[喪屍][愛情][奇幻] 滅屍救港: 四十八 九龍塘(14) 難關
-母親節快樂-
-幼羚視角-
我聽到喜歡的男孩竟然知道那麼多,很是驚訝! 我心裏出現很多問號,很想問清楚英秀。
軍官「哼」了一聲,便鎖了我們在裏面。
「你究竟亂噏乜啊? 乜你老豆真係知解藥喺邊咩?」允恆憤怒地問。
「你係咪有嘢瞞住我哋啊?」一心問。
「就當我亂講囉! 我好攰啊,俾我唞一陣好唔好?」英秀說。
「做咗咁耐兄弟,都唔可以同我講真話啊?」允恆說。
「你夠唔會同我講你想同你條囡搞嘢,但你條囡話要結婚之後先搞得。」英秀發悔氣地說。
「關你咩事?」允恆作狀想和英秀打架。
「咁我老豆嘅事又關你咩事? 佢未必俾解藥我哋,但佢肯定有辦法將解藥俾解放軍,然後我哋咪走得囉。」英秀說。
「英秀,究竟你啊爸係咩人啊? 佢點會有解藥? 佢仲有同你聯絡㗎?」我忍不住問個究竟。
「係咪連你都要咁煩我啊?」英秀怒道。他本來真的不像是發這麼大脾氣的人,看來是我惹怒了他吧…
「對唔住啊…」我向他道歉。
「總之冇人再入嚟之前,唔好再搵我。」英秀走到一個角落,躺在地上。
一心瞪著允恆。「你係唔係成日諗住同我做愛!?」
「咩啊… 我躺著也中槍喎。唔係囉好唔好…」允恆尷尬地說。
一心走到一旁坐下,不理允恆。
我不知道該怎麼辦,便踱著步,在思考著。
「喂,小華,我唔明喎。以前我同一心未一齊嗰陣都唔會鬧交,佢依家三日唔埋兩日就嬲咗我…
點解你同小芳好似冇鬧過交咁嘅?」允恆問小華。
小芳聽到了,就笑說:「咁你諗下,你同一心識咗幾耐? 我同小華又識咗幾耐?
咁你哋之前未一齊嗰陣,你哋都將對方嘅優點放到最大,而唔知道佢其實真實嘅一面係點。
所以…我諗你要包容下佢。」
「我哋早幾日先一齊,又好夾,所以咪冇鬧交囉。
我哋咁多個都仲細,如果你真係認定咗佢,就認低威啦。
男人放低自己尊嚴好難,但你愛佢嘅,就為佢改變啦。」小華勸說。
我一臉愁容地坐到小芳身旁。
「唉…羨慕你哋啊…
我以前冇諗過拍拖,直到遇到英秀。但係,依家我連佢有冇咩嘢瞞住我都唔知道…
你哋心入面又會懷疑佢係鬼,我唔知應唔應該繼續鐘意佢。」我將一腔苦水說給小芳聽。
「連我做咗佢四五年兄弟都唔知,你只不過識咗佢一個月到,算啦。
個死仔又係嘅,咁大件事都可以好似隨口噏咁。」允恆說。
「愛情呢樣嘢,真係可以使人盲目。
你未有太多經歷,我只能夠講,你如果信佢嘅,就同佢喺埋一齊囉。
但小華你唔好介意我咁講,如果嗰個人係你,我都未必會同你繼續到,
因為我想大家坦誠相對,唔好將重要嘅事情收收埋埋。」小芳說。
「我應承你,一定唔會呃你。」小華說。
看來,我要理性地想清楚—
不,我一向都很理性,但在我跌入英秀的溫柔之後,我就回不了頭,被他深深吸引著,好像失掉了理性。
但,我還是喜歡他的,只是等他開口,我就是他的人。
「喂,點啊? 又變咗感情台啦? 我哋唔可以咁樣困喺度!
如果唔係,到你哋話嗰個咩煲底嗰日,我哋都未出得翻去啦。」修端說。
一心也回來了。
「呢度咁大,plan點走都要有地圖㗎。
上次我哋被捉入嚟嗰間房,距離鐵絲網都有幾棟樓嘅距離啦…
呢度都唔知近唔近鐵絲網,連太陽都見唔到,點走啊?」允恆說。
「咁即係你覺得送頭啦?」一心說。
「我唔想再衰第二次。」允恆說。
「喺囚牢中,我哋要主動破局。」小華說。
英秀走過來,說:「所以我咪講解藥件事囉。又唔想逃走又唔想齋等人救,咪只係得解藥囉。」
「咁你依家有冇喺手?」允恆問。
「冇,但係以我老豆嘅地位,就算佢話唔到事,佢老細都話到事,用解藥換人質。」英秀說。
「我諗到第四條路。我作為一個真預知者,可以用呢點同佢哋講數。」一心突然說。
「我以我哋七個嘅自由作為條件,將我心靈感應其他預知者同報料俾我嘅國安嘅情報講俾佢哋聽,
當中包括佢哋如果打喪屍成功同失敗會有咩清算。
而我只能夠自己一個人去,因為我哋七個入面,只有我一個知道之後香港情況嘅走向。」一心續說。
「咁你知唔知道我哋今次得唔得?」小芳問。
「我相信係得。預知都係咁講,通伯都係咁講。」一心說。
「我哋依家使唔使搵班軍人?」我問。
「你俾我少少時間準備下。」一心說。
「點啊使唔使我錫埋你啊。」允恆說。他們真是一對很可愛的小情侶。
「你好衰㗎。」一心說。
允恆輕吻了一心的額頭一下。
「啊嫂,唔好意思,頭先我火遮眼先鬧恆哥成日諗住同你搞。放心,恆哥唔係咁嘅人。」英秀對一心說。
「啦我就唔係好小氣嘅,我原諒咗你同允恆㗎啦。但係我諗有個人你一定要同佢say sorry。」一心說。
英秀牽著我的手。「對唔住啊,我唔應該同你發咁大脾氣,係我唔好。
我知你好關心我,我都應該對你體貼啲。
因為,我想你做我女朋友。」
我聽到這句,心跳加速著…
我在眾目睽睽之下,覺得有點尷尬。
我望一望身後,其他人已經到了另一邊,這才放鬆了一點。
我腦內閃過很多個念頭,思緒不停轉動。
終於,我決定了,我是愛他的。
「我願意。」我說。
我投入他的臂彎裏,感受著他的心臟跳動。
此刻,我終於明白了甚麼是愛情。
未來還有很長的路要走,我不管他家人是誰,無論如何,他都是我的愛人。