比個女仔咁樣問一問,我反應唔徹就答咗好

「咁就拜託你啦,我番去再搵你夾時間!仲有吖,呢個係我同你之間嘅祕密,唔好同其他人講!」

係我回過神之後先知我自己啱啱做咗啲乜,但係點解游水要搵我教...諗一諗先覺得好似有啲奇怪,我同佢又唔係真係好熟。佢咁多friend都唔一定要揾我啫...喺我仲深究緊呢件事嘅時候,miss Tang已經入咗嚟

「Good morning student,So in this year we will having a presentation about yourself evey week just like last year,and today's topic is about yours DREAM」

....我嘅夢想?雖然我一直係咁講我想實現我嗰個夢想,但係其實...我嘅夢想一啲都唔明確。呢個夢想嘅起源...係我幼稚園嗰陣



...

「梓允,你大咗想做啲咩呀?」

眼前係一個好温柔,好慈祥嘅老師

「我都唔知,miss yu yu你覺得我要咩夢想好,不如你比一個我呀」

「我唔可以比個夢想㗎,不過我可以帶你揾到個夢想」



「去佢屋企揾?」

「係吖,我帶你去佢屋企搵啦。你合埋雙眼,幻想下你最想多最鐘意嘅事。佢就喺門後面, 但係因為你揾唔到佢,所以佢依家消失緊。你要變成超人先救到佢,但係你依家未夠努力。所以你喺呢個成長要不斷咁為佢努力先可以變身做超人」

「Miss yu yu...我知道我要啲咩啦」

「我嘅夢想係.....」

...



我嘅夢想係..長洲

「你做咩發晒吽哣咁嘅?」

隔離嘅女仔問我,我見到張紙寫咗好多嘢。 睇嚟佢對自己嘅夢想好明確

「冇呀,我唔知點形容自己嘅夢想...覺得好抽象」

「係咪同一個人或者一個地方有關㗎?」

我點咗點頭

「你幻想下,你依家唔係要寫一篇描寫文而係一篇抒情文或者應該講係情書,你當自己要同佢表白,你要對佢承諾一啲嘢咁吖」

唔知點解,我有一刻覺得佢好似Miss yuyu。嗰種眼神同...嗰種温柔



「Miss Yu!why you are talking about Cantonese?Do you have something to ask?You just ask me I will answer you」

「Em...No la Miss,I just ask is that你嘅夢想係做Lui sir新娘jar」

佢搞到miss Tang塊面紅都好似蘋果咁,然後全班都係到讚佢抽得靚,miss tang唞返順條氣就叫佢做present

「吓...好啦..咳哼,What is your dreams?I wanna to be a star that shining in everywhere.......」

佢英文唔算流利,不過佢把聲唔鬧人嘅時候都幾好聽。佢嘅夢想係做一粒照耀世界嘅星...乜咁似啲幼稚園小朋友嘅夢想㗎...不過其實我都冇資格咁講佢,呢兩堂又係好快就過咗,臨落前堂之前Miss Tang問我

「梓允,你英文名係咩?」

「Er...我叫Sun呀S,U,N 太陽咁解」



呢個時候唔知點解成班喺度望住余心玥偷笑,後尾我捉住梁學男嚟問佢哋笑乜

「因為呀玥英文名係Moon,然後你又叫Sun大家覺得你哋好襯啫」

...
其實點解會叫Sun好似係因為嗰陣Miss Yuyu話我好似太陽咁熱情,同埋我好鐘意飲陽光檸檬茶所致

不過算啦,我都冇諗過改名同埋呢啲傳言好快就冇㗎啦,更何況余心玥又咁多後備男友

上完堂之後係放lunch,由於我哋學校係位於太子南昌奧運嘅正中央,所以....所以去每一個地方都好遠,我喺5A門口等黃浩輝嘅時候見到成班喪屍咁嘅師兄衝咗落去

「你等黃浩輝?」呢一把聲係...劉芷韻

「係呀,你點知嘅」



「琴日朝早見到你哋一齊,咁佢又係讀呢班,咪估係佢」

哇,原來佢咁留意我㗎...其實我都唔介意...

「不過黃浩輝好似鐘意呀Moon」

「梓允!呀Moon係一個好花心嘅女仔嚟㗎,所以呀輝...仲有你都要小心啲佢」

開心咗一秒,原來係呀嫂。佢花心我知,奸都捉埋啦,咁都要黃浩輝信先得㗎。都唔知隻蜘蛛精比咩藥佢食,搞到佢咁死心塌地

「喂,行得啦」

黃浩輝終於出嚟而劉芷韻眼都唔眨咁望住佢,同埋叫我提佢...
之後我哋去咗間日本便當咁嘅嘢買外賣番去食,我問佢點解唔喺度食佢話番學校食開心啲,而我番到嚟終於知點解會開心啲...



「你見唔見到,你呀嫂係咁望住我。我都話佢對我有意思㗎啦」

係吖,佢所講嘅呀嫂就係余心玥。不過余心玥背住佢坐,反而佢個friend望住呀輝多啲

「冇喎,望住你嗰個係...」

當呀輝擰轉個頭佢望嘅時候,余心玥行咗過嚟,啱啱企正佢背脊

「呀...呀玥!」

平時天不怕地不怕嘅黃浩輝竟然係一個女仔面前唔識講嘢?呢個真係大新聞

「咦hi~我有嘢揾梓允吖,一間再傾」

之後佢就拉咗我去出班房

「嗱,妖女,我就唔受你溝嘅,快啲入去解釋番」

「妖, 冇人想溝你吖。你睇下呢部咩嚟」

佢拎咗一部金色嘅iPhone7 plus 出嚟,一咁入去個 lock screen 係長洲嘅風景相,我先知我跌咗部電話

「本身想比番部電話你嘅,點知你好人當賊辦算啦,我拎去校務處失物認領順便加分啦!你估下部機開咗會點?」

「唔好呀....比番我啦...」

「比番你都得嘅,講句對唔住呀玥大小姐吖」

「...唉,對..對唔住...呀...玥」

「大小姐」

「呀玥...大小姐」

「乖啦!嗱,電話。」

拎番佢之後,我即刻睇到佢身上有冇邊忽殘缺咗,結果一開個mon

[@Sum.yue_5 已接受你的追蹤要求]

...
已有 0 人追稿