《病港２》: 187

「唔？」

拉住我手臂的，是個身穿工裝的小巧女生：「你個鳥嘴面具係我整。」

我們有個一面之緣，她是在炮台山幫我製作鳥嘴面具的女生，好像是叫昭孝喬。

「你好......」我跟打聲招呼，就準備出去：「再見。」

「你鬼鬼祟祟搞咩？」





「隔離舖係做咩？」

「中介商嚟。」她答。

「做中介轉賣嘅生意？」

「類似。」

看來關於梅姐的線索，又有新方向。





她到底轉賣什麼，才賺到剛才手上那筆錢。

答案很明顯了。

「有冇另一塊面具借俾我？」我環望全間店舖，掛在牆壁上的面具。

「係......？」

昭孝喬隨便拿出一塊達利面具給我：「呢個啱唔啱......」





「唔該。」我摘下鳥嘴面具，戴上達利面具。

之後，再把傘子和黑袍拿下，整一整理穿著內裡的西裝，就推門出去行到隔離店舖。

跟典當店舖差不多，有個窗口相隔店主和顧客，不能簡單進入到店舖的後方。

店主是個身穿黃色唐裝，帶頂西瓜皮帽子的商人。

「嘿嘿，請問客人有咩需要？」中介商人聲音陰沉。

「啱啱個女人賣嘅嘢。」我說。

「......啱啱嗰個女人？呵呵，我哋係唔會透露任何關於客戶嘅詳情。」中介商說。

「就算幾多錢？」





「嘿，我哋要守信先做到全中介業第一。」看來店主很口密。

「你成功通過咗我考驗，依樣係我想委託你哋轉賣嘅嘢。」我伸出一隻手。

「嗯？」店主看不明白。

「你睇真啲。」

待店主把頭靠近一點，我立即捏住他的喉嚨，將他扯到閘窗前：「賣咗咩，立即答。」

「吓嗄啊啊......」店主兩隻手捉住閘窗，樣子狼狽得很。

「你逼我講都無用......」店主完全掙脫不到。





「咁再見。」我將五指深深捏陷其頸肉。

「嗚嗚啊嗄呀呀！！！」店主快要窒息似的，瘋狂拍著閘窗：「我......我講......喇......！」

我稍為鬆開指勁：「講。」

「番梘......係番梘......」

「嗰個女賣走番梘？」

「係......大量......成箱成箱咁......」

「咁買家係邊個。」我又問。

「我抖唔到氣......」店主面色紅漲。





我改抓他的衣領：「好啲未？」

「 十分之好添！」突然，店主使出一招金蟬脫殼。

兩手一伸將身上的唐裝脫掉，餘下一件白色的棉衣。

「嘻嘿嘿嘿......」店主計劃得逞，笑嘿嘿地說：「我著嘅依件衫，就係為咗預防你依種人嘅存在，我唔會出嚟！你死心吧，你再唔走，你已經得罪咗某個勢力，你走唔甩，我會認住你個樣，預計十日之內，你會因為意外而死。」

「咁厲害？咁你等我一陣。」我回昭孝喬的店舖，拾起自己的火傘。

「喂、咩事啊？隔離有打鬥聲嘅......」她問。

我沒回應她，就回到中介商店裡頭。





「你仲有最後一次機會。」我將火傘對準閘窗裡頭。

「嘿？會點啊，識開槍啊？」

我按下火傘：「識放火。」

「蓬～！！！！！」

「喂！！！你係唔係癲嫁！」狡猾的中介商，立即到後頭躲火。

可惜，火勢是會漫延，除非他有後門逃走。

但依我看......

應該沒了。

「啊！！！」中介商不停地找東西熄滅火焰，可惜火勢只是越來越旺。

我待在店門前，等待濃煙把他逼出......

