香港都市傳說：一筒歸西: 彩蛋：一筒歸西 - 尚未結束（二）

「長洲啲海鮮餐都幾平，每人都唔駛百五蚊。」
 
「平就平啦，不過唔係咁好食啫。」
 
「咁嘅價錢食到五樣餸，差唔多啦。點呀，你哋想依家去買定嘢食先，定周圍行下先？」
 
三人吃過飯後，便捧著大肚子離開，阿軒詢問二人意見的同時，亦給正宇發了訊息。
 
「食到咁飽，天氣又熱，嗱嗱聲買完嘢返去抖下吹下冷氣啦。」
 




「今次我就贊成哲瑋啦，不過我哋預幾人份好呀？正宇又唔知嚟唔嚟。」
 
「我啱啱Whatsapp咗佢，佢連睇都無睇，應該唔嚟多㗎啦，我哋預三人份量先啦。最多佢真係入嚟嘅話，再去超市買啲肉返去燒囉。」
 
三人商議好後，便出發去搜購燒烤的用具。
 
「哇，痴線㗎，熱到我呢！都叫你唔好掛住睇衫㗎啦，間鋪又細又無冷氣，搞到我同阿軒要喺出面等你。」
 
「咩啫，難得入到嚟見到有啱心水梗係要睇下啦。」
 




「就係入到嚟呢到你都仲要睇衫嗰下好嘢，阿軒你話係咪啦？」
 
「唔好嘈啦，唔熱都熱咗啦，快啲入去嘆下冷氣再整埋啲嘢食，之後咪可以慢慢抖下囉。」
 
阿軒邊說邊拿出鑰匙，打開門後又一次嗅到那種像是發霉的氣味。
 
「哇頂，點解又有嗰陣味嘅？」
 
哲瑋滿心歡喜跑進屋裡，準備淋浴在冷氣之下，卻發現室內又一次充滿了那種發霉的味道。
 




「係喎，又係頭先嗰陣味。咦？點解露台個玻璃門開咗嘅？」
 
怡欣進屋後，繼氣味後，便注意到玻璃門被打開了。
 
「哦，係咪你頭先無閂門？」
 
「痴線，肯定唔係我，最尾出間屋嗰個係你，肯定你無閂門唔記得咗！」
 
阿軒無視二人在吵鬧，默默地走到露台位置。
 
「奇怪，我好肯定走之後係閂實咗度門同埋有鎖㗎喎，點解會咁？」
 
阿軒沒有把心裡所想告訴二人，畢竟說了也是無法證實，他只好仔細地觀察露台。
 
「你哋嚟睇下。」




 
二人聽到阿軒的說話，便一起走到露台。
 
「做咩呀？哇，咁臭嘅？」
 
「哇，點解咁臭㗎，頭先都唔覺咁臭㗎！呢袋係咩嚟？」
 
怡欣捂著口和鼻，指了指地上一個膠袋，內裡長滿了像是霉菌的東西。
 
「我都唔知，但頭先好似唔覺有呢袋嘢。」
 
「咩都好啦，即刻掉咗佢啦，好臭呀。」
 
「係囉，咁哲瑋你快啲拎去掉啦。」
 




「痴線，你去唔好？頭先你咪買咗新衫嘅，呢套整臭咗都無所謂，你快啲拎去掉啦。」
 
二人你一言我一語，都不想去接觸這袋長滿霉菌的垃圾。
 
「等我嚟啦，你哋幫手洗下嘢同清下陣味，我一陣返嚟再幫手。」
 
二人聽到阿軒自動請纓，馬上點頭，恨不得阿軒立刻行動。
 
阿軒戴上手套，把那袋不知名的垃圾拿到屋外。
 
「咦？奇怪，出到嚟袋嘢又好似無咁臭。」
 
阿軒邊走邊想，為手上的垃圾感到有點奇怪。
 
就在他走出東堤小築範圍，他突然感到脖子被甚麼人吹了一口氣，回頭一看，甚麼人也沒有。




 
「搞咩呀？唔係撞鬼呀？」
 
阿軒心裡一驚，馬上伸手往褲袋。
 
「仆街，個錦囊呢？唔係無拎入嚟呀？」
 
阿軒努力回想起早上出門的情況，然後他總算想起錦囊被他安好地放在書桌上。
 
「無事嘅，唔好自己嚇自己，應該係太早起身太攰先有呢啲奇怪感覺，同埋都係一日半日啫，無事嘅。」
 
阿軒努力地安撫自己，邊把垃圾拿去遠處的垃圾桶，邊祈禱著一切順利。