《突然有條女同我同居》(冇甜): 15

大概七點嘅時候，個鬧鐘就嘈醒咗我。

我坐起身伸咗個懶腰，但隻右手唔知點解摸到啲軟淋淋嘅嘢，睇嚟憶奇又上咗我張床度訓...

因為我張床係雙人床，而且我淨係會訓係一邊,所以憶奇成日都上我張床訓。

等陣先，憶奇唔係有好多毛嘅咩...

我感覺到有啲唔妥，所以即刻縮番開隻手。



「愛...愛盈？點解你係度嘅...」

佢坐起身伸個懶腰跟住捽一捽隻眼，然後用個好嗲嘅聲線同我講，

「我想同我男朋友一齊訓呀，所以我已經決定咗以後都同你一齊訓！嗱，你睇下，嘢都搬晒過嚟喇」

我望一望周圍，佢竟然係我訓著果陣搬晒啲嘢過嚟...當然佢想同我訓我都唔會拒絕，所以我諗咗一諗之後就決定晏啲將佢本來果間房整成書房。

「但係...你唔驚我會忍唔住對你做啲咩咩？」



「如果你真係忍唔住嘅話...咁我都無辦法架喎...但係我相信你唔會亂嚟嘅～」

「你個傻妹...」

之後我就去咗煮早餐，而佢就去咗喂憶奇，食完早餐之後我就去整好咗間書房，整完執完都十一點，之後我就醒起我哋仲有一樣好重要嘅嘢未做，

「黃愛盈，你係唔係唔記得咗有啲嘢未做？」

「呀係喎！」



之後佢就行埋嚟叫我踎低少少然後佢再趷高腳，然後...佢錫咗埋嚟...

「morning kiss～」

佢伸一伸脷之後好可愛咁樣講，

「唔係呀...」

「咁唔通...」

佢塊面紅晒咁向小希希嘅方向望...

「唔係呀...你記唔記得聖誕有咩啊你...」

「哦～你又要送禮物畀我？」



佢即刻笑到成個小朋友咁...

「都算係掛...你跟我過嚟...」

之後佢就跟咗我入書房

「吓...唔係呀嘛...」

佢望住枱面上嘅假期功課O曬嘴咁講，當佢諗住逃走果陣，我捉番佢過嚟然後攬住佢同佢一齊坐係張凳上面，

「做晒先好走！」

「嗚～～」



結果我哋直到做曬啲功課果陣都保持住呢個動作，當我哋做晒啲功課果陣都已經夜晚七點，煮完飯食埋之後都八點幾，係時候要做果件事喇...