《War for God》: Ch.2

　「宜家？」 　

　「唔通聽朝啊？」 　

　說罷，為義拿出手提電話拍攝一番。 　

　「WhatsApp俾家俊佢哋。」 　

　阿星拿出自己的手提電話，在一個名為「救港騎士團」的WhatsApp群組裡發表為義的吩咐。 　

　十分鐘後，一名身材高瘦，皮膚白晢且眉清目秀的少年來到為義的辦事處。 　

　「哇！班友真係嚟料啊！？」那少年見到一片狼藉的景象，登時瞪大雙眼。 　

　「子軒，家俊呢？」 　

　「佢唔舒服，所以無嚟。」 　

　「嗯，咁入嚟啦。」為義領著二人走進室內，並重新鎖起大門。 　

　「大佬，係唔係要郁手喇？」 　

　「係囉，竇都已經俾人踢埋喇喎！」 　

　「我正正就係想同大家講我哋要更加戒急用忍，忍辱負重。」 　

　「仲忍？」阿星瞪大雙眼。 　

　「你估我哋宜家派人斬佢哋老母之後我哋會吸引到更多人支持啊？到時我哋盞穿幫㗎咋！唔好唔記得我哋養咗成隊兵喺手，一旦曝光咗我哋個plan就會正式收皮！」 　

　「咁唔通由得班友恰到我哋上心口咯喎！？」 　

　「總之我哋繼續練兵，他朝一日一定有機會翻身....反正班差佬都頂唔到幾耐....遲早有一日班示威者同主流狗都會奪到權....到時班弱勢嘅人就會徹底玩撚完....」

 　整個空間的氣氛頓時沉重起來。 　

　「總之我哋一定有機會還拖，但唔會係今日。」為義走向酒櫃，拿出一瓶紅酒和三隻酒杯。 　

　再為自己以及子軒二人倒酒：「嚟，飲完呢杯酒之後就開工，清理番好個場去。」 　

　三人把酒一飲而盡後，為義便走進廁所並關起門來。 　數秒後，為義手裡拿著一桶海藍色的液體和三條毛巾走出廁所。 　

　「開工！」 　

　正當為義打開大門時就見到十多名記者已在門外恭候著他。 　

　「常議員，你點睇今次嘅破壞事件？」 　

　「常議員，你認為今次嘅幕後黑手係邊個？」 　

　為義將水桶和毛巾放在一旁，整理好衣領、梳理好頭髮，便開始回答記者的提問：「哪怕有幾多嘅阻撓，我哋依然會堅持服務人群、搞好呢個香港。我唔理係邊個組織指示或者邊個人做。我只會同佢講一句，我哋係唔會退縮。」 　

　網上流傳今次嘅破壞事件係同你近日組織『弱勢社群自衛隊』以及『社會改革』論有關，請問你有咩睇法？」 　

　「如果喺呢個咁嘅時勢弱勢社群連保護自己嘅權利都無嘅話，咁仲講咩民主、自由、人權啊？除非大家同我講弱勢社群唔係人，唔受人權嘅保障姐。同埋如果大家覺得香港呢個社會無問題嘅話咪繼續囉，反正到時成個香港依然都係不快樂城市、不宜居住城市，到時有咩事發生嘅話唔好嚟搵我。」 　

　「常議員，你擔唔擔心訪問出咗街之後會有更多針對你嘅破壞事件？」 　

　「即管嚟，只要唔好傷害到任何人就得㗎喇。死物姐，有咩所謂？」 　

　此時，為義的手提電話傳來震動，為義看了來電顯示後便對記者們說：「我有啲緊要嘢要做，失陪喇各位記者朋友。」 　

　說罷，為義轉身走入辦事處並關上大門，阿星和子軒則替為義應付記者們。 　

　「喂，啊義，聽講班『曱甴』搞你嗰辦事處喎，點啊？駛唔駛叫啲伙記嚟幫你手啊？」 　

　「多謝一哥，有心喇。呢壇嘢我同我班𡃁會拆掂佢㗎喇。」 　

　「嗱，唔好話我唔提醒你啊，我就收到風，班『曱甴』會喺下個禮拜二除夕夜嗰晚有行動，到時你自己執生啦！」 　

　「收到喇。」 　

　「咁我就去開會先喇，你自己慢慢啦吓。」 　

　通話結束後，為義再次走出大門，發現記者們早已離開，而現場只有子軒一人。 　

　「阿星呢？」 　

　「去咗廁所囉－話時話頭，頭先邊個打俾你啊？」 　

　「一哥囉，仲會有邊個姐。」 　「佢講咗啲咩啊？」 　「話下禮拜二有大獲嘢姐....」 　

　子軒朝為義的耳邊靠攏，輕聲地問道：「咁即係我哋係咪可以出動喇？」 　

　「你話呢？」 　

　說罷，為義便開始清潔大門。 　

　「咋咋林做完就去食下午茶啦！」為義將毛巾丟給子軒，子軒接到手後亦加入清潔工作。　　

　「咦？又會一吓就擦得甩嘅？有無咁勁啊啲洗潔精。」 　

　「因為我加咗料啊嘛！哈哈！」為義沾沾自喜地說。 　

　就這樣，子軒和為義二人不出三分鐘就把大門上的紅色油漆和壁報版上的塗鴉都抹掉。 　

　「阿星，番到嚟喇。」 　「Sorry大佬，頭先飲得太多汽水。」 　「唔緊要，最緊要肯番嚟。」 　

　為義從辦事處裡拿出一條人字梯放在橫額下。 　

　「阿星，睇你喇！」 　

　「收到大佬！」 　

　阿星爬上樓梯，小心翼翼地將橫額拿下來。 　

　「搞掂食碗麵！去high tea！」為義搭著二人的肩膀。


待續