[hehe]《知音人》: 七十三：寄意

Darren在觀眾席一直翻著學生會準備的簡單場刊，看著獨唱的參賽者、參賽曲目和出場次序，然後突然叫了一聲：「哇！」
 
坐他兩旁的Steven和Wilson馬上用一個凌厲的眼神看著他，仿佛在說：「無啦啦嗌乜_？」
 
Darren：「唔係呀，你地睇下，獨唱第四個，楊俊朗，語言學系，曲目《朋友身份》。」
Steven：「哇，係喎，Wilson你知唔知架？」
Wilson：「佢都無同我講過野。」
Darren：「好彩捉埋你黎睇啫，唔係你又錯過左。」
Wilson：「唉，唔好提啦。」
Steven：「其實你做咩咁苦惱？」


Wilson：「你唔明啦，明明係好朋友，但而家…」
Darren：「算啦，你都控制唔到架啦，佢咁大個人，等佢自己諗通啦。」
 
觀眾們聽完首三位參賽者的演出，就到Oscar出場。由於是初賽，司儀亦沒說太多的簡介，前奏音樂很快就響起。
 
Oscar在前奏音樂響起時拿起咪高峰說：「呢首歌，送比我一位好好既朋友，希望大家喜歡。」
 
Oscar唱歌的聲線不算很突出，辨識度也不算高，但柔和的聲線聽起來卻令人感到很舒服。他起初唱的時候感情也還算鎮定，但到了臨進入副歌前的幾句，大家就開始感受到他從心底而發的一種情緒，還有點憂愁。
 
「朋友是 朋友吧 和你身份不進化 也許這一世都這樣嗎 如果你愛他 沒說話


我等你某天出嫁 然後我送上賀吻 親密無奈最多一剎那」
 
由於初賽每人只唱半首歌的關係，他只能唱到這段副歌的完結，唱完他也補了一句：「多謝，希望大家都喜歡呢首《朋友身份》。」
 
Darren一路聽著Oscar唱歌，一路斜斜看著身旁Wilson的反應，發現Wilson十分專注在看著Oscar的表演，心裡似乎是一直想著什麼，直到他唱完後，Wilson的眼神仍然很集中在台上。
 
Steven：「Oscar唱歌又幾好聽喎。」
Darren：「你上年無聽過咩？」
Steven：「合唱同獨唱唔同嘛。」
Darren：「喂，Wilson仔，你望完未？」


 
Wilson聳聳兩肩，沒有回應。Darren和Steven對望了兩眼，也沒有再說什麼。
 
唱完歌的Oscar走到台下的參賽者等候區，在Roy旁邊坐低。
 
Roy：「你又搞到咁神秘。」
Oscar：「好大壓力嘛。」
Roy：「壓咩力呀，你唱得幾好呀。」
Oscar：「唔係呀，呢首歌擺明唱比呀邊個啦，如果將軍佢地一早知，實叫埋佢黎聽，我到時真係唱唔到架啦。」
Roy：「下？你無叫佢黎聽咩？」
Oscar：「無呀，都無人知我唱。」
Roy：「但佢係度喎，你望下。」他指向Steven他們坐的位置。
 
Oscar轉身望向Roy指向的位置，除了見到身型高大的Steven外，就看到他旁邊兩個身位的Wilson，而兩人雙眼這時卻對上了。
 


Wilson在遠距離看到Oscar回到參賽者等候區，並和身旁的Roy談了幾句，然後兩人一同看他自己的方向望了過來。
 
Wilson見Oscar望著他，頓時有點不知所措，除了點一點頭外沒有什麼回應。
 
Oscar則回了他一個帶有微笑的點頭，然後指著自己手機。
 
Wilson在約一分鐘後收到了一個短訊：「無諗過你會黎，好彩我唔知，如果唔係肯定緊張到唱唔到。」
 
正當他想如何回覆的時候，再收到多一句：「之前咁對你，Sorry呀。其實我明白架啦，朋友是朋友吧。」還外加一個笑臉emoji。
 
發出完這句訊息後，Roy拍了拍他的肩膊，以示支持，而Wilson也望著手機微笑著，希望Oscar真的如他所說的真的「明白了」。