[愛情走糖故]兩個人心底中不為人知嘅秘密,成為兩個人間嘅牽引: 163.課餘活動

放學嘅鐘聲響起，凌御生執好嘢之後喺夏巧莘嘅課室門口待着

「我得啦～」夏巧莘一蹦一跳地行出課室，行到凌御生面前，「行啦～」

見到夏巧莘開心咁笑，凌御生都不自覺地揚起嘴角

兩個人搭巴士番屋企，夏巧莘一上到車坐低，即刻就痴住凌御生

「即刻就痴住我啦？」凌御生望向靠喺自己博頭上嘅夏巧莘，輕輕地拖住夏巧莘嘅手，喺夏巧莘嘅頭髮上溫柔地落下一吻



夏巧莘嘅秀髮嘅香味傳到凌御生嘅鼻中，夏巧莘總係香噴噴的

「痴你唔好咩？」夏巧莘用撒嬌嘅聲線反問道

「好～梗係好㗎。」凌御生笑着回應道，「你痴我當然好～」

夏巧莘將凌御生當成自己嘅依靠，縱使喺心中仍然有一絲害怕，怕凌御生有一日又會離自己而去

一諗到呢度，夏巧莘不自覺地用力捉緊咗凌御生嘅手



「做咩呀？」凌御生溫柔地問道

夏巧莘抬頭，同凌御生嘅視線對上了，夏巧莘微笑着輕輕搖頭

落咗車之後，凌御生陪夏巧莘一齊行番屋企

夏巧莘耷低頭望住自己比凌御生拖住嘅手，凌御生嘅手好大好溫暖，宜家終於都可以光明正大咁拖住凌御生嘅隻手，心情突然就愉悅起嚟

「我地聽日見啦～」夏巧莘抬起頭望凌御生，兩人停喺大堂嘅玻璃門前，「你番到去要同我講呀！」



「知啦～」凌御生乖乖地點頭，「我番到去會搵你㗎啦！」

「好啦，拜拜～」夏巧莘啲依依不捨地道別，然後轉身行入大堂

凌御生依舊喺外面等着，直至夏巧莘行到去入面先轉身離開

番到屋企之後，凌御生第一時間係拎起手機Whatsapp夏巧莘，話佢知已經番到屋企，報個平安

「夾起個夾先。」凌御生喺書包拎咗個調音夾出嚟，拎住行入房，喺放結他嘅支架上拎起結他，然後將本來夾喺結他上嘅調音夾拆咗落嚟，換咗夏巧莘送嘅調音夾上去

凌御生將本來嘅調音夾放咗結他袋嘅前隔入面，然後拎起結他坐喺床邊彈着

夏巧莘番到屋企之後，第一時間係同夏學謙一齊坐喺書枱前做聖誕假期嘅功課

光線從外面穿入嚟照到屋內，姊弟兩坐喺餐枱前一齊做功課，呢個係佢地兩個最有默契嘅地方



「呀…好多Past paper要做呀…」夏巧莘口在抱怨，但手卻冇停落嚟

「咁你今年考DSE啦嘛。」夏學謙平淡地講道，望一望教科書，又掀一掀筆記，然後又低頭寫起嚟，「假期約佢一齊溫書囉。」

夏學謙不經意咁講，夏巧莘有啲愕然地抬起頭望向夏學謙，夏學謙仍然專心咁做緊功課

「你唔係唔中意佢㗎咩？」夏巧莘問道，眼睛偷偷瞄咗夏學謙一眼，留意佢嘅表情

「咁你中意佢嘛。」夏學謙依舊淡然地講道

曾經夏學謙的確唔中意夏巧莘，佢怕凌御生會帶壞夏巧莘，但被影響嘅人似乎唔係佢一直保護嘅家姐

上一次夏巧莘身陷險境，凌御生去救佢，本來夏學謙以為係因為一半責任，一半感情



但喺過程中，夏學謙才察覺到，原來係八分感情兩分責任，凌御生對夏巧莘嘅態度，佢亦睇得出

夏學謙知道，亦明白，凌御生對夏巧莘嘅感情係認真，所以都默默咁接受佢嘅存在，畢竟係夏巧莘中意嘅人…

「咁就好啦～」夏巧莘心中嘅開心毫無保留地掛到臉上,「你接受就好啦～」

夏學謙抬頭，見到夏巧莘開心咁笑起嚟嘅時後，夏學謙不禁露出淡淡嘅微笑

做功課係兩人一整天嘅活動，一直坐喺位做功課做到夜晚點幾

「嘩咁樣做功課真係會死…」夏功莘望住放喺枱面，寫滿字嘅past paper，「做晒啦…」

夏學謙企喺度執緊嘢，將啲功課疊好，然後拎留入房

「唔知凌御生做緊咩呢？」夏功莘諗起凌御生，心中難免會有啲掛住佢



但拎起手機一睇，凌御生又冇搵佢，心中又有啲小失落

「唔通佢忙緊…？」夏巧莘望住手機冇通知顯示嘅螢幕，「佢忙完應該就會搵我㗎啦…」

凌御生此時仲練緊結他，其實已經練好，但佢要追求完美，聽晚嘅表演對凌御生嚟講好重要

除咗係佢對夏巧莘嘅表白之外，仲係鍾家豪佢地三個犧牲咗表演嘅機會讓比自己，佢地咁支持自己，凌御生又點可以比聽日嘅表演出一絲錯誤？

放喺枱上嘅手機一震，凌御生放低結他拎起手機一望，心頓時暖暖的


最 後 倒 數 3 集

IG Link: https://www.instagram.com/nd_cotttoncandy/?hl=zh-tw



回應link: https://docs.google.com/forms/d/e/1FAIpQLScB_-FcIiKv9bnDe_pWTFd9B7sEtdiGEnKZoJeq5rjmK9JUZA/viewform?usp=sf_link