[喪屍][愛情][奇幻] 滅屍救港: 五十七 界限街(4) 馮權與解藥
我們上樓梳洗過後,便和阿樂他們商討之後的打算。
「咁你哋點啊? 聽阿賢講話你哋想搵馮老太同馮權喎。」阿樂說。
「就係咁囉。」英秀說。
「你哋唔覺得太out fo啦咩?
我哋係要打喪屍,唔係去啲支線,談咩判搵咩狗。」小芳提出。
「你哋慢慢拗啦,香港都係光復唔到啦。」阿森說。
「咁投票囉。」小芳說。
最終,五票贊成,一票反對之下,我們決定了找馮權。
「馮權通常就會喺五點落更之後去附近嘅天橋坐嘅,到時我可以帶你哋過去。」偉賢說。
轉眼間,時間到了,我們跟著偉賢到了天橋。
「喂,阿媽? 今日差館冇咩嘢啊,啲喪屍冇出現過。
…
唔講住啦,有人搵我。」一個男人坐在上面講電話。
「咁多人啊? 我馮權呢唔係好鐘意你班暴徒。」男人說。
「你又話變節? 依家佢哋就係搵你傾解藥單嘢。」偉賢說。
「哦。一個啦,留一個喺度。」馮權說。
因為英秀對解藥的事知道得比我們五個多,所以談判的「重任」就交到他身上。
我們便在天橋底等他。
為防他和馮權的對話變了「摸底」,偉賢事先把錄音筆放進他的口袋裏。
不久後,英秀回來了。
「佢話警方唔會合作,所以唔會有解藥流通。」英秀說。
「但係幾百萬香港人喺水深火熱之中喎!」小芳委屈地叫道。
「物競天擇,適者生存。」英秀說。
「放喪屍出嚟屠殺我哋都叫我哋進化論?」小芳不服。
「係囉,我哋應該當佢哋係敵人算。」允恆說。
「你哋唔係不嬲都咁諗咩?」英秀問。
「咁又係…」小芳說。
「係時候要走啦。」偉賢說。
趁英秀不注意的時候,偉賢取回了錄音筆。
我們回到阿樂的家, 藉口有事情要商量,使走了英秀,便和偉賢一起聽英秀究竟和馮權說了甚麼。
大概就是他問馮權為何這條街上所有人都聽他的話;
馮權承認自己曾經以母親的名義給過居民解藥!
「咩話?咁咪好大鑊?你哋知唔知?」我問。
「我聽講過。」偉賢說。
「咁其他區呢?如果其他人知道,咁咪會過晒嚟囉。」允恆問。
「所以我哋唔太歡迎外人。」偉賢說。
「解藥喺邊?」小華問。
「我都唔肯定。」偉賢不肯告訴我們。
我們繼續聽著他們對話的錄音,才發覺兩人對時局的真實狀況知道得比我還多。
他們還談了解放軍最近在九龍塘的行動和讓解藥流通的合作計劃。
當然,如英秀所言,馮權沒有答應讓解藥流通於香港。
「不如留喺度搵解藥。」聽完後,小芳說。
「其實刀派都喺附近搵緊。
佢哋唔算同馮權熟,但佢哋同馮權一樣好憎泛民政黨,所以佢哋諗住殺其中一啲政客,
交人頭俾馮老太,討好馮權。」偉賢說。
「咁我哋點做好?」幼羚問。
「去條街後啲嘅地方搵食咗解藥嘅人。」偉賢說。
於是,我們和偉賢他們道別,再和英秀會合,就到了界限街後一點的地方。
馬路上堆滿了垃圾,有人在垃圾堆中找東西吃;但垃圾堆中沒有屍體。
一看,原來屍體堆在一些大廈的出入口。
我們強忍惡臭,抬走血淋淋的屍體,步入其中一幢大廈。
這幢大廈只有三層高,我們分組找有沒有生還者。
當我、允恆和幼羚正因遍尋不獲人影而苦惱時,我發現了一個單位的閘和大門推開了一點點。
我示意組員站到我的身後,偷偷看著裏面:
只見有個臉上有青筋的女孩抱著玩具熊,靠著門瑟瑟發抖;
她身後是她父母的屍體,桌上放著一瓶解藥和一碟食物。
小女孩發現了我們,放聲大叫: 「森哥哥,救命啊!衰人啊!喪屍啊!」
我們決定假定她說的「森哥哥」就是偉賢的隊友阿森,所以我們可以以「阿森朋友」的身份令她信任我們。
我便深呼吸了一下,走到大門前,輕聲說:「我係森哥哥嘅朋友啊。但我唔知你叫咩名喎。
不如你出嚟話俾姐姐聽你叫咩名?」
「我唔信! 佢點會有呢啲咁嘅朋友! 你係喪屍,你殺咗我爹地媽咪!」女孩激動地說。
我不禁心頭一酸----這個女孩本來應該可以和家人有幸福的生活,卻被喪屍破壞了…
這時,其他人都和我們會合了,並告訴我們其他單位都沒有人。
我叫他們先靜一靜,讓我請屋內的小女孩出來。
「妹妹,你睇下姐姐個樣先? 有冇青筋同皺紋?
姐姐真係唔係喪屍,係想幫你嘅人類嚟㗎。」我耐心地說。
她疑惑地打量著我的身體,又瞄了瞄屋外看著她的我的隊友們。
我留意到她的視線轉往了隊友們,便說:「佢哋係我隊友,都係嚟幫你㗎。」
她放下了玩具熊,冷酷地問了一句:「我要出去?」
「你出嚟會比較好。出面有個地方,有嘢食,一唔一齊去?」我說。
「咁我帶埋啤啤去。」小女孩拾起玩具熊。
我們和小女孩出發到了「手足飯堂」吃飯。
途中,小女孩被馬路上的恐怖狀況嚇壞了,我輕輕抱住她,不讓她看到那麼多恐怖的東西。