香港都市傳說：一筒歸西: （五十）安映的危機（１１）

「你話我輸咗？」
 
「無錯，我相信你一早已經察覺，我做咁多嘢都只係為咗拖時間。而依家，時間到啦，你再唔係我對手。」
 
道士自信地看著子鋒，然後手中結印。
 
「臭小鬼，去死啦！」
 
道士完成結印後，兩手指向子鋒，但子鋒卻沒半點緊張，只是靜靜地看著。
 


時間一秒一秒的過去，過了短短數秒後，道士終於發現了不妥。
 
「點會咁？無可能......再嚟，急急如律令，欶！」
 
道士發現手印無效後，臉上馬上蒙上了一層陰影，頭髮亦以肉眼可見的速度在變白，他仍不明白為甚麼結印會失效。
 
「一早叫你收手㗎啦，又唔聽。依家你控制唔到個詛咒仲被反噬，就算後悔都嚟唔切㗎啦。」
 
「無理由，明明我已經操控咗個女仔......係你，你做咗啲咩？」
 


「你唔駛咁激動，我咩都無做。」
 
「無可能，如果無人阻止，個詛咒應該已經為我所用！一定係你！」
 
子鋒看到道士像瘋了般看著自己，不禁輕輕嘆了口氣。
 
「其實本來你拖延嘅戰術係成功嘅，天命叔喺我出發前已經提咗我，對付道士同鬼怪唔同，唔可以太仁慈，但結果我都係被你成功拖延到時間。呢次我都叫上咗一課，既然你咁想知道點解會無效，不如你直接問佢啦。」
 
子鋒向入口位置指了一指，只見安映和正宇已經來到入口處，慢慢走向子鋒。
 


「哇，乜個女仔傷成咁呀？」
 
子鋒看著安映的四肢血跡斑斑，臉色蒼白如雪，不禁皺了皺眉，然後看了道士一眼，像在後悔沒有早早收拾他一樣。
 
「你唔好淨係望啦，快啲幫下個女仔啦。」
 
只見安映對著子鋒大喊，語氣中好像在說別人的事一樣。
 
「得啦，你唔好再郁啦，我依家過嚟。」
 
子鋒聽到後馬上來到安映身旁，緊急處理安映身上的傷口。
 
「搞掂，你唔好喺佢度啦，快啲出返嚟等佢抖下啦。」
 
「知啦，正宇你過嚟扶實安映。」


 
正宇聽到「安映」的呼喚後，馬上過來扶著安映，然後一秒前仍在說話的她，此刻卻像脫力了般暈倒在正宇身上。
 
三人分明在處理著安映的事情，但根據談話內容，卻像是有四個人一樣，到底怎麼回事呢？
 
「原來......原來係咁！仲話咩正派邪派，你自己咪又係用鬼仔嚟幫你！」
 
道士在旁邊看到三人，突然明白了甚麼。
 
「鬼仔？唉，你真係搞錯晒。」
 
「我先唔係咩鬼仔，臭道士！」
 
在子鋒回應的同時，他的身旁顯現了一個模糊的影像，慢慢的，那影像變得愈來愈實在，甚至能看到她的外觀，是一名樣貌清秀的少女。
 


「你唔係鬼仔係啲咩？唔通......無可能......」
 
「就算係靈體，只要行正道一樣可以修煉成仙，關鍵睇你選擇行條咩路。不過，你啱啱已經放棄咗呢條正路。」
 
道士難以置信地看著子鋒，不願意相信他的說話。
 
「我咪講咗我唔係咩鬼仔囉！不過你啲邪門歪道，唔覺得我哋可以修成正果一啲都唔出奇。」
 
「算啦小詠，唔好同佢講咁多啦，中咗『一筒歸西』嗰個人呢？」
 
「你話阿邦呀嘛，喺我上咗安映身之後，佢就走甩咗，我諗佢應該唔得㗎啦。」
 
「連你都阻唔到佢？」
 
「無辦法啦，個臭道士用鬼仔操控住安映，我又要趕走隻鬼仔，又要保住安映嘅靈魂同軀殼，無辦法之下只可以任得佢走。」


 
「唉，唯有盡力試下搵佢啦，唔好講啦，我哋快啲出去，仲要送安映去醫院。」
 
「咁個道士點？」
 
小詠指了指仍在混亂狀態中的道士。
 
「帶埋佢出去啦，睇怕佢都做唔到啲咩㗎啦。等佢出去接受應有嘅懲罰啦。不過佢咁嘅狀態......小詠，要拜託你幫幫手上佢身啦，我想盡快離開呢度。」
 
小詠聽到後露出一臉嫌惡的神情，然後望向子鋒。
 
「乖啦，呢度得你可以上佢身帶佢走㗎咋。」
 
「唉......好啦。」
 


正當小詠準備動手之際，道士突然發狂。
 
「我無輸！我唔承認！我唔承認！就算我要死，都要拉埋你哋陪葬！」
 
子鋒和小詠察覺到不妥，便想馬上制止那道士。
 
只是道士的動作比他們更快，當他們意識到道士有異時，他已用小刀刺穿了自己的心臟。
 
然後地洞裡傳來猛烈的震盪。
 
「仆街，臨死都要搞咁多嘢！正宇，我哋要即刻走啦，跟實我；小詠，安映就交畀你啦！次次都唔畀我輕輕鬆鬆搞掂！」
 
子鋒話音剛落，所處的洞穴便開始出現崩塌，三人一靈體只好馬上逃走。