就好似一個傳送門,當我穿過去後,我黎到左一個非常耀眼嘅地方,令我一時間打唔開眼…

當我再打開眼時,我就發現我正身處醫院,而樂兒就係係我隔離挨住張病床瞓著左,我冇離開到佢,睇黎我返返現實。

「總算叫返你出黎,好彩你冇跟個假象走,嗰度鬼門關黎架,只係個情境同之前有啲唔同。」

原來阿盈都係度,佢係病床另一邊。

「多謝你阿盈。」





「阿洋你醒啦?」

聽到我發出少少聲,旁邊嘅樂兒亦都醒左,呢個係真正嘅樂兒。

「樂兒你係度嘅…?」

我發出一把虛弱嘅聲線。

「好彩你醒得返咋,你知唔知你已經瞓左兩日,真係擔心死我,如果冇左你點算,我身邊啲人已經走晒架啦…」





佢冇正面回答我,而係激動咁攬住我,而且眼框仲帶點淚光,

原來我已經瞓左兩日,時間過得真係快,照咁睇我傷勢都有啲嚴重。

「傻嘅,我依家咪好地地咁醒返係度。」

「點解你要咁傻黎搵我?我地講過唔再見架嘛…我特登唔講俾你聽就係唔想你擔心、唔想你介入。」

「咁簡單仲洗問,因為我鐘意你、我想保護你,知你有野瞞住我所以我先跟住你,點知就發現條仔對你咁衰…你唔好再離開我好唔好?」





「嗯…我唔走,但你真係好傻,你嗰晚由我返工等到我放工?咁咪等左我好耐?」

「呢啲少少時間唔緊要啦,呢一切都係值得,最緊要係我保護到你,不過都唔係完全由我一個人保護你…」

「你真係太傻,為左我呢個唔值得你付出嘅人搞到自己咁傷,多謝你…」

「但乜野唔係得你一個保護,嗰晚得我同你同浩正三個人咋嘛?」

係喎唔記得樂兒嗰晚應該係見唔到阿盈,只有條仔見到。

「哦…冇野,講返你先啦,你唔係話只係當我朋友當我係兵,點解忽然咁著緊我?」

其實我咁樣問真係好蠢,始終係我為左佢搞到自己咁傷,可能佢只係感到愧疚先咁著緊我,我都係隻兵黎架咋。

「嗰日之後我諗清楚架啦,見到你俾浩正打,最後仲要打到昏迷左,原來我最心痛嗰個係你,我嗰陣先發現我唔可以冇左你、我先發現原來我不知不覺已經鐘意左你…」





我有冇聽錯,樂兒鐘意我!?原來樂兒都鐘意我!但佢唔係好愛佢條仔架咩,點解…

「我之前一直好愛浩正原來都只係唔捨得過去嘅回憶,愛嘅都只係過去嘅佢,係盲目嘅愛,每一次為佢無條件付出都係希望佢可以變返以前好嘅佢,但呢啲都只係奢望、唔會成真,最後仲越黎越衰。」

「你知唔知佢以前對我真係好好,我同佢係經朋友介紹認識,好快我地就一齊左,開頭對我真係好好,錫我寵我、咩都將我擺係第一位,又對我專一又保護我又體貼,成個暖男咁。」

「有一次出街有人𥄫實我佢即刻走去鬧人;之後就算有女埋佢身對佢有意思佢都會刻意保持距離同拒絕佢,佢嗰陣真係好著緊我,我覺得好warm好有愛,我覺得識到呢個男仔真係好幸福。」

「佢仲應承我會以後都咁樣愛錫我,唔會離開我,話要娶我做未來老婆,我好感動。」

「但好境不常,幸福嘅日子隨著時間慢慢消失,可能係過左熱戀期,佢有一次俾朋友帶左上大陸叫雞之後就開始對我冷淡,佢話佢嗰陣先見識到個世界係咁大,佢覺得好有新鮮感。」

唉,對一個渣男黎講,承諾嘅野邊度會可靠,幾多山盟海誓都係假,佢愛嘅只係嗰一刻嘅新鮮感。





「再之後又有朋友帶左佢過澳門賭錢,好快佢就賭上癮,經常都會過大海賭返舖,初頭贏左幾次跟住就係咁輸,佢爭落唔少錢成日都問我借錢,但冇一次還到俾我。」

「佢每次問我借都話佢要拎啲錢贏返舖大,跟住就可以一次過還晒俾我,結果一次都冇。」

「佢問我越借越多,我本身有返part time,我已經將啲錢全部俾晒佢、甚至我向我每一個朋友借錢佢都係唔夠。」

「可能因為佢已經對我冇晒愛意,佢竟然叫我去酒吧做酒吧妹撩客賺錢,不惜一切就算俾佢地摸同佢地開埋房都冇所謂,只要賺到錢俾佢就得。」

「我心諗點解佢可以叫自己女朋友做埋啲咁嘅野,但因為我真係好愛佢,所以我都冇理咁多照做,慢慢佢心裡面對錢嘅重要性就高於我,甚至已經對我一啲愛都冇。」

「因為咁,佢經常都會係後巷等我問我攞錢,唔夠數佢就會打我,仲威脅我唔俾錢佢佢就會將啲裸照放上網同同我分手。」

就係咁,樂兒將以前同佢條仔由好變壞嘅經歷講晒出黎,終於知道點解條仔對佢咁衰都仲咁愛佢。

「回憶總是美好,但呢一刻條仔已經變左係返唔到轉頭、佢已經唔愛你,就只係當你係生財工具,你唔好再搵返佢。」





「嗯,你講得啱,佢只係當我生財工具搵錢俾佢洗,佢對我一啲愛都冇晒,而我亦都認清自己愛嘅都係過往嘅佢,係我唔捨得同佢過去嘅回憶先唔想同佢散、我仲未放得低佢…」

「你就即管離開佢啦,佢呢啲渣男唔值得你留戀,我相信時間會幫你慢慢沖淡。」

「嗯…我唔會再搵返佢,因為我終於知道我依家真正鐘意嗰個係邊個。」

「既然你話你鐘意我,不如…不如我地一齊…?」
已有 0 人追稿