「仲唔走？你就快要焗死。」

「你咁樣係犯法啊！！！！」他對著閘窗外頭大吼。

「犯法？邊個睇到，你估個世界，仲係以前咁，條條街都係閉路電視同天眼？」我抱著手，搖一搖頭：「無人會睇到，亦都無人會理。」

「嗚噫噫......」

「而你就慢慢喺入面攬住啲貨物一齊死，帶住你嘅中介商守則落黃泉地獄，做你嘅地獄中介商。」

「啊啊啊！！！」中介商終於打開門，衝了出去。

我用火傘的柄勾將他弄摔，他整個人貼到落地面上，我膝壓他的腰背，扯住他的後領：「仲唔講？」

「放過我......俾我走啦......」他不斷向前抓。

「咁你唔講？」

「我講咗嘅話......一定會死嫁......！」他聲線充滿顫抖。

「無人會知。」

「係......係......係......」中介商咬牙切齒，終於透露些少：「教、教......會......」

「教會？天環教？」

「你認為係就係啦......」

我印象中，好像聽說過倖存區內的衛生用品，往往都會給教會買光。

「暫時放你一命。」我鬆開他。

「我應該都唔會活得長久......嗚嗄嗄......佢哋係一整個影子勢力......」中介商急忙地逃跑。

我轉身行入火場，店舖後頭是存放物品的倉庫，當中肥皂經已給人買走。

唯一有價值的，應該只餘下中間商的帳簿。

我把帳簿帶走，回到鄰近的面具店，穿回自己的裝備。

「隔離咩事......」昭孝喬看著濃濃的黑煙，從中介舖內部頻頻傳出。

「唔該你。」我穿回黑袍，跟昭孝喬道別。

到我行出後，中介舖外經已不少人圍觀，我若無其事地從旁行過。

對方一整個勢力？

我一個人，

就是勢力了。

回到病獵協會，我命人把梅姐即時收押，然後查看中介舖的帳簿。

如果我沒猜錯的話，他說的那股勢力，就是「天環教」。

「講下點解你要將協會嘅番梘賣出去？」

在拷問室，我直視驚惶不已的梅姐。

「會、會長......」梅姐害怕到不自抑制住顫抖。

「仲想嫁禍落黎五寶到。」我說。

「你有理由就即管講。」

「嗚噫......」

「你有二十次機會。」

「格嚓！」

十九次機會。

「啊啊啊呀──！」梅姐兩眼發直，瞪著自己的斷指。

「你應該知道自己要點做。」

「我講啦！！！講啦講啦！！！」梅姐歇斯底里的慘叫。

「咁快？」跟我想像中，有些出入。

原本還以為會有一番折騰，結果出奇地順利。

「唔好講大話。」我向梅姐靠前，直視她眼睛：「人有三十二隻牙齒。」

「會長我會如實咁講哂出嚟！」

「從簡單嘅開始先，啲籽放哂喺邊。」

「衛生部嘅衣物入面，我將啲種子放哂入去。」

「一開始係邊個搵你、點搵你、幾時搵你。」

「前、前個星期嘅夜晚......我放工嗰陣打開自己儲物櫃，見到有袋籽同信，信入面寫只要我、只要我將一定數量嘅番梘，拎到去中介商到，就可以收到相應嘅籽......」

「就係咁？」

「我諗住......大家都去哂南面打仗......唔會點用到啲番梘......咪賣少少囉......」

「但依家成個倉庫嘅量都無哂。」依我今朝所見。

「我都唔知點解呀！我明明只係賣咗少少，都係一箱多啲啲，賺下外快咁......但唔知點解其他都唔見埋，其他係俾人偷嫁！！會長你要信我呀！」就算梅姐正在招供，我都恨不得再截斷她一根手指。

