[喪屍][愛情][奇幻] 滅屍救港: 三十九 九龍塘(5)他心中的「她」
「小華?」女孩問。
「點解你會喺度嘅?」小華問。
「佢係邊個?」我問。
小華抓抓頭。「佢係我嘅青梅竹馬阿菲。自升中之後,我哋一家搬咗屋,已經有兩年冇見啦。」
「哦...」唉,想必他們倆很親密吧。
「你哋喺邊度嚟?」在入境站的男職員問。
「其實我哋淨係過境㗎啫。」拿著鐵通的男人說。
「唔好意思啊,我哋依家就嚟食飯時間,有規定過境嘅人都要嚟食。同埋要登記庇護。」男職員回應。
「咁好啊? 咁依家申請趕唔趕得切啊?」男人說。
「ok啊,填表呢邊啊。」男職員指向我們的櫃位。
他們走到我們的攤位。
「咦? 小華,早晨喎! 好耐冇見啦。你隔離個女仔係...」拿著鐵通的男人拍了拍小華的肩。
「我叫小芳,係小華嘅女朋友。」我說。我看一看阿菲,她好像有點尷尬。
「哇,大個仔啦喎,有女朋友? 想當年,你同阿菲玩嗰陣,我同你阿爸話,你呢個好仔唔驚搵唔到女朋友。
啊,唔記得介紹自己,叫我偉叔得啦。阿菲係我個女。」男人說。
「hi。」阿菲與我握手。
他們填完表後,我們作覆檢便批出庇護了。
同時接更的人也來了,帶著飯盒接手。我們便回嘉年華區吃飯。
到現在,我才可以看清嘉年華的盛況: 有不同的攤位設置在馬路上,小朋友圍集在一起玩耍。
有投擲東西,水槍,不同運動的體驗等等。
「哇!好多嘢玩啊! 我哋等陣不如同英秀佢哋調更啊。」我輕輕地搖了小華的手臂。
小華卻只顧著與阿菲談天,沒有理我。
「喂呀,同你講緊嘢啊。」我說。
我真的不想第一天跟他在一起就因為另一個女孩吃醋...
我鬆開了牽著他的手,去跟一個男職員談天。看你會不會吃醋。
「師兄,你下更頂邊啊?」我問。
「um...實驗室。」他答。
我望一望小華,他竟然沒有理會我! 真是...
「有咩做?」
「機密。」
「你哋呢度有冇幫派?」
「呢層...我唔太清楚。係呢,點解你哋會過嚟呢度嘅?」
「到啦,不如等陣傾?」
「好啊。」
我們幫阿菲和偉叔到接待處辦理手續,便找回一心他們吃飯了。
突然,有人在我身後抱住我。我本想下意識地反擊,但發現那人是小華。
「sorry,我頭先冇聽你講嘢。」小華說。
「算你啦。依家非常時候,今日見完都唔知聽日見唔見到面。」我說,並親了他的額頭一下。
我們一行人找了位置坐下。
阿菲主動坐到我旁邊。
「小芳,你同小華幾時一齊咗?」她問。
「琴晚。」我笑著說。
「呢個人啊,蠢蠢地但又好識氹人。你就好啦,咁好嘅男仔好難搵㗎。」
「多謝你。」
「唔洗。不過你頭先見到我哋傾計,唔呷醋咩?」
「女人呷醋,好正常啫。」
「放心啦,我雖然都同佢算係青梅竹馬,以前對佢都有少少好感,但放心,我唔會同你爭嘅。」
「唔好反口啊。」
「得啦。」
我們吃過飯後,我和小華要去接下一更了。阿菲和偉叔決定要留到晚會後才離開。
我們決定了跟著剛才和我談話的男職員去防禦學校的實驗室幫忙。
就此,我們無意中揭穿了九龍塘安全區驚人的秘密!