《毒L和初戀相識的日子》: 第八十六章 原班人馬

第八十六章 原班人馬

今日係Sem two嘅 week two嘅星期五，總共有兩堂要上。上晝係上一科主科，番九半至十二半。而下晝係喺I大第二科嘅全人發展，叫做團隊策動，亦係今個sem嘅第一堂，時間係番兩點至五點。

由於個時間表仲未update，所以我地暫時都唔知係邊個教，淨係知呢科全人總共得五堂。

上晝嘅主科堂都幾悶吓，所以我地都好期待下晝嘅全人發展堂，應該又會有嘢玩喇。

喺canteen食完lunch之後，我地準時上番121號班房。等咗幾分鐘，熟悉嘅Billy sir行咗入嚟。



「大家好阿，好耐冇見喇。希望大家都仲記得我啦，我叫Billy。今個sem我會教大家呢科全人發展。」

大家都喺度拍手叫好。

「咁呢科全人發展叫做團隊策動啦，同上個sem戈科一樣，亦都需要大家去分組嘅。咁請大家分番組先，都係五至六個人一組，分完就坐埋一齊啦。」

「不如好似上次咁分~？」Winnie問我。

「好阿~」我回應。



同上個sem一樣，我地組嘅人除咗我之外仲有Winnie、阿Paul、晴晴同埋家怡。

「分好組之後麻煩選一個組長，選完之後麻煩每組組長交張分組名單比我吖。」Billy sir對全班講。

佢地四個不約而同咁望向我。就係咁，我就再次成為組長。

「好。講番呢科先，每組喺最後一堂都要設計一個活動去比人玩嘅，詳情下堂會講。另外亦都會有團體嘅遊戲。計分方面呢，大家嘅參與度係會計分嘅。另外，最後一堂個活動係佔得最多分，所以唔可以hea做呀。」

「講番今堂先，今日都會同大家玩啲團體遊戲。麻煩組長出嚟拎物資吖。」



「每組會有一張A2 size嘅顏色紙、同埋一排顏色筆。一陣會播一段錄音，錄音會講出一堆物品，例如三個蘋果咁啦，大家就要喺張紙度畫番出嚟，睇吓邊組啱得最多吖。」

對於冇乜記性嘅我，呢類遊戲實在唔太啱我玩。

「開始喇各位。」

錄音極快咁講:「五件蛋糕六枝原子筆三個汽球十部私家車十五枝花十二個足球一隻蝴蝶十張枱八副眼鏡十一本書九對波鞋以及七個人。」

「好，大家有五分鐘時間討論同埋畫番出嚟。」

我地大致上畫番出嚟，當然畫唔哂啦，始終段錄音太快喇。

「總共有十一款物件，大家對吓自己啱咗幾多吖。」Billy sir張個答案show咗喺screen。

結果我地組啱咗八樣，大部份都係Winnie記得。



「好嘢喎，咁好記性嘅妳~」我對Winnie講。

「洗乜講~」Winnie回應。

餘下嘅時間都係講吓理論，之後就落堂喇。

「今日係happy friday，各位週末愉快，我地新年假之後先再見喇。」Billy sir 對全班講。

我同Winnie再次一齊放學，佢話想帶我去一個地方。







難得嘅原班人馬。唯一唔同嘅，係我地嘅關係已經改變了~