[hehe]《知音人》: 十九：媒人

Horace和Edmund一如以往坐在課室的一個角落，盡量避開講師的視線，避免回答問題。
 
Horace：「喂，兄弟，生日快樂呀。」
Edmund：「謝啦。」
Horace：「有無約人食飯呀？」
Edmund：「Lunch？無呀，同你食囉。」
Horace：「好呀，見你生日，請你出去食好西啦，唔好係飯堂度食咁頹，橫掂三半先有堂。」
Edmund：「嘿嘿，多謝哂。」
 
Horace又趁著Edmund不留意的時候向Steven發了訊息，跟他說今天Edmund的行程：「陣間我地上完堂會返Hall先，然後出去食飯，地點未定，下午三半會返來上堂，上到五半，夜晚唔知佢有無約。你自己諗下咩位比驚喜佢啦。」


 
沉悶的課堂總算完結，兩人帶著筆記回宿舍的途中，Steven突然從後拍了他們的膊頭。
 
Edmund：「哇頂，嚇死咩？」
Steven：「生日快樂呀，送比你架。」他遞出一個紙袋給Edmund。
Edmund：「多謝啦，你又知我地係度既。」
Horace：「係囉，你跟蹤我地架？」唯有配合一下以免被發現賣朋友。
Steven給Horace一個奇怪的微笑，然後說：「要知道你地幾點上堂落堂有幾難啫。」
Edmund：「哦，好啦，見你咁有心，咁一唔一齊食飯呀，我地出出面食，將軍請。」
Horace：「哇，我請你咋，佢又唔係生日。」


 
Steven露出受寵若驚的眼神，然後說：「好呀，梗係你唔使請我啦。」難掩開心的神情。
 
Horace看著Steven的反應，笑著說：「咁行啦，上去我間房擺低野就出上環啦。Steven你下午有無堂呀？」
Steven：「三半囉，大把時間啦。」
Edmund：「我地都係三半wor。」
 
Horace突然覺得自己又變了電燈膽。
 
到了餐廳後，Horace也很識趣地讓兩人坐在一邊，自己單獨坐另一邊，然後看著對面兩人互動。


 
Steven：「喂，今晚有無約人呀？」
Edmund：「返屋企食飯呀。」
Steven：「哦，仲想約你添。」
Edmund：「有無誠意架，而家先黎約我，24小時隨時候命咩？」
Steven：「唔係咁既意思，唔緊要啦。」
Edmund：「不過有人請我食飯我唔介意既，聽晚得唔得呀。」
Steven：「得呀，就咁話啦。」
 
Horace看著Edmund這個兄弟對著Steven慢慢由抗拒變成接受，到現在「撒嬌」式地說著，似乎兩人「有情人終成眷屬」只是時間的問題。
 
當Steven去了洗手間的時候，Horace再也忍不住。
 
Horace：「有人而家有同性無人性啦，成程淨係同人傾計理都唔理下我，早知唔比佢黎啦，搞到我變左電燈膽。」
Edmund：「哎呀，唔好咁講啦，最多叫Steven介紹返個比你囉。」


Horace：「閘住，我先唔使你地做媒人。」
Edmund：「咁又係，明明你先係個媒人。」
Horace：「你講咩呀？」
Edmund：「你唔係以為我真係唔知，佢今日會出現都係你幫手安排啫。」
Horace：「冤枉呀大人，我只係同佢講我地今日幾點有堂上咋，無諗住佢會跟埋黎食飯架。」
Edmund：「我講笑啫，頭先係我叫佢來既，知你好心。」
Horace：「你睇下你個樣，笑到發哂姣咁，係人都睇得出你冧佢。」
Edmund：「有咁明顯咩？」
Horace：「你自己照下鏡咪知囉，幾時開始呀？」
Edmund：「未呀，呢D野佢決定啦。」
Horace：「睇唔出你咁港女架wor，傲嬌到你呢。」
 
Steven此時回來，兩人馬上停止話題，然後一同笑了幾聲。