[愛情走糖故]兩個人心底中不為人知嘅秘密,成為兩個人間嘅牽引: 162.你的心情等於我的心情

「係啦係啦！差唔多早會啦，落去啦！」夏巧莘無奈笑起嚟

去到午膳時間嘅時候，夏巧莘拎好飯就等鐘聲響起

鐘聲一響，夏巧莘就執好嘢踏出課室，但唔見凌御生

夏巧莘行去隔離課室，凌御生坐喺課室入面，凌御生正耷低頭執緊櫃桶啲嘢

「你女朋友喺出面。」鍾家豪拍咗凌御生一下



凌御生頓時抬頭望向外面，見到夏巧莘企咗喺度對住佢微微一笑，凌御生對住夏巧莘招手，叫夏巧莘入嚟課室

夏巧莘點一點頭，然後就向住門口行，才剛踏入課室，其他男仔下意識望向夏巧莘，夏巧莘有啲唔好意思咁微微低頭，行到凌御生面前

「坐。」凌御生指一指佢前面個位

夏巧莘有啲猶疑，本來坐呢個位嘅人會唔會突然番嚟

「坐啦，佢比人罰留堂，唔會咁快番嚟。」凌御生察覺到夏巧莘嘅猶疑便開口講道，夏巧莘聽到之後先斯文咁坐低



「你地唔洗食飯？」夏巧莘望一望凌御生同鍾家豪空空如也嘅枱面

「點會～」凌御生喺櫃桶拎出一早買咗嘅外賣lunchbox

「啱啱先放飯咋喎…你幾時買㗎？」夏巧莘疑惑咁望住凌御生

「你呢啲小乖乖唔會知道～」凌御生同鍾家豪對望咗一眼，然後默契地笑了笑

夏巧莘望住佢兩個，無奈咁笑咗一笑



「有時做壞學生都有好處，不過你咁乖，就費是教壞你啦～」凌御生打開個飯盒嘅蓋

「但我都想知你點買喎～」夏巧莘望住凌御生個飯盒，抬眼望凌御生甜美地笑起嚟

「只係叫我老豆買完之後，我喺落堂之前扮去廁所，落去下面後門拎，等到夠鐘就上番嚟。」凌御生對於整個流程好熟悉，明顯地係慣犯

「仲要幫我買埋添～」鍾家豪一邊講一邊拆開餐具嘅包裝袋

「叔叔又會肯幫你買嘅？」夏巧莘打開飯壺，有啲唔好意思咁細聲講道，「唔通叔叔唔知你咁樣會犯校規？」

「噗…」凌御生同鍾家豪都笑咗出聲，凌御生無奈又好笑咁講，「我老豆點會唔知咁樣會犯校規呀？」

「阿生宜家日日都番學，叔叔開心都嚟唔切啦！」鍾家豪講道，然後食咗啖飯

「所以我爸好中意佢。」凌御生一臉自豪咁對鍾家豪講道



「我知～你老豆就嚟叫你直接娶埋佢番屋企添～」鍾家豪笑住咁望向夏巧莘

夏巧莘聽到鍾家豪講嘅嘢，有啲怕羞咁耷低頭

凌御生托住頭望住夏巧莘，木筷子夾着餸放入口中，凌御生嘅嘴角稍稍揚起

「你望住我做咩…」夏巧莘假裝咩都唔知咁問道，完全就係明知故問

「你可愛嘛～」凌御生講道，「你不嬲都咁可愛㗎啦～」

「又閃…」鍾家豪坐喺隔離一臉無奈，「又閃我…」

凌御生同夏巧莘同時望向鍾家豪，鍾家豪企起身嘅時候又望向兩人，然後無奈咁嘆氣一聲，然後搖搖頭，然後行出去掉空飯盒



「傻妹…」凌御生伸手摸一摸夏巧莘嘅頭

其他人嘅眼裏全是羨慕，凌御生對夏巧莘好好，明明女神呢樣嘢係可遠觀而不可褻玩，但係凌御生卻得到所有人眼中嘅女神，而明顯地，凌御生對夏巧莘嘅真心係無可否認

凌御生心裏希望夏巧莘同咗佢一齊之後會一直開心落去，或者自己比唔到世上所有嘅幸福同快樂佢，但佢可以盡佢嘅能力比到夏巧莘應有嘅開心同快樂

只要夏巧莘一直開心就好，因為夏巧莘對凌御生而言係重要嘅一塊，夏巧莘開心，佢就開心；夏巧莘難受，佢比夏巧莘更難受，所以佢盡量令夏巧莘開心就好啦

夏巧莘甜甜地筷起嚟，然後又繼續耷低頭食飯

「你聽日同鍾家豪要去邊呀？」夏巧莘突然問道，此時鍾家豪剛好喺夏巧莘嘅身後聽到夏巧莘嘅話

「嗯，我聽日約咗你嘛。」凌御生同鍾家豪對望着，然後點一點頭，「咪話咗比你知囉。」

「哦…係呀。」鍾家豪瞬間明白要配合凌御生，夏巧莘轉身望向鍾家豪，鍾家豪聳聳肩，「阿生唔比我講。所以我唔可以講你知啦～」



「嗯哼～」凌御生同鍾家豪對望笑了笑


最 後 倒 數 4 集

IG Link: https://www.instagram.com/nd_cotttoncandy/?hl=zh-tw

回應link: https://docs.google.com/forms/d/e/1FAIpQLScB_-FcIiKv9bnDe_pWTFd9B7sEtdiGEnKZoJeq5rjmK9JUZA/viewform?usp=sf_link