結咗婚十幾年，好似已經唔太愛。《相愛十年》: 驚否（三）

「嚟，你想同我傾咩啊？自我介紹吓先？我仲未知你叫咩名喎。」
 
「你可以叫我做大西北梁朝偉，6B班。」
 
「點解？」
 
她仔細觀察他，眉眼確有幾分像梁朝偉的憂鬱神色，五官沉靜，薄唇相依。
 
「哦，我叫梁朝光。啲人就叫我做梁朝偉，又有少少似佢咁囉，大西北，你明㗎啦。」
 


學校校址在天水圍。
 
「咁你鍾唔鍾意劉嘉玲？」
 
「唔鍾意，我鍾意張曼玉多啲。」
 
思思想起身穿旗袍的張曼玉在煙霧中媚眼如絲，她理解他的答案。
 
朝光繼續說話：「其實，我都唔知有咩好講。」
 


他只是不想上課，不想再留在那一個狹小的班房，無無謂謂；來這裏，對着一個不會責備他的「女生」，怎也好過在課堂不斷被罰站。
 
「啫係你都讀過中學㗎啦，啲老師都鳩鳩哋……」
 
「喂。」
 
「OKOK，啲老師都奇奇怪怪。我好唔鍾意佢哋。你同番佢哋講都唔緊要嘅，冇所謂，橫掂佢哋都唔鍾意我，打和。」
 
「你哋關係好差？」
 


「係，你知唔知，啲理由都幾無聊，就係我成日駁嘴駁舌咁。你睇我個款，就知我都唔係真係好乖嗰啲。」思思聞言，打量他後不作聲。他自我肯定：「係。佢哋就叫啲同學唔好同我呢種壞學生玩喎，如果唔係，罰埋佢。」
 
她瞪大雙眼：「咁衰？」
 
老師不應是有教無類嗎？如果學生頑劣，生氣當然正常，但不必着別人孤立他吧——這是在培養學生怎樣的價值觀？
 
「可能係因為我成日整蠱佢哋，改佢哋花名又俾佢哋知啦。屌，啲老師成日死要面，我同佢講佢計錯數，佢竟然啤番我轉頭，大佬，咁真係你錯喎；我就叫佢做『花面哈』，日日都搽大大噠五顏六色上面，又成日哈哈哈唔知笑，教好啲書好過啦。佢知道咗之後，仲衰，成日鳩改我啲數學test，明明冇錯嘅又唔俾分我，要我自己對marking scheme揾番啲分出嚟，然後佢又死死氣咁俾番分我，麻鬼煩。」
 
思思想起6B班主任Miss Yeung平時明明和顏悅色，不似這種人吧；可是，她其實毫不了解，只點點頭，問：
 
「你哋咁樣，維持咗幾耐？」
 
「上年開始囉。」
 
朝光想起，中五的一次課後留堂班，他說了一句：


 
「我出去補習有咩問題先？」
 
他向來都是老師心中的頑皮學生，不怕說話莽撞而被罰。
 
「冇，你個人選擇嚟啫；但你唔好教唆其他同學去補習喎，出面一定好過學校老師咩？」Miss Yeung聽見了他和同學的交談，叉腰說。
 
「咩叫教唆？係佢哋同我一樣，覺得你教得唔好，所以先想去出面補數咋。」
 
他忽略了她的問題，因為外面不一定比日校老師好，但一定比她解題清晰、準確、詳細。
 
「真係？」Miss Yeung看着剛和朝光聊得正歡的同學，冷冷地盯着他們：「你哋真係咁諗？」
 
同學看看朝光，又看看Miss Yeung——她是訓導組的老師，嚴厲、苛刻，也影響他們的操行學業。雖然，他們真的曾經說過：「唔知佢講咩，梁朝偉教得仲清楚。」但是，但是。
 


他們只默默低頭，什麼都不說。
 
「佢哋冇講喎，得你咁咋喎。」她用目光掃過同學的頭頂。
 
「你喺度，佢哋緊係唔敢咁講，好出奇？」
 
「咁你點解敢？」
 
「因為我真係咁諗，我數學好，就真係唔關你事嘅。」
 
「如果你真係咁諗，然後你又講出口；咁佢哋冇講，都代表佢哋唔係咁諗喎。咁你仲唔係引佢哋去補習？」
 
朝光一呆，這話乍聽之下，竟然異常合理；所有同學的反應也在供奉這個說法。他只見別人抿嘴，悄悄地向他以眼神致歉，無聲無息——其實，毫無意義。
 
原本，他想回擊：「人哋唔想去，我逼都冇用㗎喎？攞把刀指住佢去交補習錢咩。」但是，就這樣看來，別人好像真的「不想」，他又何必多講。


 
他不再言語。
 
Miss Yeung見狀，輕笑：「唔好亂咁屈同學啦。」
 
從那時起，他就跟自己說，數學成績一定要很好很好，來挫挫她的銳氣和囂張，他要想方設法地告訴她：就算面對她的不認同和打壓，他也可以令她無可奈何。
 
的確，他的數理不錯，大部分時候都取得不錯的分數；久而久之，就不斷和Miss Yeung鬥氣，擁有一種不進縮的資本，二人關係越來越惡劣——
 
她叫同學不要靠近他，否則將會使用連坐法，或獎或罰；他則不斷諷刺她教學能力低下，不知所云。
 
他太討厭她的濃妝面具，笑起來只覺失真，虛情假意。