《那天，我遇見一個奇怪女孩》: 第九章

一連數天的統測過去，學會日也正在籌備當中，雖然工作量不算大，但亦使了不少勁才完成所有準備功夫。

得知雪遙的母親患了癌病，內心一直耿耿於懷，很想做點甚麼去幫助她，卻找不到自己能夠伸出援手的地方。

「楠，聽日雪遙係咪會幫手整Pancake？」我和巧渝正坐在地理室，為明天的活動作最後準備。

「係呀，佢話包喺佢身上。」我說。

「唔知係咪我錯覺，呢兩日硬喺覺得雪遙冇啱啱識落咁活潑。」巧渝一邊處理裝飾，一邊噘起嘴巴說。



「我都唔知，可能佢有心事掛。」

巧渝應該仍未知道雪遙的秘密，我看還是先不要把真相說出。

「你去關心下人啦，你唔係對人有好感咩～」巧渝向我報以挑逗的眼神。

「幾..幾時有。」我把貨物疊起來。

「你唔坦白就由佢～」巧渝說。



本來現在應該跟雪遙到超級市場購買食材，但她說一個人去就可以，所以我留了在學校與巧渝工作。

而智恆和兩個毒撚則在教員室跟Miss Fung商討明天的安排。

「希望聽日可以順順利利，賣多啲錢，咁就有機會贏到免費機票，圓咗雪遙嘅心願。」

一切事前工作準備好之後，我跟巧渝便把需要用的東西搬到操場，設置攤位。

此時，智恆他們也下來協助。



「雪遙呢？」智恆問。

「去咗買嘢。」我說。

「嗯...你估聽日我哋有冇機會贏。」智恆隨意地問。

「有掛，難得我哋今次咁認真。」我說。

「都係嘅，上年Hea到飛起，相比起今次完全係天淵之別。」智恆笑道。

下午四時半，操場上陸續出現各個學會的人，他們也正在設置攤位，交談的聲音開始滿遍整個操場。

「楠，幫我勾個牌上去！」巧渝用力踮起腳尖地說。

「Ok.......」



忽然，一把很討厭的男性聲音傳來。

「咦咦咦，唔夠高擺呀？索性唔好搞啦。」李峻仁走到我們的攤位前說。

巧渝收起臉上的笑容，向李峻仁投以敵視的目光，又別過臉繼續工作。

「關你撚事？」智恆挺身而出。

「Wow！你係邊位？冇人識你喎。」李峻仁擺出高傲的姿態說。

「你條仆....！」智恆差點忍不住衝前揍李峻仁，幸好我把他拉回來。

李峻仁身邊的一個胖子和一個四眼書生，在我們的攤位上拿起幾件衣服，又作出一番冷嘲熱諷。



「賣啲咁嘅垃圾都想贏？就算俾你贏到其他學會，都唔會過到我哋籃球學會嗰關！」那個胖子挑釁地說。

為什麼要這樣...明明我們沒做甚麼...

