［愛情甜故前傳--無糖純愛］曾經嘅我地，都係兩條平行線⋯: 20. 一點點生氣

學校係英文中學，數學當然係用英文讀啦，但我真係一個字都聽唔入耳

我成個腦入面都空白一片咁…自從見到洛天恩望向葉子朗之後，我心中就悶悶不樂的

「Last time we talk about this question, so let’s practice more！」數學老師Mr. Li講道，我覺得佢又準備叫人出去，因為佢喺黑板上寫緊題目…

Mr. Li最中意就係叫人出去答問題，而我最唔中意出去答問題，唔係因為我唔識答數學答，而係佢成日出埋啲難嘅題目比大家要大家去解題

「Give you 5 minutes to do this question…」Mr. Li睇一睇手錶，我都估到佢下一句會係：「Then I will pick someone to come out and write on the blackboard．」



我喺數學堂課上面做題，拎起我嘅好拍檔——計數機一齊同我解題

我右手拎坐原芯筆，左手拎住計數機，喺堂課上寫了又寫

5分鐘就係咁又差唔多過去，Mr. Li見差唔多夠鐘就抬頭望大家，準備要叫人出去黑板做

佢喺黑板中間畫咗一條直線，將黑板分咗兩半，睇嚟要叫兩個人出去

「拜託你唔好叫我，我真係唔想出去…」我喺心中無奈地講道



「Um…Vincent and…」Mr. Li叫葉子朗出去做數，「And Venus！」

其實我真係唔想出去做數…喺黑板上面做數，做錯咗嘅話幾醜樣…但點解你偏偏要叫我？

但Mr. Li叫咗葉子朗，我都有少少唔介意出去做數，因為可以同葉子朗一齊做數嘅機會好少

我拎埋本堂課簿企起身行出去，葉子朗已經行到黑板面前拎起白色粉筆，行到去黑板嘅右邊；我行到出去拎起斷開咗一半嘅白色粉筆，企喺黑板嘅右邊，望一望堂課簿，提手喺黑板上寫下公式、步驟同答案

我比葉子朗遲出到嚟，但係我比葉子朗更快寫好答案，然後放低粉筆



喺放低粉筆同回頭番埋位之前一刻，我自然地望咗葉子朗，佢冇寫下任何嘅答案，只係拎住粉筆望住黑板

我番到埋位嘅時候，佢仍然係冇寫下任何嘢

「Go back to your seat first…」Mr. Li見葉子朗冇寫低任何嘢就搖搖頭，叫佢番埋位坐

葉子朗放低粉筆，轉身時我見到佢嘅臉上冇任何表情，默默咁行番埋位

「Please work hard Vincent！」Mr. Li一邊對葉子朗講，一邊拎起紅色粉筆喺我做嘅題上畫咗個剔

Mr. Li啱啱特登㗎…佢明知葉子朗會唔識仲叫佢出去做，仲要特登叫我出去做數…啱啱佢叫我嘅時候特登大聲咁叫我

唔識就唔識㗎啦！做咩要特登叫一個你明知佢唔識解嘅人出去做啫…出啲題又難…搞到好似特登要叫葉子朗出嚟然後將佢羞辱一頓咁，而我就好似變咗個幫兇咁…陣間葉子朗討厭我點算呀？

Mr. Li仲要特登叫佢努力啲讀書，叫佢上堂專心啲，講到好似佢一定冇努力過咁，做咩要咁討厭㗎啫…？



「明明就係自己出啲題難…人地唔識就話人廢…」我喺心中替葉子朗抱打不平，替佢不值

我一邊聽Mr. Li講一邊抄低啲震注意啲重點，因為考試可能會出，而且有啲好容易錯嘅失分位都一定要小心，我用黃色嘅螢光筆將佢地間起，呢啲位喺幫靜愉追進度嘅時候都一定要同佢講，用紅筆打粒星先

講起靜愉，今日靜愉冇番學，搞到好想話佢知今日嘅事，等我今日放學番到屋企之後打比佢同佢講先 ！

放咗學一番到屋企之後，我就打電話比靜愉，急不及待要同佢講今日嘅事

「嗰個Mr. Li真係好討厭呀！」我對靜愉抱怨着，「佢自己成日出埋啲超難嘅題目，然後人地唔識就怪人地唔聽書唔專心！」

「知啦知啦…知你睇唔過眼啦～」靜愉嘅聲線裹夾雜咗少許愉悅，「幾時同人表白呀？」

「冇打算表白喎～」灘喺床上嘅我翻身，望向牆嗰邊



「你中意人但唔表白呀？」靜愉有啲疑惑，「陣間有人同你一樣中意佢咁點算呀？」

「你一咁樣講起，我就諗起今日…總覺得有啲奇怪，又有啲不安…」靜愉嘅說話令我諗起今日見到洛天恩望葉子朗嘅事

「今日？做咩呀？」靜愉問道

「今日我偶然見到隔離班嗰個洛天恩望葉子朗咋嘛…」我對呢件事的確係有啲在意，不過都冇將佢放喺心中重要嘅位置，「只係感覺上怪怪地啫…」

「你多心啫可能，唔洗擔心喎～」靜愉安慰我道，但原來佢係想先甜後苦，「不過我之前都有聽人講過，話洛天恩中意葉子朗。」

「咁點算呀？」我微微鼓起兩泡腮，心情真係起伏不定，因為靜愉講一半唔講一半，「一啖砂糖一啖屎咁…」

「你問我都冇用㗎～我又唔係葉子朗。」靜愉平靜咁講，反而仲喺度笑，「佢會中意你就自然會中意你㗎啦～你唔洗咁擔心啵～」

「陣間佢中意洛天恩點算呀？」我又問道，心裹就係唔好受，我唔希望佢中意洛天恩…





IG Link: https://www.instagram.com/nd_cotttoncandy/?hl=zh-tw

回應link: https://docs.google.com/forms/d/e/1FAIpQLScB_-FcIiKv9bnDe_pWTFd9B7sEtdiGEnKZoJeq5rjmK9JUZA/viewform?usp=sf_link