行山遇到三條女（少甜）: 跳過篇

之後幾日我都係繼續同Irene溫下旅款，得閑就做下past paper。而芷睛就因為同人調更，搞到我地成個星期都無得見，我都有同佢怨下，不過諗到佢返工都辛苦，所以都無煩佢。

但有趣既係我教Irene煮既生炒排骨同南瓜濃湯，佢話就話自己記得哂，但果然學習同實戰係唔一樣，佢竟然將糖同鹽調轉左，搞到個咕嚕肉變左鹹嘅，而南瓜濃湯就甜既。

我見個賣相唔錯所以就食左好大啖，然後就覺得有啲奇怪咁望住Irene，佢食完都應該感覺到，所以就尷尬咁笑一笑。

我為左唔好咁打擊佢自信就講「第一次黎講算係咁啦，個賣相幾好呀，個味道都幾有創意呀。」死啦，講下講下變左笑佢添，希望佢唔覺啦。

好彩佢都唔覺，仲話「係咩，我覺得同你個味唔同咋，但我都覺得幾好食，原來你都咁覺得呀。」



套戲都演左，都要演埋落去架啦，我就講「係囉，你自己再練下啦」

其餘時間，大家都係好努力咁溫書，無浪費任何時間，則使我失眠有時好眼瞓，都被支咖啡搞掂左。

最後做多左份past paper，上升左唔少，由3升到近5，希望到時考試再好啲啦。然後就完結左最後一日，準備充足睡眠考好聽日考試。