《毒L和初戀相識的日子》: 第一百九十四章 假期的約會

第一百九十四章 假期的約會

原來阿俊想約我中秋當晚上佢屋企打邊爐，Jenny、David同埋Zoe都會去，佢問我得唔得閒。

距離中秋節仲有一個幾星期，我暫時都未有節目，所以我好快就答應咗佢話去喇。佢叫我順便問吓家怡去唔去。

到放工之後，我咁啱喺公司樓下見倒家怡。佢今日自己一個行。

「妳中秋節有冇節目呀？」我問。



「Well，做咩咁問嘅？」家怡問。

「阿俊話中秋節夜晚上佢屋企打邊爐喎，睇吓你得唔得閒。」

「原來係咁。我過兩日答你吖。」

「好呀。係呢，唔見Kenneth嘅？」

「Well，佢今日冇番工吖嘛~」



之後我哋喺巴士站分開。搭車番去途中，我都有問阿Paul同埋晴晴中秋夜晚得唔得閒，佢哋話去唔倒喇，因為好多project做。阿Paul仲叫我哋玩得開心啲。

過咗幾日，我喺公司做緊嘢期間，家怡過咗嚟搵我。

「Hey Joseph.」家怡向我講。

「乜妳咁得閒嘅？過嚟做咩？」我回應。

「幾日之前你咪問我中秋節夜晚去唔去阿俊度嘅？我應該去唔倒喇，因為... 我另外有約。」



我好肯定係因為Kenneth約咗佢。

「唔緊要啦。妳要去拍拖吖嘛~」

「你又知嘅... 咁你幫我同阿俊講啦，thank you~」

「好啦。」

家怡走咗之後，我見倒遠方嘅阿輝好似有啲煩惱咁，於是我行埋去問吓佢。

「你搞乜呀，失戀呀？」我問。

「咪玩啦。有個女仔約我中秋節出嚟，不過我唔太想去。」阿輝無奈地回應。

「邊個嚟㗎？」



「我哋公司㗎，佢喺我細佬個部門做嘢。」

「即係你細佬女朋友啲同事啦？」

「係呀。」

「你對人冇興趣咩？之前你話想拍拖㗎。」

「不如我比張相你睇，你估吓邊個係佢。」

「好呀。」

於是，阿輝用電話開咗張相比我睇。



張相係舊年聖誕節之前影嘅，係一張大合照，佢哋廿幾人去咗BBQ。當中包括有阿輝、Kenneth、阿倫等人，女仔大約有八、九個。





相入面大部份人我都未見過嘅，唔知邊個係想約阿輝出街嘅女仔呢？