為什麼一定要這麼敵視地理學會？！

「其實點解你硬係要針對我哋？我印象中冇得罪過你。」我也終於按捺不住。

「喔？你咪嗰條青面仔？」李峻仁說。

「冇嘅，你問下佢囉。」李峻仁輕輕指著巧渝，然後又揮袖而去。

「哎～地理學會唔係仲有個Form4嘅靚女㗎咩，仲諗住過嚟睇下佢......」李峻仁還不忘對雪遙進行一番言語騷擾。

在李峻仁離去後，我和智恆停下手上的工作，同時望向巧渝。



她，正握緊拳頭，露出不服氣的表情。

「.........」

或許，巧渝跟李峻仁有過一段不可捉摸的關係，也許巧渝暫時不想提起。

我和智恆對視一眼，便繼續工作。

經過眾人一番努力後，終於把攤位設置好，滿桌的衣物、還有巧渝精心設計的裝飾，使整個外觀看起來十分吸引。

「呼！搞掂曬！聽日肯定好受歡迎！」巧渝拍拍雙手地說。

我隨意打量其他學會的攤位，大部分設計都及不上巧渝的功架。



「果然係巧渝，長期穩踞VA全級第一唔係冇原因。」我滿意地說。

「洗乜講，抵請食飯啦！」巧渝說。

「有機會先。」我笑道。

巧渝故裝生氣地輕拍我一下，便把雜物清理乾淨。

這時，在外的雪遙亦回到學校。

見她滿頭大汗地拿著兩個塑膠袋，有點笨拙地急步走向我們，於是我立刻上前替她抽起其中一袋食物。

「買好喇，我買咗好多嘢！有生果啦！雞蛋啦！忌廉啦！........」雪遙一邊說。

「知道知道，唔洗逐樣講出嚟。」我沒好氣地搖頭說。

「車...興奮得滯嘛！諗起聽日可以整Pancake俾人食就好期待！」雪遙熱情地說。

「係係係，但忌廉同雞蛋嗰啲要雪住，擺去家政室個雪櫃先？」我說。

「等我去啦，我冇咩點做嘢。」智恆說。

「咁..咁我哋都幫手..」兩名毒撚說。

看著汗流浹背的雪遙，我從口袋裡取出紙巾，替她輕拭汗水。

雪遙那略微泛紅的臉龐，在夕陽的照耀下顯得更加可愛。

「唔..唔該...」她羞怯地說。

「真係眼冤～」旁邊的巧渝攤開雙手道。

「咁我走先喇，攤位啲嘢大致搞掂，聽朝返嚟就可以即刻開始。」巧渝揹起書包跟我們道別。

在巧渝離開後，本打算跟雪遙輕鬆聊聊天，可惜這時候那個討厭的李峻仁又走了過來。

「Wow，終於見到你。」

雪遙有點害怕，便躲到我的背後。

「做咩咁嘅樣呀？我好人嚟㗎喎，唔洗咁驚我，你哋話係唔係！？」李峻仁跟身旁的隨從說。

「係！！！哈哈哈哈！！」

豈有此理...竟然公然調戲女同學...

本來憑我一人的嘴舌是敵不過他們三人，幸好智恆他們及時回來。

「又點撚樣呀你！係咪想隻抽呀？！」智恆怒氣沖沖地說。

「隻抽？我正人君子嚟，唔會打交，不過就算打，你都唔夠我打啦！」李峻仁笑道。

智恆被刺激得雙眼瞪大，好像快忍不住的樣子，我馬上制止他，讓他不要惹事。

「算啦，唔好同呢啲人拗。」我瞄一瞄李峻仁。

「Who fucking cares？」李峻仁囂張地留下一句說話後便離開。

「你好嘢！聽日我實贏撚硬你哋！」智恆向籃球學會的攤位喊道。

我回頭看著雪遙，她好像也放心下來。

「雪遙，我哋返去囉？」

「嗯...！」

「我哋行先，聽朝見。」我跟智恆交代。

學校與家的距離不算太遠，靜靜地跟雪遙並肩而行的感覺也很滿足。

看著快要轉暗的天色，又想起雪遙的事。

「今日唔洗返Part time？」我問。

「唔洗呀，驚返工嘅話聽日會太攰起唔到身。」雪遙抬頭看著我說。

不知道雪遙媽媽的情況如何。

「有冇啲咩我幫到手？」我問。

「嗯...？...哦....！唔洗擔心我喎！我ok㗎。」雪遙微微一笑，像在掩飾自己的情緒。

但，雪遙越把自己裝得沒事，我越是害怕。

害怕終有一天，她會支撐不住。

「有嘢要同我講，我哋係好朋友嚟。」臨分別時，我停下來認真地看著雪遙。

雪遙先是愣一愣，又向我報以信任的笑容。

「嗯！」

「勾手指尾，應承我，唔好收埋自己。」我伸出尾指。

雪遙思考數秒後合上眼睛，輕輕點頭。

「應承你。」雪遙也伸出尾指。