《毒L和初戀相識的日子》: 第五十五章 準備

第五十五章 準備

話咁快已經到星期五。今日番到I大係上英文堂，又係練speaking。

「你啲英文進步咗好多喎。」阿俊喺練習完之後同我講。

「係呀，之前有人幫我惡補吖嘛。」我望望Winnie，再微笑地回應。

「咁考試就靠你地喇。」阿俊同我地講。



「一齊加油啦。」Winnie回應。

「星期日十二點馬料水碼頭等，搭半開船，唔好遲到呀。」晴晴行過嚟同我地講。

「收倒。」

放學之後，番到屯門，我同Winnie去咗百佳超市買整pizza嘅材料。Winnie專登寫咗個list，有麵粉、芝士碎、菠蘿粒、火腿同埋粟米粒。其他調味料Winnie屋企都有。

我地一路行番去，一路傾計。



「男班長呀，咁我聽日自己整咗個麵團先，你星期日朝早九點落嚟我度一齊整埋其他步驟？」Winnie問我。

「好阿，不過妳屋企人...」我回應。

「唔洗驚喎，戈日屋企冇人呀。」Winnie打斷咗我講嘢。

「好啦，咁我落嚟之前Whatsapp咗妳先啦。係呢，妳諗住帶咩去？」

「我同晴晴準備咗啲小遊戲同大家玩，我會帶D遊戲用品去，另外都係冇乜特別嘢要帶。同埋阿Paul同晴晴會帶埋飲品比我地。」



「好呀，唔知我地八個人玩啲咩呢？」我好奇地問Winnie。

「秘密。你到時就知啦。原本十個人㗎，不過Zoe同David都唔得閒。」

「咁神秘㗎。」我無奈地回應。

我地行到去地下大堂。

「咁星期日見喇喎。」

「嗯，拜拜喇男班長。」

我番上去，就拎個袋出嚟執嘢。帶啲咩呢，有啤牌、餐具、尿袋+充電線、紙巾同水樽等等。比較特別嘅，係我特登準備咗個急救包，以防萬一。

跟住，我繼續開始織條頸巾。估計大約月尾就應該可以完成。








這躺旅程，我已經準備好了。