有一日，我住左入精神病院: 十三、Mary

換轉係平時，俾個陌生人咁樣攬住，我一定會毛骨悚然。但唔知點解，俾丁姨攬住嘅我，竟然有平靜嘅感覺。

可能係佢嗰句「呢度唔會再有人傷害你」觸動到我，我呢一刻竟然有少少想喊。佢點會知架？無可能架喎？ 

「其實，好多人一開頭見到我個女嘅時候都會嚇親。我當然知係點解啦，你地覺得佢唔係真架嘛。但佢對我黎講就係真嘅，其他人點睇根本唔重要。」

「但明知佢唔係真嘅，點解仲要執迷不悟？」

「咩為之真，咩為之假，仲有所謂咩？黎，Mary食飯啦。」 





上一秒仲好明顯清醒理智嘅丁姨，下一秒又變返個會喂公仔食飯嘅「阿媽」。 

望住啲飯被遞向Mary嘴邊之後，一羹一羹咁跌落佢條裙度，我越發覺得不安。