香港都市傳說：一筒歸西: 彩蛋：一筒歸西 - 尚未結束（四）

「老闆，唔好意思，想問少少嘢。」
 
阿軒走到老闆面前，被他用一種像是掃描的方式打量全身。
 
「點呀？睇你都唔係嚟加單㗎啦？」
 
「加單呢，呢層就......都好呀，要多三罐啤酒呀。」
 
老闆聽到後，再看了看阿軒，然後便從雪櫃拿了三罐啤酒出來。
 




「你識做時我識做，想問咩呀？係咪想問關於沙灘啲事呀？」
 
「係呀，老闆你真係醒。」
 
「唔駛擦鞋啦，見你都幾好禮貌，又咁識做，等我講下少少長洲嘅嘢你哋聽啦。」
 
老闆語音剛落，自行拿了一罐啤酒後，便從櫃檯走向阿軒他們坐的地方。
 
「睇你哋幾個咁後生，應該都係廿歲出頭啦？」
 




三人點了點頭。
 
「咁你哋知唔知長洲最出名係咩？」
 
三人想了一下，各自回應。
 
「搶包山！」
 
「張保仔？」
 




「大魚蛋同芒果糯米糍！」
 
怡欣最後的回答令三人不禁用帶點鄙視的眼光看著她。
 
「咩啫，咁長洲係呢啲㗎啦。你唔駛食嘅？」
 
老闆沒有理會怡欣，繼續說道。
 
「你哋講嗰啲係出名，不過都係對外面嘅人嚟講出名。就連搶包山呢幾年都慢慢變成遊客嚟參觀嘅節目啦。而對我哋呢啲長洲居民呢，最出名嘅，一定係鬧鬼嘅事件。」
 
三人聽到後，沒有半點害怕，反而一臉好奇，這才讓人想起阿軒一行人是「奇聞異事學會」的創辦人。
 
「你哋後生，可能唔知道，長洲以前係熱門嘅自殺勝地嚟。而且個個都係選擇燒炭自殺，搞到啲渡假屋無人夠膽住。就算有人肯租，啲房東又驚係嚟自殺，所以嗰陣真係搞到滿城風雨。幾乎每個月都整返一單半單。」
 
憶起往事的老闆也有少許激動，大口大口把啤酒灌進胃裡。




 
「我嗰陣唔知行咗咩衰運，喺正嗰段自殺熱潮買咗幾間渡假屋，間間都有人喺入面自殺過，每次清完都硬係有陣怪味。有一晚我去渡假屋執啲手尾，點知撞正唔知頭七定尾七，我睇住上一對自殺嘅情侶喺窗出面望住我，大佬我嗰度二樓嚟㗎，真係被佢嚇到傻，跟住仲黑足成年！最後搞唔掂唯有監平監賤賣咗啲渡假屋。」
 
「咁關個沙灘咩事？」
 
「細路女咁心急，依家咪講囉。咁話說以前啲人入嚟長洲，點都會落水玩下，因為以前啲水乾淨好多。我記得嗰陣係自殺熱潮啱啱開始嘅階段，仲未係好多人知。咁有一日我如常喺碼頭嗰邊開工，有一組中學生入嚟話想租屋，嗰陣我間屋已經死過人，我自己都好小心揀客，驚佢哋係特登入嚟自殺。咁我見佢哋都應該係放暑假入嚟玩嘅，咁梗係租畀佢哋啦。點知最後佢哋都係出事......」
 
老闆回憶起當時的情況，眉頭緊皺，臉上那懊惱的表情，看來當時的事情仍然影響著他。
 
「因為佢哋話唔識得點樣行去渡假屋，咁我見又無乜生意，就帶佢哋過去啦。其實開門嗰下我就應該唔好租畀佢哋先係......」
 
原來當天，當老闆開門的瞬間，他看到兩個黑色的身影出現在客廳。當他打開屋內的燈光後，身影便不見了。
 
然後他嗅到房內有一陣異味，但他看到那群中學生並沒有提出任何問題，也沒有想太多便離開了。
 




「跟住我就無再放上心，點知到咗第二日，等咗好耐都唔見佢哋，我咪去渡假屋搵佢哋囉。去到嘅時候，間屋反鎖咗，我用後備匙開門嗰下，嗰個情形我一世都記得！」
 
老闆說到這裡，又一口氣喝了一大口啤酒，嘗試驅趕那不安的情緒。
 
「我一打開門嗰下，聞到好大陣海水味同臭味。因為屋入面無開燈又落晒簾，我下意識打開燈，跟住我見到有三條屍體瞓咗喺地下。」
 
阿軒三人聽到這裡，也不禁倒抽了一口涼氣。
 
「你點睇得出嗰三個係屍體？」
 
「你哋有無見過啲浸死嘅屍體？就算無見過應該都有聽過啩，當時嗰三條屍體全身發脹，皮膚變得又黑又紫，而且三條屍不約而同咁，喺腳踝同頸位都有一啲好似海草嘅物體纏住。總之你一眼望埋去就會知已經死咗。」
 
三人聽到後，腦海裡不約而同地浮現起三條屍體的畫面。
 
但那畫面不是憑想像力聯想出來，而是好像電影一樣，在三人腦海裡浮現。




 
三人的表情瞬間凝結，但他們都以為是自己想像出這個畫面，並沒有把這個狀況說出來。
 
而老闆似乎沒有注意到三人的變化，自顧自地把未完的故事說完。
 
「嗰下我真係呆咗，心諗唔係啩，咁黑仔，又係我間屋死人。之後發現客廳角落有一個女仔係咁喺度震，用雙手抱實自己個頭，好似好驚咁，而且完全無發現我入咗嚟。我嗰刻無諗太多，就行咗過去個女仔睇下有無事，同埋順便問下究竟發生咩事。之後佢講出嚟嘅嘢，我諗除咗佢之外，應該無人會信。」
 
到底，那班中學生發生了甚麼事呢？