《毒L和初戀相識的日子》: 第一百六十五章 離別

第一百六十五章 離別

「入嚟吖，Joseph。」主管向我講。

我行入主管間房。

「有一個好消息，同埋一個壞消息同你講。你想聽邊個先？」主管問。

「吓，你話事啦。」我回應。



「咁講咗好消息先啦。遲啲公司會安排多兩個人去我哋部門，可以幫輕吓大家。」

「咁幾好吖。」

「至於壞消息呢，你要有心理準備。」

「你唔係要請我食『豉椒炒魷』掛...？」

「放心啦，絕對唔係。只不過，我今日收倒人事部嘅一個消息。」



「究竟咩事？」

「你呢排日日都教佢做嘢嘅阿婷，原來已經遞咗信。佢未做夠一個月，所以唔洗通知期就可以直接走。」

我聽倒呢個消息之後，唔知點解有少少難過。

「係咩，都冇聽佢講過話唔做添。唔怪得佢今日冇番工啦。」

「係咪你教得人唔好呀，所以佢頂你唔順？」



「緊係唔係啦，我好認真咁教佢做嘢㗎。」

「我講笑姐。好啦，咁你出番去做嘢先啦，遲啲會有新人去我哋部門㗎喇。」

於是，我行番出房外，繼續工作。

「佢叫你入房做咩？」我同事阿倫問。

「冇乜嘢，話遲啲會有多兩個人入我哋部門喎。」

「係喎，阿婷今日冇番嘅？」

「佢已經遞咗信喇。」

「吓，咁突然嘅？」



「係囉，佢之前都冇話想唔做。」

喺漫長嘅人生入面，總會遇到好多人。當中會出現一啲過客，或許阿婷就係其中之一。

我心情有少少難過，可能係因為冇同佢好好咁離別啦。

同阿倫傾咗幾句之後，我繼續工作，直到夠鐘收工就走喇。

我離開公司，落到街上，喺行去搭車嘅途中，我如常㩒電話。突然，收倒阿婷嘅信息。

電話顯示:「來自阿婷的1個信息」






唔知佢搵我做咩呢...？