第五十四章 動力

「做咩拉我出嚟?」我好奇地問Winnie。

「頭先幫你解咗圍,仲唔多謝我?」Winnie瞪大雙眼同我講。

「係嘅係嘅,多謝妳囉。」我敷衍地回應。

「咁你想整咩食呀,男班長?」Winnie打咗我一吓個心口。



「嗯,我冇所謂呀。」

毒L又點會有所謂吖。

「又冇所謂。唔得喎,今次一定要你話事,最多就一齊整。」Winnie堅決地對我講。

「好啦,你比我諗吓先,放學答妳ok?」我無耐地講。

「你唔好走數呀。」Winnie轉身番去課室。



Lunch之後係今個sem最後一堂全人發展,Billy sir安排咗我地睇一套電影,係關於打欖球嘅西片。內容係講黑人同白人之間唔應該有歧視。

到放學,阿俊同Jenny走埋嚟。

「你地記得聽日戈科有個project㗎可?」Jenny問我同Winnie。

「記得呀,我今晚send啲料比妳。」我摸著頭回應。

「我都會盡快比妳。」Winnie望完我一眼之後回應。



「咁又唔洗咁急,兩個星期之後先交,你地慢慢嚟啦。」Jenny笑住咁講。

「好彩唔洗present,淨係交Report姐。」阿俊回應。

「係囉。」我回應。

「咁我地走先喇,聽日見啦,拜拜。」阿俊同我地講。

「拜拜。」

之後我同Winnie都行出課室。

「男班長,你最後決定係咩,整咩食?」Winnie突然問。

我估唔到佢竟然咁好記性。



「不如整個自製pizza?」我突然靈機一觸。

「好主意喎。我識整呀,高中戈時試過整一次。小型嘅pizza好易整姐,整兩個。」Winnie驚喜地回應。

「係就好喇,我唔識整㗎。」我苦笑地回應。

「好易整姐,到時一齊整囉。」Winnie回應。

「咁不如星期日朝早整,整完就出發?」

「可以呀。約咗十二點去馬料水碼頭等,我地九點開始整,我早一日會整咗麵團先。」Winnie講。

「咁幾時買材料?」我問。



「星期五放學之後吖,你ok㗎可?」

「嗯。」

我地搭巴士番到屯門,落車之後一齊行番去。

「係呢,上次比你戈樣嘢,你有冇收好?」Winnie突然問。

雖然我記性唔好,但我都知Winnie講緊咩。

「緊係有,放咗入個相架喇。」我回應。

「算你啦。」Winnie滿意地講。

我地喺地下大堂分別。



我番上屋企,突然醒起要開始織條頸巾,喺Winnie生日戈時送比佢。屋企有毛冷喺度,係白色嘅。

嘗試上網搵教學,之後就開始落針喇。搞咗一大輪都唔知點搞,於是就請教我老母。

一開口問就比佢串,問我做咩咁有動力去學呢啲嘢,肯定係送比女仔啦。而我都冇否認。

經過我老母悉心教導,我已經掌握倒個技巧,不過距離完成都仲有好長嘅路,所以我決定每日都織少少。

希望到時妳唔會嫌棄我呢份禮物啦。








因為妳,先有動力去做。
已有 0 人追稿