《毒L和初戀相識的日子》: 第五十八章 塔門之旅(三)

第五十八章 塔門之旅(三)

今次大家嘅焦點都喺Winnie度。

「你地想問咩呀？」我問大家。

「Winnie問啦~」晴睛望向Winnie講。

「係囉~」阿Paul回應。



大家都望向Winnie度。

「好啦。其實我有一個問題想問咗男班長好耐。」Winnie面向我講。

「咩問題？」我問。

「你遇過最驚險嘅一件事係咩？」Winnie問。

好彩Winnie幫我解圍，如果其他人實問啲好尷尬嘅問題。



「最驚險嘅嘢呀，嗯。早幾年試過坐昂秤360個纜車，去到中途停咗十幾分鐘。啲風吹到㗎纜車搖嚟搖去，好驚會跌落去。好彩最後郁番。」我對大家講。

大家都對我呢個經歷冇乜反應。

「好啦，咁你抽下一個。」Winnie同我講。

「好。下一個係阿俊。」我回應。

「問啦。」阿俊對大家講。



Jenny示意要問。

「你第一次送咗份咩禮物比我？」Jenny問阿俊。

我唔明，點解啲女仔咁中意問呢啲問題，我真係唔明。

「吓，咪電話殼囉，妳唔係以為我唔記得掛。」阿俊回應。

之後，家怡、Chirsty同Jenny分別都抽中多一次，不過啲問題都冇乜特別。

「跟住落嚟大家休息十分鐘先，我同阿Paul要準備下一個遊戲:尋寶遊戲。一陣我地會將六個信封，入面寫咗個數字，代表分數。」

「我地會分別放喺附近嘅地方，大家兩個一組咁搵啦，限時十分鐘。贏咗獎品係呢盒朱古力，係我朋友去完日本買嘅。」晴晴同我地講。

之後晴晴同阿Paul就去收埋啲信封。



十分鐘之後遊戲開始，我當然係同Winnie一齊搵啦。我地沿小路落去，果然發現草地上有個信封，寫住「1000」。

我地再去到間廟附近，又發現另一個信封，寫住「1500」。

之後我地沿路行番上去，就夠鐘喇。

「好，結果係每組都搵倒兩封，我報分先。」

「家怡組1500分、Jenny組2000分、Winnie組2500分，恭喜你地。」晴晴對大家講。

估唔到咁易贏。

Winnie好開心咁接收咗盒朱古力。



時間得番少少，我地最後嘅活動係影一張大合照。我地喺草原嘅一個位，晴晴請咗個都係遊客嘅女仔幫我地影相。

「咔嚓」

一張相片，留低嘅係珍貴嘅回憶。

而時間都差唔多喇，要離開呢片寧靜嘅地方，又再重返煩囂嘅市區。

我地搭咗17:30戈班船番去馬料水碼頭，再行去大學站，亦都代表今次嘅離島之旅正式結束喇。








經過今次嘅旅程，大家嘅關係又再熟落咗。