梅姐說的，也不無道理。

如果我是她都不會一次過把肥皂賣光，這樣太容易被人發現。

唯一可以解釋到，就是有人存心要把梅姐當作替死鬼。

把肥皂消失被盜一事，全賴在她的頭上。

「無其他嘢講？」

梅姐凝思細想，然後對我搖搖頭。

「咁今日就結束。」我站起、離開。

「會長咁我點啊......」

「你會被判以背叛協會罪。」我說。

「背叛協會......」

「要怪就怪你自己貪小便宜。」

「因為我只係想供我個仔讀書啊，嗰筆錢夠我......」

「想供個仔讀書，食少條松子魚就夠。」

「呃......」

「呯」我關上偵訊室的門。

「入面嗰個女人，由依一日開始計時，三年後先放返佢出嚟。」我跟門外看守的病獵交代。

我打開中介商得來的帳簿，上面詳細列明各種東西的買賣進出，其中「肥皂」的一欄，就寫明了運送地點，應該說所有貨品的運送地點都一樣。

「德安樓四樓Ｂ室......」

我撕下帳簿這頁紙，打算過去追查線索。

德安樓是銅鑼灣倖存區，其中一橦大廈。

和其他的大樓一樣，基本沒什麼人流。

是那種你會經過，但不會入去的地方。

由於地方不起眼，通常會變成一些不能見光的用途，例如，製毒、賣淫、賭博、武器改裝、密醫等等。

行上窄狹的樓梯，我來到目的地的門口前。

「喀喀」我先敲門。

「邊個？」

「中介商。」我答。

「把聲唔同咗嘅？」門內的人問。

「我係佢手下。」

「中介商除咗本人之外，唔會搵其他人帶嘢嚟......你唔以為我唔知，你醒定定嘅就好走，唔好亂咁白撞。」門內人警告我。

「你唔開門，我就放火。」

「我就唔信你會咁做。」

火傘預備，發射。

「蓬～！」

燃燒起木門後，我在外面抱手等待。

一會兒後......

「有煙嘅......」

「有火呀！」

「嘩啊！撲熄佢呀──！」

我到現在才明白到，火傘的最大功用。

很快，入面的人就把門打開，看他望見我的愕然眼神，應該是忘了我在外頭。

「呯！」我起了飛腳，把他一下踢入去。

「嗚哇......」他狼瘡地跌倒地板上。

「拎武器呀！！」他大喊。

單位走廊內，有名長髮的地痞握著鐵棒跑來，我舉起火傘格擋，然後又一腳踢開他，並向前按下火傘發射鍵。

「蓬～」火焰雖然只有一秒，但足夠惹到地痞。

「啊呀！！」第一個給我踢倒的地痞，想從後把我抱住。

我把火傘向後迴旋一揮，傘身重重打擊落其頭顱上，地痞終於倒地不起。

「只係兩個人？」我問。

在地上滾來滾去，好不容易撲熄火焰的長髮地痞，戰戰兢兢地回答：「你係咩人......」

「你哋答我先。」我將火傘舉向他鼻前，那噴射管還殘留著火燒的氣味。

「我哋係只係送貨......」他舉起雙手。

「送貨，送到你哋咁鬼祟？」我說。

「我哋送嘅唔係正常嘢......」

「咁係咩？」

「啊噫......」

「答我。」我用火傘戳一戳他鼻頭。

「贓物......」

「專門運送贓物......」我隨意望兩眼，屋內的贓物：「嗰個中介商專收購贓物？」

「係......」

「番梘喺邊？拎出嚟。」

「咁我要企起身先，唔好開火......」他雙手保持舉高，慢慢站起來。

地痞快速把肥皂拿出：「依到係你要嘅番梘，希望你會為舊番梘殺咗我......」

「原本係要送去邊。」我問。

「送去......送去......鰂魚涌到。」

「即係鯨寨。」

「係......」

「地點？」

「某個垃圾桶到，好難同你詳細咁解釋......」

「咁你就帶我去，如果唔係依到所有貨物竹，就準備上繳俾政府。」

為了自己的貨物，這名地痞不得不帶我到肥皂的送貨地點。

鯨寨某橦工廈，其中一層的垃圾桶。

「咣」地痞就這樣，把肥皂放入去。

「就係咁？」我全程監視著他。

「我哋全部交易都唔會面交......」

「肥皂原本交易時間係幾時？」

「凌晨兩點鐘嗰陣。」

我點點頭：「你走。」

「多謝大佬！」地痞跑落樓梯去。

看來，在凌晨兩點鐘前，我都不會知道購買肥皂的人是誰。

於是，我先把肥皂收起來，先出席等會議員的見面。

肥皂事件調查到現在，感覺有人刻意一層又一層加密，來掩蓋自己的真正身份。

如果真正的幕後黑手，早已偷掉一批肥皂的話......

