第一百九十三章 出乎意料

個消息係我一番到公司之後阿輝同我講嘅,聽完之後我覺得幾出乎意料。

「今日我哋主管請我哋部門飲茶喎,我喺度做咗咁耐都係試過一次。」阿輝向我講。

「係囉,之前聽你哋講佢都係一個幾孤寒嘅人。」我回應。

之後我哋就開始做嘢,直到放lunch之前十五分鐘,主管叫我同埋阿輝去攞位先。



於是,我哋行去公司附近嘅酒樓,一共有十個人出席。到咗之後,我哋唔洗等位,可以直接入去。

阿輝send信息通知主管,話我哋已經攞咗位。佢回覆話叫我哋嗌嘢食先。

「我知點解佢會突然之間請我哋飲茶。」阿輝向我講。

「吓,點解?」我問。

「你諗吓,之前阿倫同埋阿婷先後都辭職。佢擺明就想加強我哋嘅士氣啦。」阿輝回應。



之後主要都係阿輝劃點心,叫咗嘢食之後部門嘅其他同事都陸續到達喇。

食完嘢之後,主管比咗二百蚊我同埋阿輝去附近嘅一間超市買啲零食同埋飲品番去,放喺pantry比大家。

「突然之間咁大方嘅佢。」我喺行緊去超市戈陣向阿輝講。

「都係戈句啦,佢想增強士氣吖嘛。」

我哋去到超市,揀咗一啲薯片、朱古力同埋餅乾,之後我哋去飲品區。



「買咩嘢飲呀?」我問。

「檸檬茶同埋可樂囉,佢哋中意飲。你揀多樣囉。」阿輝回應。

我望向貨架,決定揀咗一樣好耐冇飲過嘅飲品,亦都係Winnie最中意飲嘢飲品,朱奶。

自從畢業之後,我都冇乜點飲過喇,因為好少喺汽水機買嘢,同埋冇專登去超市買。

我哋之後去比錢,總共一百九十幾蚊。

「我哋有錢分喇。」阿輝向我講。

結果我哋每人分番三蚊,我對此感到有少少無奈。

番到公司,我哋將啱啱買嘅嘢放好喺pantry,放啲飲品入雪櫃。



之後我哋繼續做嘢。到差唔多放工戈陣,我開着個電話睇吓,發現阿俊send咗個Whatsapp信息比我。



唔知佢搵我做咩呢?
已有 0 人追稿