《毒L和初戀相識的日子》: 第一百五十六章 新同事(上)

第一百五十六章 新同事(上)

喺公司實習完結之後，我成為咗正式員工。我嘅心態係做住先，如果真係有咩唔如意先決定走。反正，勞工法例規定末做夠一個月可以唔洗通知、唔洗賠錢就可以直接走。

計埋實習嘅日子，我已經喺度做咗幾個月。工作已經上咗手，比初時更熟悉。

阿Paul同晴晴完咗實習之後就即刻離開咗呢間公司，而家怡就同我一樣轉咗做長工。不過，我哋唔係同一個部門做嘢，所以好少見倒面。

今日我照常番工，一番到公司我主管就叫我去人事部接一個新同事嚟。



人事部喺我部門嘅上兩層，咁我當然就慢條斯理咁行上去啦。

我上到去人事部，見倒有一個女仔坐咗喺張凳度。佢着上深藍色嘅西裝外套配上長牛仔褲，個樣幾可愛，年紀應該同我差唔多。

我問過人事部嘅同事之後，得知個女仔就係會去我個部門做嘢，佢個名叫阿婷。

「早晨，你係咪阿婷呀？」我問。

「早晨，係呀。」佢回應。



「妳好呀，我係嚟接妳落去我哋個部門㗎。」

「哦，好呀。」

「咁妳跟我嚟啦。」

我帶咗佢搭Lift落兩層，入到我部門主管嘅房。

「我接咗佢落嚟喇。」我對主管講。



「okay。咁Joseph呀，今日開始你教佢做嘢喇。」主管對我講。

「吓？」

「你都熟哂手啦，加上你哋年紀又差唔多，易啲溝通吖嘛，唔通叫出面班人教咩。咁你有冇問題？」主管補充。

「冇問題。」

上畫教阿婷做啲基本嘢，同我第一日嚟實習做嘅嘢一樣。終於，到咗放lunch嘅時間。

「Joseph，不如一齊食飯囉？呢度附近我唔熟路。」阿婷問。

「好呀。」我回應。

我哋去咗公司附近嘅一間茶餐廳食飯，喺入面竟然見倒家怡同埋佢部門嘅一個男仔。



我哋離遠見倒對方，於是點頭打咗聲招呼。

「你哋識得㗎？」阿婷問。

「係呀，之前I大嘅同學嚟。」我回應。

食完飯番到公司，我繼續教阿婷做嘢。好彩佢都算幾醒目，講一、兩次佢已經明白同埋做倒我教佢嘅嘢。

到放工，得知原來阿婷係住上水嘅，而我都要去上水轉車番屋企，所以我哋一齊走。

一路上，我哋一直傾吓閒計。到咗上水火車站，我哋解散。

「咁聽日見啦Joseph，拜拜。」阿婷對我講。



「拜拜。」我回應。

我搭車番到屋企，突然收倒晴晴單獨send咗個Whatsapp信息比我。






之前一直好少收倒佢單獨send嘅信息，唔知佢搵我咩事呢？