結咗婚十幾年，好似已經唔太愛。《相愛十年》: 耳語（二）
看，人是迂腐的；習慣習慣，成自然，温水煮蛙，稍一有一點好的迹象，又覺得可以停歇了，進一步甚至會丢失眼前美景，所以世間的問題很難真正地被解決，只會甩皮甩骨地苟活，但永不斷氣。
下午，阿朗收到峰仔的WhatsApp：
「Fiona結婚喎，話要搞吓同學會，單身party喎。」附上兩個奸笑的表情。
「哦……我唔去啦。」阿朗答。
「明。」
「玩得開心，唔好太癲，女朋友會擔心。」
「得啦。計我話，到時Fiona婚禮淨係襟兄弟都可以擺一圍，互相交流吓食評。」
阿朗看見峰仔講得抵死，對着電話笑了；思思見狀，問：
「傾咩傾得咁開心？」
「有個中學同學結婚，峰仔講咗啲好好笑嘅嘢嚟寸佢。」
「俾我睇吓？」
「好。」
她將頭凑近，一看就看到名字，面色僵了一下：
「哦，係Fiona喎。」
「係呀，佢咁都嫁得出。」
他一直覺得，Fiona不適宜嫁娶，像月曆上的陰暗日子一樣。
「我係女人都覺得佢點都嫁得出嘅。咁咪幾好囉，我哋應該要替其他女人鬆一口氣。」
適宜與否是一回事，長得漂亮、情商高，這個結果並不出奇；倒好，可以減少對其的戒心。
「嗯。總之，我唔會去party。」
「仲敢？」
「唔敢。」
「係我大量先原諒你咋，醒醒定定。」
「得得得，知道。保證真係真係唔會再有咁嘅事。」
舊事重提，沒有點明，但也心知肚明。不是一種禁忌，但沒有人忘記。
「其實佢真係幾靚。嗰次之後，我add咗佢Facebook，佢啲相影得好好睇，真人係咪都係呢個樣？」
她想多看看他的初戀到底是何許人，幾乎記得Fiona分享過的語錄、自拍、瑣事。
「唔知，嗰次之後，我就unfriend咗佢。」
這是真的，他在杜絕自己做到傻事，或者給更多機會Fiona令他做壞事。
「我開俾你睇。」
「唔洗啦。」
心存芥蒂，毫不好奇。每每想起，他都有種不適，總是覺得差一點就會失去一切，失去眼前的所謂幸福和安穩。
她見他皺眉，確實不情願，故調侃他：
「做咩咁抗拒，心虛？」
「唔係啊，我只係唔想睇，都過咗去啦。」
「其實，我仲好記得㗎。」
即使，已成過去，但那一種呼吸不來的強忍淚水、逼使自己頭腦清晰冷靜的眼睛麻痹感，仍然赫人。
「Sorry。」
他不加以辯駁，也不想接話，沒有人想在自己犯錯的地方駐足，而且供別人遊覽；即使對方是髮妻。
「我好似從來都冇同你講過咁，當時係唔想提，後來就係無謂提。但其實我好介意你上佢屋企，成身都係香水味咁番嚟，我都好介意你有咩都同佢講先，而我係咩都唔知。」
她為此，失卻了安全感；直到後來，才慢慢地相信他。當然，另一方面卻更安心，明白他對Fiona那種美人尚沒有過多越軌行為，其他人更難超越——思思如此自我安慰，在這個邏輯裏自洽。
「Sorry……」
他重複道歉，她一直沒有責備他，已很寬厚。
「唔緊要。我已經冇嘢，但只係想講出嚟啫，難得溝通吓吖嘛。」
「你信我，我冇鍾意過佢。」
「嗯。」
既然說起，阿朗問：
「咁你呢？有冇鍾意過你個學生？」
她沒好氣地答：
「當然冇——喂，人哋咁細個，我有冇咁狼死啊？」
「細個咪好，不知幾正，又青春又有活力。」
「唔覺。你真係傻仔嚟嘅。」
「我邊度傻，一估就俾我估到，唔係淨係得你先有女人嘅直覺。」
「威啦威啦。」
二人都笑，然後，又停頓了一下。
「佢最近點？」阿朗隨便問問。
「佢拍咗拖啦；琴日我見到佢，佢送咗盒鎮痛貼俾我。」
「喺街上撞到？」
「佢喺校門等我。」
他忽然想起，昨晚，她從袋中取出鎮痛貼，然後着他幫忙貼上；時間推前，她比往常晚了一點回來。
他語帶諷刺：
「哇，咁有心嘅？拍咗拖仲送嘢俾鍾意過嘅人？」
她聽得出他的揶揄，反擊道：
「你夠結咗婚仲同初戀情人攬攬錫錫。」
「邊同？我係以為佢有事先會上去，你呢？你個人生勾勾，佢都特登等你放工？」
「有咩問題？」
「佢又知你唔舒服？同學生有冇必要講咁多？」
「識得耐，唔小心講多咗兩句咋嘛。」
「都唔知止唔止淨係用口講，係咪幫你鏈埋骨？」
是。
「你夠係，都唔知止唔止淨係錫過。」
是。
於是，二人盯着對方，再沒有說話。
明明，內心的劇本不是這樣的；明明，這些天來的掙扎和猶豫都是想為大家好，想大家都開心快樂，將心底的話都攤出來；明明，不應該如此，卻會在情緒驅使下，說一些傷害對方的話。
原先想表達的是什麼？
太像在運動場跑步了。跑個半小時，還是不停在同一個空間裏繞圈，來來去去都是這四百米，即使心率高企、汗已浸濕內衣褲，但在旁人看來，只是在原地踏步；慢慢，連自己也覺得如此。
更甚的是，新進場的人只會在內心鄙夷——才跑幾步就如此氣促？
他們不會知道時間之長、體力之消耗。事實上，永遠只有自己才真正一直伴在自己身邊，
所以，阿朗和思思都不了解對方的心路歷程，只覺近來平淡，對方開始沒有心。
所以，也因此，他們缺乏柔情的包容——
首先被情緒凌駕思考，繼而作出挑釁。