上咗成朝堂之後終於到咗十二點搭九,即係萬眾期待嘅Lunch time。

「希仔,今日去邊食呀...最好近啲...」,愛盈毫無元氣咁講,唔講以為佢成個禮拜冇食飯。

「近啲...咁茶記」

「好...」,佢緩慢咁企起身。

「預埋我哋~」,阿龍轉身講。





「請問...我去唔去得...」,愛麗絲有啲怕醜咁問。

「無所謂~」,愛盈望咗愛麗絲一眼再講。

「行喇~gogogo!」,黃愛盈行埋嚟我旁邊,攬住我隻手,突然興奮咁講。

掂...掂到...

我感覺到自己塊臉好似有少少紅,但係...愛盈望落好似毫不在意。





然後直到坐低果陣,我哋都一直保持住呢個姿勢。

「我想好奇一下...請問希哥你同愛盈一齊咗幾耐喇?」,愛麗絲坐得好端正咁問。

「...九日」,原來得九日...

「哦...」,愛麗絲若有所思咁點頭。

「不過我哋就好似拍拖拍咗三四個月咁!」,愛盈自豪咁講。





「嗯...」,愛麗絲繼續點頭。

之後愛盈就毫不羞恥咁開始曬命,係嘢食嚟之前都不斷咁係度講我有幾好,搞到我有啲難為情。

「好喇好喇,食嘢。」我輕輕咁拍一拍佢個頭。

「係係~」,愛盈望向我甜笑。

「真係幸福呢,呢個係咪就係熱戀期呀。」,愛麗絲雙手托下巴,無奈咁講。

「哈哈...我嘅熱戀期就係不斷咁做白老鼠呀...」,阿龍苦笑道。

「盈~禮拜六要唔要一齊去買嘢呀?」,瑩瑩一邊微笑住一邊搣住阿龍嘅右手手臂。

「好呀~希希你會同我一齊去架可?」,愛盈望住我講。





「...好...嘅」

我好討厭多人嘅地方。

...

放學之前嘅最後一堂係上英文,個Miss一如既往咁遲到五分鐘,無記錯嘅話佢好似叫做吳凌,望落幾後生,上堂果陣成日會提到一個畢咗業嘅師兄嘅佳績。

個師兄...好似係叫Grey。

「好喇~今日要quiz呀~係假期前就講咗架喇~」,佢語氣溫柔咁講。

聽到呢句嘢之後,愛盈拉一拉我衫袖。





「我唔記得咗...」,佢用楚楚可憐嘅雙眼望住我。

「唔緊要,你肯定會考得唔錯。」,我微笑道。

「...吓?」,愛盈滿臉問號。

「即係...自己搞掂佢。」

佢理應係會合格,畢竟佢琴日做嘅功課入面有一份其實係我印俾佢嘅範圍題目,而且佢都做得幾好。

不過,其實呢啲嘢佢冇可能會知,而且我都預咗佢會唔記得要quiz。

「你竟然見死不救...嗚...」

「無嘢嘅,今次佔好少分咋嘛。」,我摸一摸佢個頭。





無記錯嘅話吳凌講過今次佔咗唔少分,如果炒咗嘅話會好大鑊。

「好啦...」,愛盈好似有啲失落咁講。

「好喇~分紅海~」,吳凌叫道。

學校大部份嘅老師仲有同學都係基督徒,不過都有唔少人同我一樣係無信仰。

...

眨眼間就已經考完然後放學,不過我有啲嘢想問下人。

「阿龍。」,我右手托住下巴,望住前面執緊書包嘅阿龍問。





「嗯?」

「其實咩係「紅眼惡魔」?」