《毒L和初戀相識的日子》: 第七十一章 考試

第七十一章 考試

話咁快今日係1月8號第二科嘅考試，喺禮堂考兩粒鐘，時間係下晝二至四。

開考之前，我同Winnie喺禮堂出面啲版睇吓自己坐邊。之後，就再睇多兩眼啲筆記。

幾分鐘後，禮堂嘅門打開咗，我地就入去考試喇。I大考試有個規距，開考頭三十分鐘同最後十五分鐘係唔比走嘅，所以我同Winnie都約定咗一齊坐到最後先走。

我坐前排第二個位，時間到就開考。不知不覺好快已經到四點，收卷之後就行出禮堂喇。



「你考成點呀，男班長~？」Winnie出到去之後問我。

「都ok吖，合格有突啦~」我回應。

同一時間，我發現阿Paul、晴晴、阿俊、Jenny、家怡同Chirsty等人原來已經一早走咗。我坐好前所以睇唔倒。

「咁不如我地聽日去慶祝吓啦，都考哂試咯~」Winnie講。

「好呀，咁妳想去邊度慶祝？」



「不如... 其實我由細到大一直都想去一次海洋公園，不過到依家都未去過呀...」Winnie惋惜地講。

「咁就聽日去囉~ 不如叫埋阿Paul同晴晴佢地吖？」

「人地淨係想同你去咋。」Winnie啤住我講。

咁又係，我地嘅關係今時唔同往日。

「好呀，咁我地兩個去，拍... 拍吓拖囉。」我口窒窒地回應。



「算你啦~」Winnie甜笑。

我地拖住手咁行去搭巴士番屋企。喺巴士上，Winnie挨住我膊頭瞓，直到番到屯門。

「醒喇~」我拍醒Winnie。

Winnie矇矇矓矓地睜開眼。

落車之後，我地行番到屋企地下大堂。

「咁聽日約幾點~？」我問Winnie。

「十點樓下等啦，好唔好~？」

「好呀~」



此時，Winnie有Lift先。

「咁我上去先喇，聽日見啦~」Winnie對我講。

「聽日見~」我回應。

我十分期待聽日嘅來臨。





人生有好多個考試，例如學校嘅考試、駕駛考試、證書考試等。不過，其實拍拖都可以當成一場考試，成績表早就喺雙方嘅心入面。