[hehe]《知音人》: 十一：機會

Horace、Edmund和Steven晚上在一家火鍋店一邊吃、一邊談。
 
Steven：「今餐唔使同我客氣啦。」
Edmund：「咁好死請我地食飯呀。」
Steven：「多謝你地上次係hall樓下打救我嘛。」
Horace：「本身諗住叫埋呀Roy架，不過佢原來返左屋企。」
 
本身害怕尷尬的Edmund因為有Horace在場，亦慢慢放鬆，自然地與Steven傾談著。食到一半時候，Horace有事走開聽了個電話，餐桌只剩下另外兩人。
 
Steven：「之前做咩避開我呀？」


Edmund：「邊有啫？」
Steven：「又唔覆我message又唔應約。」
Edmund：「而家咪係你面前囉。」
Steven：「你搵Horace過橋咋嘛。」
Edmund：「唉，你知就好啦，仲問。」
Steven：「咁我係想同你做返朋友啫。」
Edmund：「你呢D風雲人物唔係好多朋友咩？又高大靚仔又係籃球隊長。」
Steven：「朋咩友呀，上次Catherine單野個個淨係食花生，得你地肯幫我解圍咋。」
Edmund：「做朋友無所謂，但你唔好再比假希望我啦。」
 


Steven靜了下來，沒說話。Edmund見場面突然冷卻，便去廁所化解一下尷尬的氣氛。
 
Horace講完電話回到餐桌，只見Steven一人。
 
Horace：「Edmund呢？」
Steven：「去左廁所啫。」
Horace：「哦。」
Steven：「係呢，你同Edmund好熟架？」
Horace：「OK啦，呢年半都係佢同我一齊上堂溫習jam歌咁。」
Steven：「咁你知唔知佢近排有無咩唔妥呀？」


 
Horace望一望Steven，笑一笑：「呢樣野你清楚過我啦。」
Steven：「咁…你覺得佢點諗呀。」
Horace：「你唔直接問佢？」
Steven：「諗住問你睇清下情況點先決定嘛。」
Horace：「佢點諗我真係唔清楚，佢自己都未必清楚，但我知你如果繼續咁樣唔拖唔水，對你對佢都唔會係好事。」
Steven：「嗯。」
Horace：「咁大個人，做野爽朗D啦。」
Steven：「咁你肯唔肯幫我？」
Horace：「點幫你呀，賣朋友既野我唔做架。」
Steven：「唔使賣，轉頭食完飯好似頭先咁行開陣，比我同佢兩個單獨幾分鐘就得。」
Horace：「哦，無問題啦。」
 
說畢這句，Edmund就回來了。
 


吃完飯後，三人決定到海傍走走，消化一下。走了一會，Horace識趣地聽了一個電話而走開，讓兩人獨處一會兒。
 
Steven：「喂，黃永樂。」
Edmund：「做咩呀？」
Steven：「肯唔肯比個機會我？」
Edmund：「下？比咩機會你？」
Steven：「我知以前令你失望過，但果陣我自己都唔知自己想點，逼自己去中意女仔、追女仔，但而家…」
Edmund：「唔好咁啦，李家豪。我地無見幾年，你都無搵過我，而家見返我兩三次又叫我比機會你，你叫我點諗呀。」
Steven：「我知呀，但見返你之後，我發現我對你係有感覺架，比機會我證明比你睇。」
 
Edmund不發一言，他自己也不知道自己怎樣想。Steven見狀，也沒有再說下去。
 
Horace遠處見到他們兩人突然靜止，便回去嘗試化解尷尬局面。
 
Steven：「我有事走先啦。」


Horace：「哦，好啦，Bye。」
Steven：「Bye。」