生故意嘲笑
「哼！洗妒忌你？你單戀人地咋？單戀就當相戀。」劉子勤不忿地笑道
「你中意夏巧莘咩？」凌御生望住劉子勤問道，但未等劉子勤回答，凌御生又笑道，「係喎，你中意過佢，可惜呀～你唔係人地杯茶。」
「哼…」劉子勤冷笑一聲，向凌御生走近咗一大步，「夏巧莘呢啲女仔，唔通會中意你？咪傻啦，佢挽你咋～」



IG Link: https://www.instagram.com/nd_cotttoncandy/?hl=zh-tw
回應link: https://docs.google.com/forms/d/e/1FAIpQLScB_-FcIiKv9bnDe_pWTFd9B7sEtdiGEnKZoJeq5rjmK9JUZA/viewform?usp=sf_link