《毒L和初戀相識的日子》: 第一百九十五章 難以抉擇

第一百九十五章 難以抉擇

「呢個？」我指向相片中一個幾靚嘅女仔。

「唔係佢。」阿輝回應。

「咁... 呢個？」我指向相片中一個比較高嘅女仔。

「都唔係呀。」



「嗯... 呢個？」我指向相片中一個笑容好燦爛嘅女仔。

「就係佢喇。」

我印象中冇喺公司見過呢個女仔。相中佢紮起頭髮，着上一件牛仔外套。

「點解你唔想同佢出街嘅？」我問。

「佢... 點講呢？其實佢份人冇乜嘢嘅。只不過唔係咁想同佢出街姐。」



「你咪當朋友出街食餐飯囉。」

「唉，我再諗吓先啦。」

距離中秋節仲有一個星期，佢都仲有啲時間可以考慮嘅。唔知係咩原因令到佢咁難抉擇呢？

我之後繼續工作。到放工之前， 主管叫咗我同阿輝入佢房。我哋隨即入去。

「有嘢益你哋呀。」主管向我哋講。



佢拎咗兩罐月餅比我哋，我哋隨即拎住。

「係啲客比我㗎。你哋一人一罐啦，唔好同其他人講喎。」主管續說。

「多謝呀！」我回應。

「多謝。」阿輝回應。

我對於呢件事感到有少少意外。

到放工之後，我同阿輝一齊走。落到公司樓下，我見倒啱啱喺張相入面嘅戈個女仔。佢行喺我哋前面。

「咦，佢係咪想約你戈個女仔？」我問。

「係呀... 咪就係佢囉。」阿輝尷尬地回應。



之後佢放慢腳步，等戈個女仔行遠啲。我哋行到巴士站之後分開。

我番到屋企之後，喺樓下信箱收倒一封Winnie寄比我嘅信。

我番上去之後急不及待地打開封信。




之前佢都冇話會寄信比我㗎，唔知佢寫咗啲咩比我呢？