真的還有需要，購買現在剩下的肥皂嗎？

按照約定時間，來到銅鑼灣倖存區的歌劇院外頭。

歌劇院外算是少有會聚集人群的地方，跟平日滿目蕭然的街道不同。

「會長。」博海德比預定時間更早到達。

「議員嚟咗未。」

「到咗，入埋廂座。」

「帶我去。」

「好。」手持一瓶紅酒的博海德，領我入環境昏暗的歌劇院：「會長你朝早去咗邊？」

「調查啲事。」

「係我可以知？」

「病獵協會嘅番梘俾人盜去。」

「番梘都偷？都係嘅咁值錢。」博海德稍稍回頭，問：「查到邊個做未？」

「衛生部嘅主管。」

「居然係啊阿梅姐......」

「不過佢只係替死鬼。」

「你意思係......」

「佢偷嘅數量，只係佔好少，可能只係一、兩箱？少到唔會發覺嗰隻，但因為突然有人偷哂所有番梘，先令到呢件事浮上水面。」

「時間又會咁吻合......」

「所以，梅姐應該只係俾人當咗做替死鬼，真正嘅兇手要將所有番梘被盜嘅罪名，擺哂落佢到。」

「咁你調查成點？」

「對方用咗好多重手法，去過濾掩藏自己身份，又搵中介商、又搵速遞，層層咁躲避，最新就查到買家嘅交易地點。」

「搵到人？」

「今晚先知道，但估計接頭拎貨嘅人，都唔會係真正嘅買家，更簡單啲講，就係我追查緊嘅依條線，可能唔會搵到幕後黑手......」

「呵，咁會長你仲查落去？」

「因為總有第一個牽頭人，如果知道佢係邊個就可以。」

「不過做到咁嘅地步，就係為咗番梘？有啲吃力不討好，話哂俾病獵協會盯上嘅話，係件好麻煩嘅事，就算有錢賺都好。」

「無錯，除非呢啲番梘係必要品......」

而必須用到肥皂的人，就只有需要掩藏臭味的詭人。

「到咗。」來到廂座門外，博海德低聲向我說。

「喀喀──」博海德輕輕敲門，第一個入去。

歌劇院的前身為大型商場改建而成，舞台設置於商場的大堂，普通座位則設置在舞台正前方，廂座是借各層貼近欄杆的位置設立，能以俯瞰式角度觀賞舞台。

一張廂座位置的門票，大約是倖存區平民的半個月工資，但聽聞這套《洋子的約定》很熱門，因此價格炒高了兩、三倍多。

「田議員你好。」博海德行到議員的一側。

那名叫田永和的，也站起來跟我們握手：「博病獵你好，病獵會長你好，歡迎，坐低先。」

田議員五官端正、頭髮淨潔，外表上沒有政客狡猾的嘴臉......外表上。

我和田永和坐到舒適的沙發上，博海德則站在一旁。

「小小心意，田議員。」博海德放下紅酒。

「喔？唔得唔得，咁樣唔係幾好。」意外地，田永和沒很爽快地收下。

「你就收咗佢，酒我協會倉庫多的是。」我說。

「咁靚嘅酒，就不如即場開咗佢一齊飲吧口？」田永和建議。

「都係個好意義。」

「我叫人去拎隻杯。」博海德主動行出廂房。

現在，剩下我們兩人。

「病獵會長，你真係好神秘。」他說。

「嗯？」

「一個......戴住個面具突然出喺港島倖存區嘅男人，用最短嘅時間接任咗協會權力嘅頂點，而且其他大病獵都對你心服口服，無任何異議......你係點做到？」沒想到，他先是對我一輪吹噓，雖然都是事實。

「好難？」我反問。

他低頭一笑：「哈哈哈，如果換轉喺我哋嘅政治界，就相等於一個政治素人，用咗短短半年時間就拎到全黨派支持，成為會議主席咁，幾乎係無可能嘅事。」

「不過係時勢做英雄。」

「或者係英雄做時勢。」田永和翹起了腿，放眼到商場天花上：「你能夠了結成個盜賊營嘅利益圈子，都係件好了不起嘅事。」

「換轉其他人都做到，問題只係佢哋做唔做。」

「其實佢哋就好似墨西哥毒梟咁，兇殘嘅虐殺手法同龐大嘅利益集團，令到全個夕鯨國嘅人都對佢哋噤若寒蟬，無一個人敢企出嚟反抗，當連商人同高官都會俾佢哋賄賂，只要你有少少動作，就好快會有人搵上門，令你死得慘不忍睹，賦予你被世人記住嘅死法。」田永和拍拍自己腿，搖一搖頭：「呢啲畫面我見過，身首分離俾人掛喺天橋到，就好似係對倖存區嘅人一種警告。」

