[喪屍][愛情][末日]【第二季同時連載中】我係一個平凡至極嘅中三學生，但從嗰一日開始......》: Ch.3日常驚魂（4)

佢地你一言我一語咁樣，紛紛表示完全唔關我嘅事，雖然聽完之後個心舒服咗少少，但我始終都係有一種感覺，係奇怪嘅感覺。我向佢地問咗一個問題，一個關係後半人生嘅問題，佢地頓時呆咗，但諗咗諗又講咗出黎，畢竟末世嘅來臨就快到，佢地諗到以後就未必再有機會，都開心見誠咁樣回答咗呢個問題：「在末世之下，你也有想守護的人嗎？」「有！」佢地一致咁樣回答。

突然間我地班嘅一位同學就攞起佢嘅手機向我地呢一邊跑過黎。我係遠處都見到佢面有難色，緊張到不得了咁樣。佢將佢手機上見到嘅新聞比我地睇，仲有開啟咗YT播放特首的緊急新聞講話：「今日部分地區出現咗大規模嘅未經批准嘅示威，依家外面嘅情況十分之唔安全，請人們留係屋企唔好出外，仲有連外賣都記住唔好叫，因為依家係嚴重嘅示威，街上應該完全清空，特首在此呼籲民眾請勿外出，違者重罰。」


我地6個人坐埋一齊，睇住呢條live，忍唔住異口同聲咁爆咗一句粗，問候林太嘅家人，你明我講咩嘅XD，連佢老公都睇佢唔順眼，話佢係「千古罪人」，我地對於呢個無能嘅首長完全無言加埋O嘴，真係「見佢前面，憎佢後面。」發洩完一輪之後，我地開始整理現時得到嘅所有資料，並且通知我地班嘅所有同學，叫佢地做好一切準備。講講下，有少少肚餓添，夠鐘醫肚，於是我地決定一齊圍爐食嘢。

估唔到我嘅一班同學都幾注重嘢食呢個位，佢地係背囊裏面出黎嘅物資，有百分之50都係嘢食，只有我地呢班有強烈危機感嘅人帶得比較少，帶嘅嘢食都係方便嘅同埋容易攜帶嘅。見到同學攞出黎嘅鵝肝，黑松露等等嘅高級美食，當然都唔缺少我地宅男嘅恩物，即食麵同埋罐頭肉類啦。

我心諗：「你地究竟係避難啊，定係黎度假架？？！」不過都好，我地點算過後，發現大家所帶嘅食物如果依照平日食量嘅1/2嘅話，係足夠大家食足1個月，我地仲另外帶咗gas罐，邊爐，仲有大量嘅食用油，我突然心生一計，決定上網嘗試搵下汽油彈嘅製造方法，如果成功，我地嘅人身安全會更加有保障。根據我睇過嘅咁多套電影，裏面嘅喪屍係十分之驚火嘅，一但我地投擲汽油彈去防禦，我地嘅逃生逃生時間會抽升成倍。



其中一個隊伍嘅leader Alex自告奮勇，即刻上網查咗製造汽油彈嘅材料同埋投擲時嘅安全距離，所有有關嘅資料全部都好順利咁比我地查曬出黎，然後係大家食住好嘢，烚下烚下嘅時間，我地4組嘅全部leaders都準備緊我地嘅新武器，當然有叫到出邊個班餓狼留低少少嘢食比我地幾個人，同埋都比咗大家一個心理準備，接住落嚟嘅日子，我地都要節約食物同埋煮食用嘅gas，大家聽到都露出一面可惜嘅面容，好似比緊面色我地睇咁，無奈食物有限，呢個決定都係迫不得已嘅，大家都好珍惜當下嘅時光，互相道出之前遮遮掩掩嘅秘密，佢地都好把握呢一個機會向自己嘅男神/女神表白，並且立下誓約，男嘅就話要保護好對方，女嘅就話會好好照顧男方。

對於我黎講，表白呢樣我深知唔係時候，因為班上面嘅男仔冧黎冧去都係班上幾個比較細心，善解人意嘅女仔，係呢個時候講出黎無非只係自尋死路，往往男性嘅煩惱就只有錢同埋女人兩樣嘢，我可能係較為特別嘅一個男仔，任何事都會保持神秘，我嘅秘密從來都唔會係人面前講出，除非係當事人或者我最好嘅兄弟同值得我信任嘅一兩個女仔。平時永遠閉口不談，即使到末日，我都希望可以繼續好好咁暗戀住某個人，係佢嘅身邊好好守護住佢，見到佢好好地生存落去，我就已經心足，雖然又係呢種經典嘅對白，經典嘅場面，但係呢個時候我地正正需要呢種正能量，去使我地32人嘅群組變得更加和諧，更加溫馨。

（未完待續）