《毒L和初戀相識的日子》: 第五十三章 不知不覺

第五十三章 不知不覺

一個星期之後，又到星期一。我同Winnie一如以往，朝早喺樓下等，再一齊番學。

嚟到十一月，氣溫跌到得番廿零度。我都要着番件外套，而怕凍嘅Winnie都係。

「今日都幾涼吓。」Winnie話。

「就快冬天嘛。」我回應。



「唉，又要攞番啲褸出嚟。」

「妳好怕凍㗎咩？」

「係呀，冬天戈時着完羽絨仲要載多條頸巾，同埋手套。」

係喎，Winnie 12月10號生日，仲有一個月鬆啲，都差唔多要準備喇。經過上次David親手織咗條頸巾送比Zoe做生日禮物，我都決定有樣學樣。

「又會咁怕凍嘅。」



「係呀，瞓覺都要兩張被先夠暖。」

「我就反而唔太怕凍，哈哈。」

我地番到I大，入到課室，阿Paul、晴晴、阿俊、Jenny、家怡同Chirsty喺度討論緊星期日去塔門嘅事。

「咦，你地番嚟喇。」晴晴向我地講。

「我地傾緊星期日，每個人負責整啲咩嘢食，廢事撞。」阿Paul講。



「我諗住整三文治，Jenny就想整壽司卷。」阿俊同大家講。

「而我就想整沙律，晴晴就想整蜜糖雞翼。」阿Paul同大家講。

「So good. 而我就想焗曲奇餅。」家怡同大家講。

「咁我就想整小型嘅朱古力蛋糕。」Chirsty同大家講。

「咁你地呢？」晴晴問。

其實我一早就忘記咗呢件事，所以我根本未決定整咩。

「我同男班長會一齊整一樣嘢，到時你地就知係咩。」Winnie突然對大家講。

我諗係Winnie見倒我迷惘個樣，再決定幫我解圍。



「嘩，兩個人一齊整呀？洗唔洗咁閃呀？」Jenny驚訝地講。

「係囉，兩個真係有啲嘢咁喎。」阿俊和應Jenny。

「好嘢喎，Joseph哥。」阿Paul奸笑咁對住我講。

「Wow！真係恭喜哂你地。」家怡同我地講。

「期待你地嘅作品呀，男女班長。」Chirsty都加埋把嘴落嚟。

而我同Winnie就笑而不語。

「真係頂你地唔順。」晴晴諷刺地講。



「仲有到時會玩一啲小遊戲，我同Winnie已經設計好，大家到時就會知玩咩。」晴晴補充。

傾到呢度，梁sir就入咗嚟。到放break戈時，Winnie拉咗我出班房，話有嘢同我講。




不知不覺已經番咗兩個月I大，亦都代表識咗妳兩個月。