「嗯。」

「你斷咗班利益集團一大條財路，佢哋應該唔會就咁罷休，所以你好有勇氣。」田永和望向我，衷心讚賞。

盜賊營的利益集團之一，倖存區前首富應該是其一員，

「咁嗰班利益集團，你覺得會係咩人？」

「應該都係夕鯨國最有錢嘅企業同埋天環人，畢竟佢哋好多檯底下嘅利益交易，仲有要清除嘅敵人......以前都需要靠盜賊營幫手。」

「咁我有冇得罪到貴黨？」

「呵......」田永和笑而不答。

「喀」博海德回來。

他為我們兩人倒了杯酒，然後站到一邊。

「講返正題，點解你會想參觀下金鐘嘅隧道，係關你哋協會近日嘅行動事？」

「我哋咁大動作，成個金鐘都應該知我哋搞緊咩。」我說。

「知係知，但都需要你親自確認下，確保唔會危害到倖存區先。」

「南面。」反正各部隊經已深入戰線，說出來都無所謂了。

「去南面......」

「好反感？」

「呵呵，當然唔係。」

「你哋經歷過第一次南征戰爭，應該好反感先係。」

「大家當時反感嘅，最主要係投入人類大量資源人力物力，都得唔到相應嘅回報，如果依家只係你哋協會單一咁南征，大家應該無咩異議，畢竟損失嘅都只係你哋。」田永和撫著腮子，說：「但唔怕同你講，就當係你請我飲依枝酒嘅回報......保守派嗰邊，經已對你有所行動。」

「嗯？」

「當然，詳情我唔知道，但嚟緊你嘅南征計劃仲會唔會咁順利，係未知之數，莫講過話金鐘嘅地下鐵隧道，保守派一定會反對，而且地下鐵區域由天環人管理。」

「嗯......」

沉默半晌，田永和才說：「我有個建議。」

我看向他，他的眼睛瞧了博海德一眼。

「博海德，暫時出出去先。」

「嗯，會長。」博海德步出廂房。

看來，是只能兩個人知道的事情。

「假如保守派某個重要議員，出咗少少意外......」田永和的微笑溫和，但話中帶話：「咁你應該就可以放心，繼續自己嘅計劃。」

「咁樣未免太激進。」說白了，他想清除政敵。

「喺依個世界你只要慢一步，就會俾對手捷足先登，不如先俾你參觀下金鐘嘅隧道？」

「可以？」

「我當然有方法，但只限參觀。」

「好。」這才是我來會面目的。

歌劇完結後，全劇院的觀眾都在拍掌，幾乎沒觀賞過的我和田永和，馬上就起身就走人，準備前去下一個地點──金鐘。

至於博海德，我則讓他去鯨寨那個交易地點待命，觀察有沒有可疑人物去拿走肥皂。

相比起其他倖存區，金鐘又是另一番景象。

它更像一座王城，夕鯨國的心臟地帶。

這裡的治安人員都配備了槍械，任何關係者以外的人，都禁止進入金鐘的範圍，除非得到管理人的批文許可。

我們在倖存區內的身份，要入去當然不成問題。

行到金鐘地鐵站的閘口，有幾名治安人員正駐守，而大閘旁有個類似中世紀城門的拉柄，拉下後應該就可以將鐵閘打開。

「你好。」田永和禮貌過去。

「請問有咩幫到你。」治安人員上前既是詢問，又是阻攔：「如果無其他事嘅，請遠離依個範圍。」

「如果有病獵執照？」我展示病獵執照。

「都唔好意思，依到列入咗禁區範圍，有病獵執照都無效。」

「但我聞到有啲臭味。」田永和說。

「係？」治安隊長不太明白。

「係咁嘅，我係自由派嘅議員，因為有時會聞到下面疑似有臭味傳出，我就諗緊會唔會係有病者喺下面遊蕩緊，特登搵埋病獵會長一齊嚟。」

「下面正常唔會傳到臭味上嚟......」

「但我好多黨員都聞到，會唔會係你哋監管不力？如果係嘅話，即係工作能力不足，工作能力係同你哋薪金掛鉤，咁如果下次有財政會議嘅話，睇怕我要提出扣減你哋治安部嘅人工......反正隨便搵少少籍口節源，全個政府上下除咗你哋治安部，都應該唔會有人反對？多一事，不如少一事？」田永和的嘴上功夫，真的像個議員。

