喺佢行咗出去之後,我踏入課室,行到自己個位,然後伸手入櫃桶摸到手機,我將佢拎番出嚟放番喺褲袋

我並冇喺拎完手機時即時離開,反而企喺原位,愣住了…

啱啱嗰一刻,就好似發生過一樣,一樣係我入課室,佢出去,差啲就要撞上…但明明上一次我都唔係咁樣嘅反應,點解今次會…

喺啱啱嘅嗰一個瞬間,我個心跳到好似要心臟病發咁…喺我伸手扶佢嘅瞬間,又有一股輕微嘅電流流過,由我嘅指尖沿住我嘅每一條神經線,我感覺到我全身嘅神經線好似都跳動咁,心跳比起之前更快,快到我自己都有少少愕然

方芷諾就好似咩都冇發生一樣抬頭望我微微一笑,講一句唔該;但係我由同佢對上視線嘅一刻,好似喺1秒內就移開咗視線一樣



就係佢對我微笑嘅一個瞬間,心臟又再次傳嚟緊縮一下嘅感覺…所有感覺都係以前從來都冇試過,一次都冇,但啱啱嘅感覺就好似平日嘅加強版一樣

我企喺自己個位前面,自己都呆住了,我嘅大腦解釋唔到啱啱發生嘅事所帶嚟嘅感覺,我都唔知道要點樣去解釋啱啱嘅感覺,每一下都好似係觸電似的感覺,難以言喻…

我望向方芷諾嘅座位,當然嗰個位已經冇人坐,課室入面除咗我之外就冇其他人,我好似從來都冇咁樣光明正大咁望向佢嘅座位,每一次望向佢嘅嘅時候,都係用眼尾嘅餘光偷偷地望向佢,明明咩事都冇,點解就要咁鬼鬼祟祟?

我行出課室,經前梯落番去G樓,番到屋企做咩好呢?我今晚其實唔太想上去食飯,愈嚟愈覺得上去食飯冇咩意義…對我嚟講嘅話

「番去打機好定—」



喺我落埋最後一級,到達G樓,正諗緊番去要做咩嘅時候,我望到有人喺另一邊行過嚟,睇嚟方芷諾係行後梯落嚟,因為最近一樓教員室簿櫃最近嘅樓梯係後梯

方芷諾好似冇見到我,佢逕自向前走學校嘅大閘,我不禁加快咗腳步,邁嘅步都大咗,我行到鐵閘前,將鐵閘拉開,我先踏出校門

方芷諾見到學校嘅大閘開咗,我聽到後面有急速嘅腳步聲但係冇學校閘門閂上嘅聲音,睇嚟佢小跑起嚟喺鐵閘閂上次前出咗嚟

今次我行喺佢前面,內心有啲想去同佢搭話,不過突然間做咩同佢搭話?感覺上就好似有啲咩陰謀咁…唔好問我點解想去同佢搭話,因為我都唔太清楚

我唔會真係中意咗佢呀嘛…咁尷尬?我之前先拒絕咗佢,但係宜家如果我真係中意咗佢嘅話就真係自打嘴巴啦!我之前仲實牙實齒咁講我一世都唔會中意佢,但係我宜家對佢嘅感覺又真係有啲奇怪



等,等陣…點解我行咗嚟呢邊嘅?我應該喺啱啱個路口轉右,我做咩直行呀?

「算啦,既然都行咗嚟呢度啦…都係去一轉麵包店啦…」我喺心中無奈道

我行入麵包店,我前腳先啱啱踏入麵包店,方芷諾後腳就入嚟

尷尬啦…做咩事呀今日?去到邊都會見到方芷諾咁…我偷偷望向企喺門口拎緊托盤同麵包夾嘅方芷諾,留意住佢嘅一舉一動

「佢應該都係嚟買吞拿魚包啦~」我喺心中默默猜想,根據我之前留意到嘅經驗,佢每次嚟親都一定係買吞拿魚包,雖然之前有一次見過佢買方包,但我諗佢都係會買吞拿魚包

我做咩講到好似我好留意佢、好了解佢嘅習慣咁…?真係奇怪

方芷諾果然係行到去放吞拿魚包嘅嗰一個麵包櫃前時停咗落嚟,然後趟開麵包櫃嘅膠板門,夾咗一個吞拿魚麵包放喺自己手上嘅托盤上面,然後就順手咁將麵包櫃嘅膠板門閂上

我本來以為佢會同平日一樣直接行去收銀處,但今次佢行咗去另一個麵包櫃前,趟開咗麵包櫃嘅膠板門之後拎咗一條長形嘅牛油軟包,嗰隻麵包好香,如果放入多士爐烘過嘅話仲香



「後生仔,借一借比婆婆夾麵包…」有人拍咗我博頭兩下,我回頭望嘅時候見到係一個婆婆,我頓時行開咗讓個位比婆婆行到去麵包櫃前面

我好似又不自覺咁望住佢…我幾時開始咁留意方芷諾㗎?

我夾咗一個麵包放喺盤上然後就去排隊,我見到方芷諾麵行去排隊,下意識就放慢咗腳步,因為我已經差唔多行到去隊尾,方芷諾喺我側邊行過,比我先一步行去隊尾

我呢一下先回復本來嘅步速,排喺佢身後,望到嘅係佢嘅背影

佢一下抬手,將髮絲撓到耳背後,長長利落嘅馬尾,喺後頸上嘅一絲一絲短髮碎…格外誘人…




IG Link: https://www.instagra.com/nd_cotttoncandy/?hl=zh-tw



回應link: https://docs.google.com/forms/d/e/1FAIpQLScB_-FcIiKv9bnDe_pWTFd9B7sEtdiGEnKZoJeq5rjmK9JUZA/viewform?usp=sf_link