那一天，有女仔嚟咗男校讀書: 第十六章:暑期旅行(第七節)

好彩我哋玩完之後冇嘔到，如果唔係就真係失禮。今次係我第一次喺小倩面前展露膽小嘅一面。不過小倩都冇特別在意，行完街之後，我同小倩去到一間壽司店，呢一間壽司店提供兩個鐘頭任食同埋廚師發辦(omakase)，我哋今朝喺民宿食咗好少嘢，所以我哋揀咗用大約每人300蚊去食放題任食。我哋首先嗌咗幾件拖羅刺身同埋壽司，啲拖羅非常肥美，又新鮮，啲魚油多到漏出嚟，好味到一個極點，真係不枉我哋專程嚟呢度食。之後我哋嗌咗大量壽司同埋刺身，包括左口魚、三文魚、牡丹蝦等等。我哋都食得好滿足。之前我陪咗小倩去睇藝術館，今次到小倩陪我去睇武士博物館，我對日本武士好有興趣，不過小倩就覺得有啲無聊，我哋喺博物館入面見到好多武士嘅武器，例如:武士刀、鎧甲等等，之後我更加有機會體驗做一個武士，原來啲鎧甲真係好重，加埋把武士刀更加令我不勝負荷，不過我咬緊牙關，堅持落去。我擺下pose俾小倩影下相，再學下點樣用武士刀。體驗完，我成身都好攰。
「不如去附近公園坐下?還掂未到食飯時間」
小倩見我咁攰，所以提議。
「好呀!」
我哋行去附近嘅公園，估唔到市中心都有咁大個公園。我同小倩搵咗張櫈坐低。佢攞出電話，俾我睇返頭先影嘅相。
「估唔到你都可以咁型喎!」
「不嬲都咁型。」
「你咁攰仲懶叻，抖下啦!」
「得啦!」
我哋坐多咗一陣，之後就出發去食飯。


「一陣唔好食咁飽喎。」我同小倩講
「點解?」
「一陣有好味嘅甜品食!」我知佢好鍾意食甜品
「好嘢!」
我同小倩簡單食完晚飯之後，便出發前往我預先搵咗嘅甜品店。
呢一間甜品店係做甜品自助餐嘅，所以我先叫小倩唔好食咁飽。
「喂!頭先先食完飯喎，仲食到咁多嘢?」我見小倩狂食，便問佢
「我有兩個胃㗎嘛！」
真係頂佢唔順，不過望住佢食嘢，佢真係好可愛。



(待續...)