「呃噫，好吧......」治安隊長很難為情地，拉開了門柄：「當我怕咗你，議員。」

「隆隆隆──」鐵閘打開。

我和田永和步入金鐘站，入面每走一步都能揚起塵埃，看來經已封鎖有一段時間。

曾經作為全港鐵最繁忙的中轉站口，如今靜得以為自己入了異空間。

即將行落樓梯前，田永和停下腳步：「你自己行落去睇下，我喺到等你。」

樓梯之下暗淡無光，田永和害怕很正常，我自是不會揭穿他。

「好。」

我獨自一人行落，周圍只有我的腳步聲，入面甚至沒有治安人員駐守，完完全全被廢置著。

跨過欄杆，我就再沿著樓梯落到月台。

到這裡，我夜視能力再好都不能清楚目睹一切，於是拿出火傘點起火苗，借它微小的火光來照明。

眾多的隧道路線，我選擇了往海洋公園方向的。

這裡感覺就跟鰂魚涌差不多，一樣是伸手不見五指，但我要留意的是病者的踪跡，包括他們的氣味和聲音。

我向前走了大約十分鐘，看起來沒什麼異樣，可正當我有這個想法時，奇怪的事情就巴不得馬上出現了。

我感覺自己踢到了什麼，於是把火傘向下一照，結果照著個全身如同枯萎瘦樹的人。

我往他全身上下照了一遍，其周身灰暗，皮肉乾枯貼骨，肚腹低陷，五官自溶，是典型的乾屍。

形成乾屍的條件，是需要在乾燥或沒有空氣的地方下，讓細菌微生物難以生存，使屍體迅速脫水。

金鐘地鐵站沒有通風系統，長期又處於封閉狀態，在站內死後會變成乾屍不出奇。

但奇怪之處，在於屍體上並沒任何傷痕。

如果推測下去，他生前可能是突然猝死，然後屍體就躺在這兒。

為了解答自己的疑問，我又繼續向前......

結果，我遇到更多的乾屍。

他們有的雙手貼著壁死去、有的明顯帶住恐懼死去、有的捏住自己頸部死去，有的以跪著的姿勢死去，總言之情況十分詭異。

一個人變成乾屍而成，正常。

一群人變成乾屍而成，就有問題了。

此外，我在地上發現了些東西：「耳塞......？」

不難發現，路上跌落大量耳塞。

「......病童？」我冒出這個念頭。

因為在全黑的情況下，戴上耳塞就等同扼殺自己最後的感觀官，萬一其他病者的笑聲來襲，都無法作出抵擋。

在權衡利弊之下，我選擇繼續用耳朵去聆聽外界。

反正，我自從繼承白鯨的記憶後，精神力經已提升了不知多少倍。

普通三、四隻病童同時釋出腦波干預，都不會對我起到什麼影響。

我繼續深入隧道，入面存在病童的證據就越來越明顯。

其中包括，刺耳的聲音、閃爍不定的光影和雞皮疙瘩的感覺。

我很確定自己，經已進入了病童影響的範圍。

因為隧道會有回音的情況出現，所以我和病童的距離應該未算太近，只是出了點輕微症狀。

不過出現了這些症狀，都代表前方的病童不能少看......

「嗚......」

出現了。

「嗚嗚嗚......」

好接近。

突然間，一抹快速的光影穿過我全身。

我被這畫面嚇到一嚇，但我很快回過神來，重整好思緒繼續向前行，因為應該只是幻覺。

如果輕易被幻覺嚇怕，就很容易被病童影響到，導致極為嚴重的後果。

從現在開始，我打醒了十二分精神。

一手持火傘，一手持劍傘，只要有什麼情況，就會揮劍砍下去，不問什麼理由。

「嗚嗚嗚......」病童的哭聲就在我五步之內。

我舉起火傘向前一照，有隻女病童在哭泣。

「嗖！」我快速一劍砍落頸部。

哭聲戛然而止。

「嗚嗚......嗚嗄嗚嗚......」

又有第二、三、四把哭聲土。

都好，在我控制範圍之內。

面對沒有任何物理攻擊能力的病童，我毫髮未傷的收割掉她們的頭顱。

孩童的脖子比較細軟，砍下去手感很順。

「咚」最後一名哭泣的病童都解決。

死掉的四名病童身後，是一輛港鐵列車，因為它微微打側疑似出軌，我有必要透過車廂通過到尾端。

毫無顧忌的我直接行入到車長室，這次沒什麼巨型眼球，看似一切都很平穩......

直至我打開車長室的門，面向全車廂。

我感覺到前方有礙物，而向前一照......

這輛港鐵列車的車廂內，站著水泄不通的病童。

我表情由平淡轉為發怔，其後......

他們全部抬頭望向了我。